ಬೆಂಗಳೂರು: ಕರುನಾಡ ಚಕ್ರವರ್ತಿ ಶಿವರಾಜಕುಮಾರ್ (Shiva Rajkumar) ಅಭಿನಯದ ಬಹು ನಿರೀಕ್ಷಿತ ʼಭೈರತಿ ರಣಗಲ್ʼ (Bhairathi Ranagal) ಚಿತ್ರದ ಟ್ರೈಲರ್‌ ರಿಲೀಸ್‌ ಆಗಿದೆ. ಆ ಮೂಲಕ ಚಿತ್ರ ಬಿಡುಗಡೆಗಿಂತ 10 ದಿನಗಳ ಮೊದಲೇ ಅಭಿಮಾನಿಗಳಿಗೆ ಸಣ್ಣದೊಂದು ಝಲಕ್‌ ತೋರಿಸಲಾಗಿದೆ. ನರ್ತನ್ (Narthan) ನಿರ್ದೇಶನದಲ್ಲಿ ಮೂಡಿ ಬಂದಿರುವ ʼಭೈರತಿ ರಣಗಲ್ʼ 2017ರಲ್ಲಿ ತೆರೆಕಂಡ ʼಮಫ್ತಿʼ (Mufti) ಚಿತ್ರದ ಪ್ರೀಕ್ವೆಲ್. ಅಂದರೆ ʼಮಫ್ತಿʼ ಸಿನಿಮಾದ ಕಥೆ ನಡೆಯುವ ಮೊದಲು ಏನಾಗಿತ್ತು ಎನ್ನುವುದನ್ನು ನರ್ತನ್ ತೆರೆ ಮೇಲೆ ಅನಾವರಣಗೊಳಿಸಿದ್ದಾರೆ.
ಶಿವರಾಜ್‌ ಕುಮಾರ್‌ ಅವರ ಪವರ್‌ಫುಲ್‌ ಪಾತ್ರದ ಪರಿಚಯ ಮಾಡುವ ಮೂಲಕ ಟ್ರೈಲರ್‌ ಈಗಾಗಲೇ ಅಭಿಮಾನಿಗಳ ಗಮನ ಸೆಳೆದಿದೆ. ರೋಣಪುರದ ಜನರನ್ನು ಕಾಪಾಡಲು ಬರುವ ಶಿವಣ್ಣ ಅವರ ಖಡಕ್‌ ಎಂಟ್ರಿಗೆ ನೋಡುಗರು ಫಿದಾ ಆಗಿದ್ದಾರೆ. ಜತೆಗೆ ಚಿತ್ರದಲ್ಲಿ ಭರಪೂರ ಆ್ಯಕ್ಷನ್‌ ದೃಶ್ಯಗಳಿವೆ ಎನ್ನುವ ಸೂಚನೆ ಈ ಮೂಲಕ ಸಿಕ್ಕಿದೆ. ತಮ್ಮವರಿಗಾಗಿ ಕೋರ್ಟ್‌ನಲ್ಲಿ ವಾದ ಮಾಡುವ ವಕೀಲನಾಗಿಯೂ ಶಿವಣ್ಣ ಅಬ್ಬರಿಸಲಿದ್ದಾರೆ.
ಟ್ರೈಲರ್‌ನಲ್ಲಿ ಏನಿದೆ?
2.32 ನಿಮಿಷದ ಟ್ರೈಲರ್‌ನಲ್ಲಿ ರೋಣಪುರದ ಜನರ ಬವಣೆ, ಉಳ್ಳವರು ಮಾಡುವ ಶೋಷಣೆಯ ಪರಿಚಯವಾಗಿದೆ. ಮತ್ತೊಮ್ಮೆ ಲಾಂಗ್‌ ಬೀಸುವ ಮೂಲಕ ಶಿವಣ್ಣ ತೆರೆ ಮೇಲೆ ರೌಡಿಗಳ ಬೆಂಡೆತ್ತಿದ್ದಾರೆ. ʼʼಜನರಿಗೋಸ್ಕರ ನಾನು ಯಾರನ್ನು ಬೇಕಾದರೂ ಕಳ್ಕೋತೀನಿ. ಆದರೆ ಜನರನ್ನು ಕಳೆದುಕೊಳ್ಳಲು ಇಷ್ಟಪಡುವುದಿಲ್ಲʼʼ ಎನ್ನುವ ಡೈಲಾಗ್‌ ಹೇಳುವ ಮೂಲಕ ತಮ್ಮರಿಗಾಗಿ ಭೈರತಿ ರಣಗಲ್ (ಶಿವಣ್ಣ) ಯಾವ ಮಟ್ಟಿನ ಹೋರಾಟ ನಡೆಸಲೂ ಸಿದ್ಧ ಎನ್ನುವ ಸೂಚನೆ ನೀಡಿದ್ದಾರೆ. ಈ ಪವರ್‌ ಫುಲ್‌ ಟ್ರೈಲರ್‌ ನೋಡಿ ಫ್ಯಾನ್ಸ್‌ ರೋಮಾಂಚನಗೊಂಡಿದ್ದಾರೆ.
