Chhava Movie: ರಿಲೀಸ್‌ ಡೇಟ್‌ ಮುಂದೂಡಿದ ‘ಛಾವಾ’ ಚಿತ್ರತಂಡ; ‘ಪುಷ್ಪ 2’ ಹಾದಿ ಸುಗಮ

ಮುಂಬೈ: ಈ ವರ್ಷದ ಬಹುದೊಡ್ಡ ಬಾಕ್ಸ್‌ ಆಫೀಸ್‌ ಕ್ಲ್ಯಾಶ್‌ ತಪ್ಪಿದೆ. ವಿಕ್ಕಿ ಕೌಶಲ್‌ (Vicky Kaushal) ಅಭಿನಯದ ʼಛಾವಾʼ ಹಿಂದಿ ಚಿತ್ರದ (Chhava Movie) ರಿಲೀಸ್‌ ಡೇಟ್‌ ಅನ್ನು ಮುಂದೂಡಲಾಗಿದ್ದು, ಆ ಮೂಲಕ ಬಹು ನಿರೀಕ್ಷಿತ ಪ್ಯಾನ್‌ ಇಂಡಿಯಾ ಚಿತ್ರ ʼಪುಷ್ಪ 2ʼ ಸಿನಿಮಾದ ಹಾದಿ ಸುಗಮವಾದಂತಾಗಿದೆ. ಇದರೊಂದಿಗೆ ದಕ್ಷಿಣ ಭಾರತ ಮತ್ತು ಬಾಲಿವುಡ್‌ನ ಚಿತ್ರಗಳ ನಡುವಿನ ಪೈಪೋಟಿ ನಿವಾರಣೆಗೊಂಡಿದೆ.

ಚಾರಿತ್ರಿಕ ಡ್ರಾಮ ʼಛಾವಾʼದಲ್ಲಿ ವಿಕ್ಕಿ ಕೌಶಲ್‌ ನಾಯಕರಾಗಿ ಕಾಣಿಸಿಕೊಂಡಿದ್ದು, ಈ ಹಿಂದೆ ಡಿ. 6ರಂದು ಚಿತ್ರ ತೆರೆಗೆ ಬರುವುದಾಗಿ ಘೋಷಿಸಲಾಗಿತ್ತು. ಕಾಕತಾಳೀಯ ಎಂಬಂತೆ ಅಲ್ಲು ಅರ್ಜುನ್‌ ಅವರ ʼಪುಷ್ಪ 2ʼ ಅನ್ನು ಡಿ. 6ರಂದೇ ಬಿಡುಗಡೆ ಮಾಡುವುದಾಗಿ ಈ ಮೊದಲು ಚಿತ್ರತಂಡ ಪ್ರಕಟಿಸಿತ್ತು. ಅದಾದ ಬಳಿಕ ಡಿ. 5ಕ್ಕೆ ರಿಲೀಸ್‌ ಡೇಟ್‌ ಬದಲಾಯಿಸಿತ್ತು. ಅದಾಗ್ಯೂ ಬಾಕ್ಸ್‌ ಆಫೀಸ್‌ನಲ್ಲಿ ಈ 2 ಬಹು ನಿರೀಕ್ಷಿತ, ದೊಡ್ಡ ಚಿತ್ರಗಳ ಪೈಪೋಟಿ ನಡೆಯುವುದು ಖಚಿತ ಎನ್ನಲಾಗಿತ್ತು. ಇದು ಎರಡೂ ಚಿತ್ರಗಳ ಗಳಿಕೆ ಮೇಲೆ ಪರಿಣಾಮ ಬೀರಲಿದೆ ಎನ್ನುವ ಆತಂಕವೂ ಎದುರಾಗಿತ್ತು. ಇದೀಗ ʼಛಾವಾʼ ಈ ರೇಸ್‌ನಿಂದ ಹಿಂದೆ ಸರಿದಿದೆ.

VICKY KAUSHAL – RASHMIKA – AKSHAYE KHANNA: 'CHHAAVA' NEW RELEASE DATE ANNOUNCEMENT… #Chhaava is now set for a theatrical release on 14 Feb 2025… The release date holds special significance since it coincides with Chhatrapati Shivaji Maharaj Jayanti on 19 Feb 2025.

Produced… pic.twitter.com/kDMrY7RDqN

— taran adarsh (@taran_adarsh) November 27, 2024

ಹೊಸ ರಿಲೀಸ್‌ ಡೇಟ್‌ ಅನೌನ್ಸ್‌

ʼಛಾವಾʼ ಈ ವರ್ಷ ತೆರೆ ಕಾಣುವುದಿಲ್ಲ. ಇದನ್ನು ಮುಂದಿನ ವರ್ಷಕ್ಕೆ ಮುಂಡೂಡಲಾಗಿದೆ. ಅಂದರೆ 2025ರ ಫೆ. 14ಕ್ಕೆ ʼಛಾವಾʼ ರಿಲೀಸ್‌ ಆಗಲಿದೆ ಎಂದು ಮೂಲಗಳು ತಿಳಿಸಿವೆ. ಛತ್ರಪತಿ ಶಿವಾಜಿ ಮಹಾರಾಜ್‌ ಜಯಂತಿಯಂದೇ ಈ ಚಿತ್ರ ತೆರೆಗೆ ಬರುತ್ತಿರುವುದು ವಿಶೇಷ. ಯಾಕೆಂದರೆ ಇದು ಛತ್ರಪತಿ ಶಿವಾಜಿ ಮಹಾರಾಜರ ಮಗ ಛತ್ರಪತಿ ಸಂಭಾಜಿ ಮಹಾರಾಜ್ ಅವರ ಕಥೆಯನ್ನೊಳಗೊಂಡಿದೆ. ಲಕ್ಷ್ಮಣ್‌ ಉಟೇಕರ್‌ ಈ ಚಿತ್ರವನ್ನು ನಿರ್ದೇಶಿಸುತ್ತಿದ್ದಾರೆ.

