ಮುಂಬೈ: ಬಾಲಿವುಡ್‌ನ ಈ ವರ್ಷದ ಬಹು ನಿರೀಕ್ಷಿತ ಚಿತ್ರಗಳಲ್ಲಿ ಒಂದಾದ, ಟ್ರೈಲರ್‌ನಿಂದಲೇ ಗಮನ ಸೆಳೆದ, ಬಹ ತಾರಾಗಣದ ‘ಸಿಂಗಂ ಅಗೇನ್’ (Singham Again)ನ ಮೊದಲ ಹಾಡು ರಿಲೀಸ್‌ ಆಗಿದೆ. ರೋಹಿತ್ ಶೆಟ್ಟಿ (Rohit Shetty) ನಿರ್ದೇಶನದ ಈ ಚಿತ್ರದ ʼಜೈ ಭಜರಂಗ ಬಲಿʼ (Jai Bajrangbali) ಹಾಡು ಇದೀಗ ಇಂಟರ್‌ನೆಟ್‌ನಲ್ಲಿ ಸದ್ದು ಮಾಡುತ್ತಿದೆ. ತಮ್ಮ ಕಾಪ್ ಟೀಮ್ ಜತೆಗೆ ರಾಮಾಯಣ ಕಥೆ ಲಿಂಕ್ ಮಾಡಿ ಟ್ರೈಲರ್‌ನಿಂದಲೇ ಸಂಚಲನ ಮೂಡಿಸಿದ್ದ ರೋಹಿತ್ ಶೆಟ್ಟಿ ಇದೀಗ ಹಾಡಿನ ಮೂಲಕ ಮತ್ತೊಮ್ಮೆ ಮೋಡಿ ಮಾಡಿದ್ದಾರೆ.
ಹನುಮಾನ್‌ ಚಾಲೀಸದಿಂದ ಸ್ಫೂರ್ತಿ ಪಡೆದು ಈ ಹಾಡನ್ನು ರಚಿಸಲಾಗಿದೆ. ರಾಮ, ಹನುಮಂತ ಮತ್ತು ಲಕ್ಷ್ಮಣ ಪಾತ್ರ ನಿರ್ವಹಿಸುತ್ತಿರುವ ಅಜಯ್‌ ದೇವಗನ್‌, ರಣವೀರ್‌ ಸಿಂಗ್‌ ಮತ್ತು ಟೈಗರ್‌ ಶ್ರಾಫ್‌ ನಡುವ ಆತ್ಮೀಯ ಸಂಬಂಧವನ್ನು ಸಾರುವ ಹಾಡು ಇದಾಗಿದೆ. ಹನುಮಂತನನ್ನು ಹೋಲುವ ಪಾತ್ರದಲ್ಲಿ ಮಿಂಚಿರುವ ರಣವೀರ್‌ ಸಿಂಗ್‌ ತಮ್ಮ ಸಾಹಸಭರಿತ ದೃಶ್ಯದಿಂದಲೇ ಗಮನ ಸೆಳೆಯುತ್ತಾರೆ. ರಣವೀರ್‌ ಸಿಂಗ್‌ ಅಜಯ್‌ ದೇವಗನ್‌ ಅನ್ನು ಆತ್ಮೀಯವಾಗಿ ತಬ್ಬಿಕೊಳ್ಳುವುದು ಮತ್ತು ಆಶೀರ್ವಾದ ಪಡೆದುಕೊಳ್ಳುತ್ತಿರುವುದೂ ಹಾಡಿನಲ್ಲಿ ಕಂಡು ಬಂದಿದೆ. ಸಿಂಬ ಪಾತ್ರದಲ್ಲಿರುವ ರಣವೀರ್‌ ಸಿಂಗ್‌ಗೆ ಹನುಮಂತನ ಪಾತ್ರ ಸ್ಫೂರ್ತಿಯಾದರೆ, ಬಾಜಿರಾವ್‌ ಸಿಂಗಂ ಅಜಯ್‌ ದೇವಗನ್‌ ಇಲ್ಲಿ ರಾಮನನ್ನು ಹೋಲುವ ಪಾತ್ರ ನಿರ್ವಹಿಸಿದ್ದಾರೆ. ಎಸಿಪಿ ಸತ್ಯ ಆಗಿ ಕಾಣಿಸಿಕೊಳ್ಳುವ ಟೈಗರ್‌ ಶ್ರಾಫ್‌ ರಾಮಾಯಣದ ಲಕ್ಷ್ಮಣನನ್ನು ಹೋಲುತ್ತಾರೆ. ಸೀತೆಯಾಗಿ ಅವನಿ ಪಾತ್ರದಲ್ಲಿ ಕರೀನಾ ಕಾಣಿಸಿಕೊಂಡಿದ್ದಾರೆ.