ರುಕ್ಮಿಣಿ ವಸಂತ್‌ ನಾಯಕಿ
ಸದ್ಯ ಸ್ಯಾಂಡಲ್‌ವುಡ್‌ನಲ್ಲಿ ಮಿಂಚುತ್ತಿರುವ ರುಕ್ಮಿಣಿ ವಸಂತ್‌ ʼಭೈರತಿ ರಣಗಲ್ʼ ಸಿನಿಮಾದಲ್ಲಿ ನಾಯಕಿಯಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ. ವೈದ್ಯೆಯ ಪಾತ್ರದಲ್ಲಿ ಅವರು ಮೋಡಿ ಮಾಡಲಿದ್ದಾರೆ. ಇವರ ಜತೆಗೆ ಶಿವಣ್ಣನ ತಂಗಿಯಾಗಿ ಛಾಯಾ ಸಿಂಗ್‌ ಅಭಿನಯಿಸಿದ್ದಾರೆ. ಬಾಲಿವುಡ್‌ ನಟ ರಾಹುಲ್‌ ಬೋಸ್‌, ನಾನಾ ಪಾಟೆಕರ್‌, ಯೋಗಿ ಬಾಬು, ದೇವರಾಜ್‌, ವಶಿಷ್ಟ ಸಿಂಹ ಮತ್ತಿತರರು ಮುಖ್ಯ ಪಾತ್ರಗಳಲ್ಲಿ ನಟಿಸಿದ್ದಾರೆ. ಗೀತಾ ಪಿಕ್ಚರ್ಸ್ ಲಾಂಛನದಲ್ಲಿ ಗೀತಾ ಶಿವರಾಜಕುಮಾರ್ ಅವರು ನಿರ್ಮಿಸಿರುವ, ಈ ಚಿತ್ರಕ್ಕೆ ರವಿ ಬಸ್ರೂರ್ ಸಂಗೀತ ನಿರ್ದೇಶನವಿದೆ.
ನ. 15ರಂದು ತೆರೆಗೆ
2017ರಲ್ಲಿ ತೆರೆಕಂಡ ʼಮಫ್ತಿʼ ಸೂಪರ್‌ ಹಿಟ್‌ ಆಗಿತ್ತು. ಅದರಲ್ಲಿನ ಶಿವಣ್ಣ ಅವರ ಲುಕ್‌, ಮ್ಯಾನರಿಸಂ ಸಾಕಷ್ಟು ಗಮನ ಸೆಳೆದಿತ್ತು. ಶ್ರೀಮುರಳಿಯೂ ಈ ಸಿನಿಮಾದಲ್ಲಿ ಮಿಂಚು ಹರಿಸಿದ್ದರು. ಜತೆಗೆ ತಮಿಳಿಗೂ ರಿಮೇಕ್‌ ಆಗಿತ್ತು. ಇದೇ ಕಾರಣಕ್ಕೆ ʼಭೈರತಿ ರಣಗಲ್ʼ ಸೆಟ್ಟೇರಿದಾಗಿನಿಂದಲೇ ಕುತೂಹಲ ಕೆರಳಿಸಿತ್ತು. ‘ಮಫ್ತಿ’ ಚಿತ್ರದ ಪ್ರೀಕ್ವೆಲ್ ಆಗಿರುವ ‘ಭೈರತಿ ರಣಗಲ್’ ಚಿತ್ರದ ಸೀಕ್ವೆಲ್ ಕೂಡ ಬರಲಿದೆ ಎಂದು ಶಿವರಾಜ್‌ ಕುಮಾರ್‌ ಕೆಲವು ದಿನಗಳ ಹಿಂದೆ ಘೋಷಿಸಿದ್ದಾರೆ. ಹೀಗಾಗಿ ಪ್ರೇಕ್ಷಕರಲ್ಲಿ ಕಥೆಯ ಬಗ್ಗೆ ಈಗಾಗಲೇ ಚರ್ಚೆ ಆರಂಭವಾಗಿದೆ. ಸ್ಯಾಂಡಲ್‌ವುಡ್‌ನಲ್ಲಿ ಇದು ಮತ್ತೊಂದು ಮೈಲಿಗಲ್ಲು ಸೃಷ್ಟಿಸಲಿದೆ ಎಂಬ ಮಾತು ಕೇಳಿ ಬಂದಿದೆ.
ಈ ಸುದ್ದಿಯನ್ನೂ ಓದಿ: Bhairathi Ranagal: ʻಭೈರತಿ ರಣಗಲ್’ ಸೀಕ್ವೆಲ್ ಕೂಡ ಬರುತ್ತೆ; ಸಿನಿಪ್ರಿಯರಿಗೆ ಸರ್ಪ್ರೈಸ್‌ ಕೊಟ್ಟ ಶಿವಣ್ಣ
