ನವದೆಹಲಿ: ರಾಷ್ಟ್ರೀಯ ಮಹಿಳಾ ಆಯೋಗದ (New NCW Chief) ನೂತನ ಅಧ್ಯಕ್ಷರಾಗಿ ವಿಜಯ ಕಿಶೋರ್ ರಹತ್ಕರ್(Vijaya Kishore Rahatkar) ಅವರನ್ನು ಕೇಂದ್ರ ಸರ್ಕಾರ ಶನಿವಾರ ನೇಮಕ ಮಾಡಿದೆ. ರಾಹತ್ಕರ್ ಅವರು NCW ನ 9 ನೇ ಅಧ್ಯಕ್ಷರಾಗಿದ್ದಾರೆ. ರೇಖಾ ಶರ್ಮಾ ಅವರು ನಿವೃತ್ತರಾಗುತ್ತಿರುವ ಹಿನ್ನೆಲೆ ರಾಹತ್ಕರ್ ಅವರು ಆ ಹುದ್ದೆಯನ್ನು ಅಲಂಕರಿಸಲಿದ್ದಾರೆ. ಇನ್ನು ರಾಹತ್ಕರ್ ಅವರು ರಾಷ್ಟ್ರೀಯ ಮಹಿಳಾ ಆಯೋಗದ ಅಧ್ಯಕ್ಷರಾಗಿ ಮುಂದಿನ ಮೂರು ವರ್ಷ ಕಾರ್ಯನಿರ್ವಹಿಸಲಿದ್ದಾರೆ.
ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಸಚಿವಾಲಯದ ಪ್ರಕಟಣೆಯ ಪ್ರಕಾರ, ರಹತ್ಕರ್ ಅವರ ಅಧಿಕಾರಾವಧಿಯು ತಕ್ಷಣವೇ ಪ್ರಾರಂಭವಾಗುತ್ತದೆ. ಭಾರತದ ಗೆಜೆಟ್‌ನಲ್ಲಿಯೂ ಈ ಪ್ರಕಟಣೆ ಪ್ರಕಟವಾಗಲಿದೆ. ರಹತ್ಕರ್ ನೇಮಕದ ಜೊತೆಗೆ ಸರ್ಕಾರವು NCW ಗೆ ಹೊಸ ಸದಸ್ಯರನ್ನು ನೇಮಕ ಮಾಡಿದೆ. ಡಾ. ಅರ್ಚನಾ ಮಜುಂದಾರ್ ಅವರು ಮೂರು ವರ್ಷಗಳ ಅವಧಿಗೆ ರಾಷ್ಟ್ರೀಯ ಮಹಿಳಾ ಆಯೋಗದ (NCW) ಸದಸ್ಯರಾಗಿ ಅಧಿಕೃತವಾಗಿ ನೇಮಕಗೊಂಡಿದ್ದಾರೆ.
ವಿಜಯ ಕಿಶೋರ್ ರಾಹತ್ಕರ್ ಹಿನ್ನೆಲೆ ಏನು?
ವಿಜಯ ಕಿಶೋರ್ ರಹತ್ಕರ್ ಅವರು ಈ ಹಿಂದೆ 2016 ರಿಂದ 2021 ರವರೆಗೆ ಮಹಾರಾಷ್ಟ್ರ ರಾಜ್ಯ ಮಹಿಳಾ ಆಯೋಗದ ಅಧ್ಯಕ್ಷರಾಗಿ ಸೇವೆ ಸಲ್ಲಿಸಿದ್ದಾರೆ. ಸರ್ಕಾರದ ಅಧಿಸೂಚನೆಯ ಪ್ರಕಾರ, ಅವರ ಅಧಿಕಾರಾವಧಿಯಲ್ಲಿ ಅವರು “ಸಕ್ಷಮಾ” (ಆಸಿಡ್ ದಾಳಿಯಿಂದ ಬದುಕುಳಿದವರಿಗೆ ಬೆಂಬಲ), “ಪ್ರಜ್ವಲ” (ಸ್ವಸಹಾಯ ಗುಂಪುಗಳನ್ನು ಕೇಂದ್ರ ಸರ್ಕಾರದ ಯೋಜನೆಗಳಿಗೆ ಲಿಂಕ್ ಮಾಡುವುದು), ಮತ್ತು “ಸುಹಿತಾ” (ಮಹಿಳೆಯರಿಗಾಗಿ 24×7 ಸಹಾಯವಾಣಿ ಸೇವೆ) ನಂತಹ ಅನೇಕ ಕಾರ್ಯಕ್ರಮಗಳನ್ನು ಪರಿಚಯಿಸಿದ್ದರು.
