ಚೆನ್ನೈ: ದಕ್ಷಿಣ ಭಾರತೀಯ ಚಿತ್ರರಂಗದಲ್ಲಿ ಮಿಂಚು ಹರಿಸಿ ಇದೀಗ ಬಾಲಿವುಡ್‌ಗೆ ಕಾಲಿಟ್ಟಿರುವ ರಾಷ್ಟ್ರ ಪ್ರಶಸ್ತಿ ವಿಜೇತ ನಟಿ ಕೀರ್ತಿ ಸುರೇಶ್‌ (Keerthy Suresh) ಸದ್ಯ ಮದುವೆಯ ಕಾರಣಕ್ಕೆ ಸುದ್ದಿಯಲ್ಲಿದ್ದಾರೆ. ಅವರು ತಮ್ಮ ಬಾಲ್ಯ ಸ್ನೇಹಿತ ಆಂಟೋನಿ ತಟ್ಟಿಲ್‌ (Antony Thattil) ಅವರೊಂದಿಗೆ ವೈವಾಹಿಕ ಜೀವನಕ್ಕೆ ಕಾಲಿಡಲಿದ್ದಾರೆ ಎನ್ನುವ ವದಂತಿ ಕೆಲವು ದಿನಗಳಿಂದ ಹರಿದಾಡುತ್ತಿದೆ. ಇದೀಗ ಈ ಬಗ್ಗೆ ಸ್ವತಃ ಕೀರ್ತಿ ಸುರೇಶ್‌ ಅವರೇ ಸ್ಪಷ್ಟನೆ ನೀಡಿದ್ದಾರೆ. ಇನ್ಸ್‌ಸ್ಟಾಗ್ರಾಮ್‌ನಲ್ಲಿ ಪೋಸ್ಟ್‌ ಹಂಚಿಕೊಳ್ಳುವ ಮೂಲಕ ಮದುವೆಯಾಗುತ್ತಿರುವ ಸಂಗತಿಯನ್ನು ಬಹಿರಂಗಪಡಿಸಿದ್ದಾರೆ.
ಆಂಟೋನಿ ಜತೆಗೆ ದೀಪಾವಳಿ ಆಚರಿಸುತ್ತಿರುವ ಫೋಟೊವನ್ನು ಕೀರ್ತಿ ಹಂಚಿಕೊಂಡಿದ್ದಾರೆ. ಇದರಲ್ಲಿ ಇಬ್ಬರ ಮುಖ ಕಾಣಿಸುತ್ತಿಲ್ಲ. ಅದಾಗ್ಯೂ ಅವರು ಬರೆದಿರುವ ಕ್ಯಾಪ್ಶನ್‌ ಅನುಮಾನಕ್ಕೆ ತೆರೆ ಎಳೆದಿದೆ. ʼʼ15 ವರ್ಷ ಮತ್ತು ಕೌಂಟಿಂಗ್‌. ಆಂಟೋನಿ ಮತ್ತು ಕೀರ್ತಿ ಎಂದೆಂದಿಗೂʼʼ ಎಂದು ಬರೆದುಕೊಂಡಿದ್ದಾರೆ. ಆ ಮೂಲಕ ಕೆಲವು ದಿನಗಳಿಂದ ಹರಿದಾಡುತ್ತಿರುವುದು ವದಂತಿಗೆ ಫುಲ್‌ ಸ್ಟಾಪ್‌ ಇಟ್ಟು ವೈವಾಹಿಕ ಜೀವನಕ್ಕೆ ಕಾಲಿಡಲು ಸಜ್ಜಾಗಿದ್ದಾರೆ. ಹಲವು ತಾರೆಯರು ಇದೀಗ ʼಮಹಾನಟಿʼಗೆ ಅಭಿನಂದನೆ ಸಲ್ಲಿಸುತ್ತಿದ್ದಾರೆ.
ಮದುವೆ ಯಾವಾಗ?
ಮೂಲವೊಂದರ ಪ್ರಕಾರ ಡಿ. 11 ಮತ್ತು 12ರಂದು ಗೋವಾದಲ್ಲಿ ಮದುವೆ ನಡೆಯಲಿದೆ. ಇದಕ್ಕಾಗಿ ಕೀರ್ತಿ ಸುರೇಶ್‌ ಈಗಾಗಲೇ ಸಿದ್ದತೆ ಆರಂಭಿಸಿದ್ದಾರಂತೆ. ಈ ಮೂಲಕ 15 ವರ್ಷಗಳ ಪ್ರೀತಿಗೆ ಅಧಿಕೃತ ಮುದ್ರೆ ಒತ್ತಲಿದ್ದಾರೆ. ಆದರೆ ಮದುವೆ ದಿನಾಂಕ ಕುರಿತು ಕೀರ್ತಿ ಸುರೇಶ್‌ ಯಾವುದೇ ಮಾಹಿತಿ ಹಂಚಿಕೊಂಡಿಲ್ಲ.
ಯಾರು ಈ ಆಂಟೋನಿ ತಟ್ಟಿಲ್‌ ?
