ಕ್ಯಾನ್ಸರ್‌ ಮಹಾಮಾರಿ (Deadly Cancer) ಇನ್ನೊಬ್ಬ ಹಾಲಿವುಡ್‌ (Hollywood) ನಟನನ್ನು ಬಲಿ ತೆಗೆದುಕೊಂಡಿದೆ. ʼವನ್‌ ಟ್ರೀ ಹಿಲ್ʼ (One Tree Hill) ಚಿತ್ರದ ಮೂಲಕ ಖ್ಯಾತಿ ಗಳಿಸಿದ್ದ ಟಿವಿ ಮತ್ತು ರಂಗ ನಟ ಪೌಲ್‌ ಟೀಲ್‌ (Paul Teal) ತನ್ನ 35ನೇ ವಯಸ್ಸಿನಲ್ಲಿ ನಾರ್ತ್‌ ಕರೊಲಿನಾದಲ್ಲಿ ನಿಧನರಾಗಿದ್ದಾರೆ. ಟೀಲ್‌ ಸಾವಿನ ಸುದ್ದಿಯನ್ನು ಆತನ ಕುಟುಂಬಸ್ಥರು ಶುಕ್ರವಾರದಂದು ಖಚಿತಪಡಿಸಿದ್ದಾರೆ. ಟೀಲ್‌ ಕ್ಯಾನ್ಸರ್‌ ಕಾಯಿಲೆಯಿಂದ ಬಳಲುತ್ತಿದ್ದರು. ಟೀಲ್‌ ನ ಸಂಗಾತಿ ಎಮಿಲಿಯಾ ಟೊರೆಲ್ಲೋ (Emilia Torello) ಮಾಧ್ಯಮಗಳಿಗೆ ನೀಡಿರುವ ಮಾಹಿತಿ ಪ್ರಕಾರ ಟೀಲ್‌ 4ನೇ ಹಂತದ ಪ್ಯಾಂಕ್ರಿಯಾಟಿಕ್‌ ಕ್ಯಾನ್ಸರ್‌ ನಿಂದ ಬಳಲುತ್ತಿದ್ದರು. ಟೀಲ್‌ ಗೆ ಕ್ಯಾನ್ಸರ್‌ ಕಾಯಿಲೆ ಇರುವುದು ಕಳೆದ ಎಪ್ರಿಲ್‌ ತಿಂಗಳಿನಲ್ಲಿ ಪತ್ತೆಯಾಗಿತ್ತು.
ತನ್ನ ಸಂಗಾತಿಯ ಅಗಲುವಿಕೆಯ ಕುರಿತಾಗಿ ಟೊರೆಲ್ಲೋ ತನ್ನ ಇನ್‌ ಸ್ಟಾಗ್ರಾಂ ಖಾತೆಯಲ್ಲಿ ಭಾವನಾತ್ಮಕ ಬರಹವೊಂದನ್ನು ಬರೆದುಕೊಂಡಿದ್ದು, ʼನೀನು ನನ್ನ ಜೀವಕ್ಕೆ ಜೀವವಾಗಿದ್ದಿ, ಸದ್ಯದಲ್ಲೇ ನನ್ನ ಪತಿಯಾಗಲಿದ್ದಿ, ನನ್ನ ಗಟ್ಟಿ ಹೃದಯ ನೀನು ಮತ್ತು ನನ್ನ ಭವಿಷ್ಯವೇ ನೀನಾಗಿದ್ದಿ. ಆದರೆ ಇಷ್ಟು ಬೇಗ ಅಗಲುವ ಜರೂರತ್ತು ಏನಿತ್ತು ನಿನಗೆ, ಜೀವನದ ಕೊನೆ ಕ್ಷಣದಲ್ಲಿ ಒಂದು ದೊಡ್ಡ ಯುದ್ಧವನ್ನೇ ನೀನು ಮಾಡಬೇಕಾಯಿತು. ನನ್ನ ಜೀವನದ ಒಂದು ಭಾಗವೇ ನಿನ್ನೊಂದಿಗೆ ಸತ್ತುಹೋಗಿದೆ. ಇನ್ನು ಭವಿಷ್ಯದ ದಿನಗಳಲ್ಲಿ ನಾನು ಸಂತೋಷವಾಗಿರಲು ಹೋರಾಡುತ್ತಲೇ ಇರುತ್ತೇನೆ ; ನೀನು ನಿನ್ನ ಕೊನೆಯ ದಿನಗಳಲ್ಲಿ ಬದುಕುವುದಕ್ಕಾಗಿ ಹೋರಾಡಿದಂತೆ..ʼ ಎಂಬ ಭಾವನಾತ್ಮಕ ಬರಹವನ್ನು ಬರೆದುಕೊಂಡಿದ್ದಾರೆ.
