ನವದೆಹಲಿ: ಕಳೆದ 24 ಗಂಟೆಗಳ ಅವಧಿಯಲ್ಲಿ ಭಾರತದಲ್ಲಿ 31 ಹೊಸ ಕೋವಿಡ್ ಪ್ರಕರಣಗಳು ದಾಖಲಾಗಿದ್ದು, ಸದ್ಯ ದೇಶದಲ್ಲಿ 249 ಸಕ್ರಿಯ ಪ್ರಕರಣ ಗಳಿವೆ ಎಂದು ಕೇಂದ್ರ ಆರೋಗ್ಯ ಸಚಿವಾಲಯ ತಿಳಿಸಿದೆ.
ಶನಿವಾರ ದೇಶದಲ್ಲಿ 42 ಸೋಂಕಿತ ಪ್ರಕರಣಗಳು ದಾಖಲಾಗಿದ್ದವು. ಯುಎಸ್, ಯುಕೆ, ಫ್ರಾನ್ಸ್, ಮಲೇಷಿಯಾ, ಆಸ್ಟ್ರೇಲಿಯಾ ಮತ್ತು ಫಿಲಿಪ್ಪೀನ್ಸ್ ಸೇರಿದಂತೆ ಹಲವೆಡೆ ಕೋವಿಡ್ ಪ್ರಕರಣಗಳಲ್ಲಿ ಏರಿಕೆಯಾಗುತ್ತಿದೆ.
ಸಾರ್ಸ್ ಕೋವ್ 2 ವೈರಸ್ ಹರಡುತ್ತಿದ್ದು, ವಿಕಸನಗೊಂಡು ಬದಲಾಗುತ್ತಿದೆ ಎಂದು ವಿಶ್ವ ಆರೋಗ್ಯ ಸಂಸ್ಥೆಯ ಮರಿಯಾ ವನ್ ಕೆರಕೊವ್ ತಿಳಿಸಿದ್ದಾರೆ. ಇವರು ಕೋವಿಡ್ ಸಂದರ್ಭದಲ್ಲಿ ವಿಶ್ವ ಆರೋಗ್ಯ ಸಂಸ್ಥೆಯ ತಾಂತ್ರಿಕ ನಾಯಕರಾಗಿ ಕಾರ್ಯನಿರ್ವಹಿಸಿದ್ದರು. ಜಾಗತಿಕವಾಗಿ ಪ್ರಕರಣಗಳ ಏರಿಕೆ ಕುರಿತು ಮಾತನಾಡಿರುವ ಅವರು, ಕೋವಿಡ್ ಬೆದರಿಕೆ ಮುಂದುವರೆದಿದ್ದು, ಎಲ್ಲಾ ದೇಶಗಳಲ್ಲೂ ಪ್ರಸರಣಗೊಳ್ಳುತ್ತಿದೆ ಎಂದಿದ್ದಾರೆ.
ಜಗತ್ತು ಕೋವಿಡ್ನಿಂದ ಮುಂದೆ ಸಾಗಿದೆ. ಜನರು ತಮ್ಮನ್ನು ಸುರಕ್ಷಿತವಾಗಿರಿಸಿಕೊಳ್ಳುವ ಸಾಮರ್ಥ್ಯ ಹೊಂದಿದ್ದಾರೆ. ಆದರೆ, ವೈರಸ್ ಎಲ್ಲೂ ಹೋಗಿಲ್ಲ. ಇದು ಪ್ರಸರಣಗೊಳ್ಳುತ್ತದೆ. ಇದು ಬದಲಾಗುತ್ತಿದ್ದು, ಸಾಕಷ್ಟು ಹಾನಿ ಮಾಡಬಲ್ಲದು. ನಾವು ಕಣ್ಗಾವಲಿನಲ್ಲಿರಿಸಬೇಕು ಎಂದು ಎಚ್ಚರಿಸಿ ದ್ದಾರೆ.
ಆಸ್ಟ್ರೇಲಿಯಾ ಉತ್ತರ ಭೂ ಪ್ರದೇಶದ ರೋಗ ನಿಯಂತ್ರಣ ಕೇಂದ್ರವು ಕಳೆದ ನಾಲ್ಕು ವಾರಗಳಲ್ಲಿ 500ಕ್ಕೂ ಹೆಚ್ಚು ಪ್ರಕರಣಗಳನ್ನು ಪತ್ತೆ ಮಾಡಿದೆ. ಕೋವಿಡ್ ಏರಿಕೆ ಕಂಡ ಹಿನ್ನೆಲೆಯಲ್ಲಿ ಜನರಿಗೆ ಮಾಸ್ಕ್ ಧರಿಸುವುದನ್ನು ಕಡ್ಡಾಯ ಮಾಡಲಾಗಿದೆ.
ಮಲೇಷಿಯಾದಲ್ಲಿ 2,305 ಕೋವಿಡ್ ಪ್ರಕರಣಗಳು ಕಳೆದ ವಾರ ದಾಖಲಾಗಿದ್ದು, ಶೇ 21ರಷ್ಟು ಏರಿಕೆಯಾಗಿವೆ. 21 ಓಮ್ರಿಕಾನ್ ಪ್ರಕರಣಗಳೂ ಇದರಲ್ಲಿ ಸೇರಿವೆ. ಫಿಲಿಪ್ಪೀನ್ಸ್ನಲ್ಲಿ 175 ಹೊಸ ಕೋವಿಡ್ ಪ್ರಕರಣಗಳು ಪತ್ತೆಯಾಗಿವೆ.