ಕೀರ್ತಿ ಸುರೇಶ್‌ ಮದುವೆಯಾಗುತ್ತಿರುವ ಆಂಟೋನಿ ತಟ್ಟಿಲ್‌ಗೆ ಯಾವುದೇ ಸಿನಿಮಾ ಹಿನ್ನೆಲೆ ಇಲ್ಲ. ದುಬೈಯಲ್ಲಿ ಉದ್ಯಮಿಯಾಗಿರುವ ಅವರು ತಾಯ್ನಾಡಾದ ಕೊಚ್ಚಿಯಲ್ಲಿ ತಮ್ಮದೇ ಆದ ರೆಸಾರ್ಟ್‌ಗಳನ್ನು ಹೊಂದಿದ್ದಾರೆ. ಚೆನ್ನೈಯಲ್ಲಿಯೂ ಅವರದ್ದೇ 2 ಕಂಪೆನಿಗಳಿವೆ ಎಂದು ವರದಿಯೊಂದು ತಿಳಿಸಿದೆ. ಸುಮಾರು 15 ವರ್ಷಗಳಿಂದಲೂ ಕೀರ್ತಿ ಮತ್ತು ಆಂಟೋನಿ ಮಧ್ಯೆ ಗಾಢ ಗೆಳೆತನವಿದೆ. ಶಾಲಾ ದಿನಗಳಲ್ಲಿಯೇ ಇವರಿಬ್ಬರ ಮಧ್ಯೆ ಸ್ನೇಹ ಸಂಬಂಧ ಏರ್ಪಟ್ಟಿತ್ತು ಎಂದು ಮೂಲಗಳು ತಿಳಿಸಿವೆ.
ಕನ್ನಡ ಹೊರತುಪಡಿಸಿ ದಕ್ಷಿಣ ಭಾರತದ ಉಳಿದೆಲ್ಲ ಚಿತ್ರರಂಗದಲ್ಲಿ ಅಭಿನಯಿಸಿರುವ ಕೀರ್ತಿ ಸುರೇಶ್‌ ಸದ್ಯ ಹಿಂದಿಯ ʼಬೇಬಿ ಜಾನ್‌ʼ, ತಮಿಳಿನ ʼರಿವಾಲ್ವರ್‌ ರಿಟಾʼ, ʼಕನ್ನಿವೆಡಿʼ ಚಿತ್ರಗಳಲ್ಲಿ ನಟಿಸುತ್ತಿದ್ದಾರೆ. ಅವರ ಮೊದಲ ಹಿಂದಿ ಚಿತ್ರ ʼಬೇಬಿ ಜಾನ್‌ʼ ಡಿ. 25ರಂದು ತೆರೆಗೆ ಬರಲಿದ್ದು, ಈಗಾಲೇ ಚಿತ್ರದ ಟೀಸರ್‌, ಹಾಡು ರಿಲೀಸ್‌ ಆಗಿ ಗಮನ ಸೆಳೆದಿದೆ. ಅದರಲ್ಲಿಯೂ ಹಾಡಿನಲ್ಲಿ ಇದೇ ಮೊದಲ ಬಾರಿಗೆ ಕೀರ್ತಿ ಗ್ಲಾಮರ್‌ ಅವತಾರದಲ್ಲಿ ಕಾಣಿಸಿಕೊಂಡು ಅಭಿಮಾನಿಗಳಿಗೆ ಶಾಕ್‌ ನೀಡಿದ್ದಾರೆ. ವರುಣ್‌ ಧವನ್‌ ನಾಯಕನಾಗಿ ನಟಿಸಿರುವ ʼಬೇಬಿ ಜಾನ್‌ʼ ಕಾಲಿವುಡ್‌ ಸೂಪರ್‌ ಸ್ಟಾರ್‌ ವಿಜಯ್‌ (Vijay) ಅಭಿನಯದ ‘ತೆರಿ’ (Theri) ಚಿತ್ರದ ರಿಮೇಕ್‌. ಇದೊಂದು ಮಾಸ್‌ ಚಿತ್ರ ಎನ್ನುವ ಸೂಚನೆ ಟೀಸರ್‌ ಮೂಲಕವೇ ಸಿಕ್ಕಿದ್ದು, ಕಲೀಸ್‌ ಆ್ಯಕ್ಷನ್‌ ಕಟ್‌ ಹೇಳಿದ್ದಾರೆ. ವಾಮಿಕಾ ಗಬ್ಬಿ, ಜಾಕಿ ಶ್ರಾಫ್‌ ಮತ್ತಿತರರು ಚಿತ್ರದ ಮುಖ್ಯ ಪಾತ್ರಗಳಲ್ಲಿ ನಟಿಸಿದ್ದಾರೆ.
ಈ ಸುದ್ದಿಯನ್ನೂ ಓದಿ: Baby John Taster Cut: ಬಾಲಿವುಡ್‌ನಲ್ಲೂ ಮೋಡಿ ಮಾಡಲು ಸೌತ್‌ ಬ್ಯೂಟಿ ಕೀರ್ತಿ ಸುರೇಶ್‌ ಸಜ್ಜು; ‘ಬೇಬಿ ಜಾನ್‌’ ಟೀಸರ್‌ ಔಟ್‌