ʼಜೈ ಭಜರಂಗ ಬಲಿʼ ಹಾಡಿಗೆ ಅನೇಕ ಗಾಯಕರು ಧ್ವನಿಯಾಗಿದ್ದಾರೆ. ಶ್ರೀಕೃಷ್ಣ, ಕರೀಮುಲ್ಲ, ಅರುಣ್‌ ಕೌಂಡಿನ್ಯ, ಚೈತು ಸಸ್ತಂಗಿ, ಶ್ರೀ ಸಾಯಿ ಚರಣ್‌, ಸುಧಾಂಶು, ರಿತೇಷ್‌ ಜಿ. ರಾವ್‌, ಸಾತ್ವಿಕ್‌ ಜಿ. ರಾವ್‌, ಪೃಧ್ವಿ ಚಂದ್ರ, ಲಕ್ಷ್ಮೀ ನಾಯ್ಡು, ಅದ್ವಿತೀಯ, ಶ್ರುತಿ ರಂಜನಿ, ಪ್ರಣತಿ, ಐಶ್ವರ್ಯಾ ದಾರುರಿ, ಸಾಹಿತಿ ಛಗಂತಿ, ಮನೀಷಾ, ಶ್ರುತಿಕಾ, ಲಕ್ಷ್ಮೀ ಮೇಗನಾ, ನಾದಪ್ರಿಯಾ ಮತ್ತು ವಾಗ್ದೇವಿ ಮತ್ತಿತರರು ಸೇರಿ ಹಾಡಿದ್ದಾರೆ. ತಮನ್‌ ಎಸ್‌. ಸಂಗೀತ ಸಂಯೋಜಿಸಿದ್ದು, ಸ್ವಾನಂದ್‌ ಕಿರ್‌ಕಿರೆ ಸಾಹಿತ್ಯ ರಚಿಸಿದ್ದಾರೆ.
ಅಭಿಮಾನಿಗಳು ಹೇಳಿದ್ದೇನು?
ಅಜಯ್‌ ದೇವಗನ್‌ ಅಭಿಮಾನಿಗಳು ಹಾಡು ಕೇಳಿ ಥ್ರಿಲ್‌ ಆಗಿದ್ದಾರೆ. ʼʼನೀವು ಬಾಲಿವುಡ್‌ ಅನ್ನು ನಿರ್ಲಕ್ಷಿಸಬಹುದು. ಆದರೆ ಅಜಯ್‌ ದೇವಗನ್‌ ಅವರನ್ನು ನಿರ್ಲಕ್ಷಿಸಲು ಸಾಧ್ಯವಿಲ್ಲ. ಕೊನೆಗೂ ಬಾಲಿವುಡ್‌ ದಕ್ಷಿಣ ಭಾರತ ಸಿನಿಮಾದ ಹಾದಿಯಲ್ಲೇ ಹೆಜ್ಜೆ ಹಾಕಲು ನಿರ್ಧರಿಸಿದೆʼʼ ಎಂದು ಒಬ್ಬರು ಬರೆದುಕೊಂಡಿದ್ದಾರೆ. ʼʼಜೈ ಭಜರಂಗ ಬಲಿʼ ಹಾಡು ಅ‍ದ್ಭುತವಾಗಿದೆ. ಹಾಡು ಕೇಳಿ ರೋಮಾಂಚನಗೊಂಡೆʼʼ ಎಂದು ಇನ್ನೊಬ್ಬರು ತಿಳಿಸಿದ್ದಾರೆ. ʼʼಸಿಂಗಂ ಮರಳಿ ಬಂದಿದ್ದಾನೆ. ಈ ಚಿತ್ರ 1000000000 ʼಬಾಹುಬಲಿʼ ಮತ್ತು ದಕ್ಷಿಣ ಭಾರತದ ಚಿತ್ರಗಳನ್ನು ಇದು ಮೀರಿಸಲಿದೆʼʼ ಎಂದು ಕಮೆಂಟ್‌ ಮಾಡಿದ್ದಾರೆ. ಈಗಾಗಲೇ ಹಾಡು ಕೋಟಿಗಟ್ಟಲೆ ವ್ಯೂವ್ಸ್‌ ಪಡೆದುಕೊಂಡಿದೆ.
ಮಗುವಾದ ಬಳಿಕ ತೆರೆ ಕಾಣುತ್ತಿರುವ ರಣವೀರ್‌-ದೀಪಿಕಾ ಮೊದಲ ಚಿತ್ರ
ವಿಶೇಷ ಎಂದರೆ ಈ ಚಿತ್ರದಲ್ಲಿ ದೀಪಿಕಾ ಪಡುಕೋಣೆ ಕೂಡ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದಾರೆ. ಅವರು ಸೆಪ್ಟೆಂಬರ್‌ನಲ್ಲಿ ಮಗುವಿಗೆ ಜನ್ಮ ನೀಡಿದ್ದಾರೆ. ಹೀಗಾಗಿ ಮಗುವಾದ ಬಳಿಕ ತೆರೆ ಕಾಣುತ್ತಿರುವ ರಣವೀರ್‌-ದೀಪಿಕಾ ಅವರ ಮೊದಲ ಚಿತ್ರ ʼಸಿಂಗಂ ಎಗೇನ್‌ʼ ಎನಿಸಿಕೊಂಡಿದೆ. ರೋಹಿತ್ ಶೆಟ್ಟಿ ಅವರ ಕಾಪ್ ಯೂನಿವರ್ಸ್ ಚಲನಚಿತ್ರ ಸರಣಿಯಲ್ಲಿ ಇದು ಐದನೇ ಚಿತ್ರವಾಗಿದೆ. ʼಸಿಂಗಂ ಅಗೇನ್ʼ ಸಿನಿಮಾ ನವೆಂಬರ್ 1ರಂದು ಬಿಡುಗಡೆಯಾಗಲಿದೆ.
ಈ ಸುದ್ದಿಯನ್ನೂ ಓದಿ: Singham Again Trailer: ಬಹುನಿರೀಕ್ಷಿತ ಸಿಂಘಂ ಅಗೇನ್ ಸಿನಿಮಾದ ಟ್ರೇಲರ್ ಬಿಡುಗಡೆ: 5 ನಿಮಿಷದ ವಿಡಿಯೋದಲ್ಲಿ ರಿವೀಲ್ ಆಯ್ತು ಸ್ಟೋರಿ