ರಶ್ಮಿಕಾ V/S ರಶ್ಮಿಕಾ

ಕುತೂಹಲದ ಸಂಗತಿ ಎಂದರೆ ಈ ಎರಡೂ ಚಿತ್ರಗಳಲ್ಲಿ ಕನ್ನಡತಿ, ನ್ಯಾಶನಲ್‌ ಕ್ರಶ್‌ ರಶ್ಮಿಕಾ ಮಂದಣ್ಣ ನಾಯಕಿಯಾಗಿ ನಟಿಸುತ್ತಿದ್ದಾರೆ. ಹೀಗಾಗಿ ಬಾಕ್ಸ್‌ ಆಫೀಸ್‌ನಲ್ಲಿ ರಶ್ಮಿಕಾ V/S ರಶ್ಮಿಕಾ ಎನ್ನುವ ಪರಿಸ್ಥಿತಿ ನಿರ್ಮಾಣವಾಗಿತ್ತು. ಈ ಬಗ್ಗೆ ಅವರ ಅಭಿಮಾನಿಗಳು ಅಸಮಾಧಾನ ತೋಡಿಕೊಂಡಿದ್ದರು.‌ ಇದೇ ಮೊದಲ ಬಾರಿ ವಿಕ್ಕಿ ಕೌಶಲ್‌ ಮತ್ತು ರಶ್ಮಿಕಾ ಸಿನಿಮಾವೊಂದರಲ್ಲಿ ಜತೆಯಾಗಿ ನಟಿಸುತ್ತಿದ್ದಾರೆ. ಈ ಹಿಂದೆ ಅವರು ಜಾಹೀರಾತೊಂದರಲ್ಲಿ ಇಟ್ಟಿಗೆ ಕಾಣಿಸಿಕೊಂಡಿದ್ದರು.

ಮೊದಲ ಬಾರಿಗೆ ಐತಿಹಾಸಿಕ ಪಾತ್ರದಲ್ಲಿ ರಶ್ಮಿಕಾ

ಕನ್ನಡ ಸೇರಿ ವಿವಿಧ ಭಾಷೆಗಳ ಹತ್ತಾರು ಸಿನಿಮಾಗಳಲ್ಲಿ ನಟಿಸುತ್ತಿರುವ ರಶ್ಮಿಕಾ ಮಂದಣ್ಣ ಇದೇ ಮೊದಲ ಬಾರಿಗೆ ʼಛಾವಾʼದ ಮೂಲಕ ಐತಿಹಾಸಿಕ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಛತ್ರಪತಿ ಸಂಭಾಜಿ ಅವರ ಪತ್ನಿ ಯೆಸುಭಾಯಿ ಭೋನ್ಸಾಲೆ ಪಾತ್ರಕ್ಕೆ ಬಣ್ಣ ಹಚ್ಚಿದ್ದಾರೆ. ಇದುವರೆಗೆ ಗ್ಲಾಮರ್‌, ಬಬ್ಲಿ ಪಾತ್ರಗಳಲ್ಲೇ ಮೋಡಿ ಮಾಡಿರುವ ಅವರು ವಿಭಿನ್ನ ಅವತಾರದಲ್ಲಿ ಅಭಿಮಾನಿಗಳ ಮುಂದೆ ಬರಲಿದ್ದಾರೆ. ಇನ್ನು ಈ ಸಿನಿಮಾದಲ್ಲಿ ಅಕ್ಷಯ್‌ ಖನ್ನಾ ಅವರು ಮೊಘಲ್‌ ದೊರೆ ಔರಂಗಜೇಬ್‌ ಆಗಿ ತೆರೆ ಮೇಲೆ ಅಬ್ಬರಿಸಲಿದ್ದಾರೆ. ಆಶುತೋಷ್‌ ರಾಣಾ, ದಿವ್ಯಾ ದತ್ತ ಮತ್ತಿತರರು ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ.

ಈ ಸುದ್ದಿಯನ್ನೂ ಓದಿ: Rashmika Mandanna: ಬಾಲಿವುಡ್‌ನ ಮತ್ತೊಂದು ಅವಕಾಶ ಗಿಟ್ಟಿಸಿದ ರಶ್ಮಿಕಾ; ಈ ಬಾರಿ ರಾಷ್ಟ್ರೀಯ ಚಲನಚಿತ್ರ ಪ್ರಶಸ್ತಿ ಪುರಸ್ಕೃತ ನಟನಿಗೆ ಜೋಡಿ