POCSO, ತ್ರಿವಳಿ ತಲಾಖ್ ವಿರೋಧಿ ಪಡೆ ಮತ್ತು ಮಾನವ ಕಳ್ಳಸಾಗಣೆ ವಿರೋಧಿ ಘಟಕಗಳಂತಹ ವಿಷಯಗಳ ಮೇಲೆ ಕೇಂದ್ರೀಕರಿಸುವ ಕಾನೂನು ಸುಧಾರಣೆಗಳಲ್ಲಿ ಅವರು ಅಭೂತಪೂರ್ವ ಸೇವೆ ಸಲ್ಲಿಸಿದ್ದರು. ರಹತ್ಕರ್ ಅವರು ಡಿಜಿಟಲ್ ಸಾಕ್ಷರತಾ ಕಾರ್ಯಕ್ರಮಗಳನ್ನು ಪರಿಚಯಿಸಿದರು ಮತ್ತು ಮಹಿಳೆಯರ ಸಮಸ್ಯೆಗಳಿಗೆ ಮೀಸಲಾಗಿರುವ “ಸಾದ್” ಎಂಬ ಪ್ರಕಟಣೆಯನ್ನು ಪ್ರಾರಂಭಿಸಿದರು.
ಅದಕ್ಕೂ ಮೊದಲು ಅವರು 2007 ರಿಂದ 2010 ರವರೆಗೆ ಛತ್ರಪತಿ ಸಂಭಾಜಿನಗರದ ಮೇಯರ್ ಆಗಿ ಸೇವೆ ಸಲ್ಲಿಸಿದರು. ಅವರು 2010 ರಿಂದ 2014 ರವರೆಗೆ ಎರಡು ಅವಧಿಗೆ ಬಿಜೆಪಿಯ ಮಹಿಳಾ ಮೋರ್ಚಾ (ಮಹಿಳಾ ವಿಭಾಗ) ದ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿಯಾಗಿದ್ದರು.
ರಾಹತ್ಕರ್ ಅವರು ಪುಣೆ ವಿಶ್ವವಿದ್ಯಾನಿಲಯದಿಂದ ಭೌತಶಾಸ್ತ್ರದಲ್ಲಿ ಸ್ನಾತಕೋತ್ತರ ಪದವಿ ಮತ್ತು ಇತಿಹಾಸದಲ್ಲಿ ಸ್ನಾತಕೋತ್ತರ ಪದವಿಯನ್ನು ಪಡೆದಿದ್ದು, ‘ವಿಧಿಲಿಖಿತ್’ (ಮಹಿಳೆಯರ ಕಾನೂನು ಸಮಸ್ಯೆಗಳ ಕುರಿತು) ಮತ್ತು ‘ಔರಂಗಾಬಾದ್: ಲೀಡಿಂಗ್ ಟು ವೈಡ್ ರೋಡ್ಸ್’ ಸೇರಿದಂತೆ ಹಲವಾರು ಪುಸ್ತಕಗಳನ್ನು ಬರೆದಿದ್ದಾರೆ.
ಮಹಿಳಾ ಸಬಲೀಕರಣಕ್ಕೆ ಅವರ ಕೊಡುಗೆಗಳು ರಾಷ್ಟ್ರೀಯ ಕಾನೂನು ಪ್ರಶಸ್ತಿ ಮತ್ತು ರಾಷ್ಟ್ರೀಯ ಸಾಹಿತ್ಯ ಪರಿಷತ್ತಿನ ಸಾವಿತ್ರಿಬಾಯಿ ಫುಲೆ ಪ್ರಶಸ್ತಿ ಸೇರಿದಂತೆ ಮನ್ನಣೆಯನ್ನು ಗಳಿಸಿವೆ.
Bomb threat: ಹುಸಿಬಾಂಬ್‌ ಬೆದರಿಕೆ; ವಿಮಾನಯಾನ ಸಂಸ್ಥೆಗಳಿಗಾಗುತ್ತಿರುವ ನಷ್ಟ ಎಷ್ಟು ಗೊತ್ತಾ? ಇಲ್ಲಿದೆ ಡಿಟೇಲ್ಸ್‌