ʼವನ್‌ ಟ್ರೀ ಹಿಲ್ʼನಲ್ಲಿ ಜೋಶ್‌ ಎಂಬ ಪಾತ್ರದಲ್ಲಿ ಪೌಲ್‌ ಟೀಲ್‌ ಅವರು ತಾನು ಕಾಣಿಸಿಕೊಂಡಿದ್ದ ಏಳು ಎಪಿಸೋಡ್‌ ಗಳಲ್ಲಿ ವೀಕ್ಷಕರ ಗಮನ ಸೆಳೆದಿದ್ದರು. ಇದರಲ್ಲಿ ಪೌಲ್‌ ಪಾತ್ರ ಸಲಿಂಗಿ ಎಂದು ಕೊನೆಯಲ್ಲಿ ಬಹಿರಂಗಗೊಳ್ಳುವುದರೊಂದಿಗೆ ಕಥೆಗೊಂದು ತಿರುವು ಸಿಗುತ್ತದೆ. ವನ್‌ ಟ್ರೀ ಹಿಲ್ ನ ಸಹನಟ ಮತ್ತು ನಿರ್ದೇಶಕ ಜಾಯ್‌ ಲೆಂಝ್‌ ತನ್ನ ಮತ್ತ್ ಪೌಲ್‌ ಭೇಟಿ 2006ರಲ್ಲಿ ಹೇಗಾಯ್ತು ಎಂಬುದನ್ನು ಇನ್‌ ಸ್ಟಾದಲ್ಲಿ ಬರೆದುಕೊಳ್ಳುವ ಮೂಲಕ ಮತ್ತೆ ನೆನಪಿಸಿಕೊಂಡಿದ್ದಾರೆ.
ಇದನ್ನೂ ಓದಿ: The Sabarmati Report: ʻದಿ ಸಬರಮತಿ ರಿಪೋರ್ಟ್‌ʼ ಚಿತ್ರಕ್ಕೆ ಮಧ್ಯಪ್ರದೇಶ ಸರ್ಕಾರದಿಂದ ಬೆಂಬಲ; ತೆರಿಗೆ ವಿನಾಯಿತಿ ಘೋಷಣೆ
“2006ರಲ್ಲಿ ಪೌಲ್‌ ಮ್ಯೂಸಿಕಲ್‌ ಪ್ರೊಡಕ್ಷನ್‌ ಒಂದರಲ್ಲಿ ಕೆಲಸ ಮಾಡುತ್ತಿದ್ದಾಗ ನಾವಿಬ್ಬರೂ ಜೊತೆಯಾಗಿ ಕೆಲಸ ಮಾಡಿದ ನೆನಪುಗಳೂ ಈಗಲೂ ನನ್ನಲ್ಲಿ ಹಸಿರಾಗಿದೆ. ನಾಚಿಕೆ ಮತ್ತು ಹಾಸ್ಯ ಸ್ವಾಭಾವದ ವ್ಯಕ್ತಿಯಾಗಿದ್ದ ಪೌಲ್‌ ರಂಗದಲ್ಲಿ ಬೆರೆಯುವಂತಹ ಸ್ವಭಾವದ ವ್ಯಕ್ತಿಯಾಗಿದ್ದ. ಆತನ ನಟನೆ ಎಲ್ಲರನ್ನೂ ಸೆಳೆಯುವಂತಿತ್ತು. ಯಾವುದೇ ಪರಿಸರದಲ್ಲೂ ಕೆಲಸ ಮಾಡಬಲ್ಲ ಕಲೆ ಆತನಿಗೆ ಸಿದ್ಧಿಸಿತ್ತು..” ಎಂದು ಜಾಯ್‌ ತನ್ನ ಗೆಳೆಯನಿಗೆ ಕಣ್ಣೀರ ವಿದಾಯ ನೀಡಿದ್ದಾರೆ.
ʼವನ್‌ ಟ್ರೀ ಹಿಲ್, ʼಡೈನಾಸ್ಟಿʼ ʼದಿ ವರ್ಕಿಂಗ್‌ ಡೆಡ್‌ : ವರ್ಲ್ಡ್‌ ಬಿಯಾಂಡ್‌ʼ ʼಯು.ಎಸ್.ಎಸ್. ಕ್ರಿಸ್ಮಸ್‌ʼ. ʼಫಿಯರ್‌ ಸ್ಟ್ರೀಟ್‌ ಪಾರ್ಟ್‌ -2: 1978ʼ. ʼಡೀಪ್‌ ವಾಟರ್‌ʼ ಮತ್ತು ʼಡಿಸೆಂಡೆಂಟ್ಸ್‌ʼ ಮೊದಲಾದವುಗಳಲ್ಲಿ ಟೀಲ್‌ ಅಭಿನಯಿಸಿದ್ದಾರೆ.
