ಜನಪ್ರಿಯ ಹಿನ್ನಲೆ ಗಾಯಕಿ ಚಿನ್ಮಯಿ ಶ್ರೀಪಾದ (Chinmayi Sripaada) ಅವರ ಎರಡು ಹಿಟ್‌ ಚಿತ್ರಗಳ ಸಕ್ಸಸ್‌ ಪೋಸ್ಟರ್‌ ನಲ್ಲಿ ನಟಿ ಸಾಯಿ ಪಲ್ಲವಿ (Sai Pallavi) ಅವರ ಫೊಟೋ ಕಾಣೆಯಾಗಿರುವುದಕ್ಕೆ ಗರಂ ಆಗಿದ್ದಾರೆ. ಈ ಸುದ್ದಿ ಇದೀಗ ಟಾಲಿವುಡ್‌ ಅಂಗಳದಲ್ಲಿ ವೈರಲ್‌ (Viral News) ಆಗುತ್ತಿದೆ. 2018ರ ಬ್ಲಾಕ್‌ ಬಸ್ಟರ್‌ ಚಿತ್ರ ಮಾರಿ-2ರ ರೌಡಿ ಬೇಬಿ ಹಾಡು ಮತ್ತು ಇತ್ತೀಚೆಗೆ ಬಿಡುಗಡೆಗೊಂಡ ಅಮರನ್‌ ಚಿತ್ರದ ಸಕ್ಷಸ್‌ ಪೋಸ್ಟರ್‌ ಗಳಲ್ಲಿ ನಟಿ ಸಾಯಿ ಪಲ್ಲವಿ ಫೊಟೋ ಮಿಸ್ಸಾಗಿದೆ ಎಂಬುದೇ ಗಾಯಕಿ ಚಿನ್ಮಯಿ ಅವರ ಸಿಟ್ಟಿಗೆ ಕಾರಣವಾಗಿದೆ.
ಪ್ರತಿಭಾವಂತ ನಟಿಯಾಗಿರುವ ಸಾಯಿ ಪಲ್ಲವಿ ಅವರು ಇಂತಹ ದೊಡ್ಡ ಪ್ರಾಜೆಕ್ಟ್‌ ಗಳ ಪೋಸ್ಟರ್‌ ನ ಭಾಗವಾಗದೇ ಇರುವುದಕ್ಕೆ ಚಿನ್ಮಯಿ ಅವರು ಆಶ್ಚರ್ಯ ವ್ಯಕ್ತಪಡಿಸಿದ್ದಾರೆ.
ಚಿನ್ಮಯಿ ಹಂಚಿಕೊಂಡಿರುವ ರೌಡಿ ಬೇಬಿ ಪೋಸ್ಟರ್‌ ನಲ್ಲಿ ಪ್ರಮುಖ ಪಾತ್ರದಲ್ಲಿ ನಟಿಸಿರುವ ಧನುಷ್ ಅವರ ಫೊಟೋ ಮಾತ್ರವೇ ಇದೆ. ಗಿಟಾರ್‌ ಬಾರಿಸುತ್ತಿರುವ ಪೋಸ್‌ ನಲ್ಲಿ ಕಪ್ಪು ಧಿರಿಸಿನೊಂದಿಗಿರುವ ಪೋಸ್ಟರ್‌ ಇದಾಗಿದೆ. ಇನ್ನೊಂದೆಡೆ, ಅಮರನ್‌ ಚಿತ್ರದ ಪೋಸ್ಟರ್‌ ನಲ್ಲಿ ಶಿವಕಾರ್ತಿಕೇಯನ್‌ ಅವರು ಭಾರತೀಯ ಸೈನ್ಯದ ಮೇಜರ್‌ ಮುಕುಂದ್‌ ವರದರಾಜನ್‌ ಪಾತ್ರದ ಫೊಟೋ ಮಾತ್ರವೇ ಇದೆ.
ಈ ಪೋಸ್ಟರನ್ನು ಶೇರ್‌ ಮಾಡಿಕೊಂಡಿರುವ ಚಿನ್ಮಯಿ ಅವರು, ʼದಕ್ಷಿಣ ಭಾರತದ ಪ್ರತಿಭಾವಂತ ಮತ್ತು ಪ್ರೀತಿಪಾತ್ರ ನಟಿಯೊಬ್ಬರಿಗೆ ಸಕ್ಸಸ್‌ ಪೋಸ್ಟರ್‌ ನಲ್ಲಿ, ನಟನೊಂದಿಗೆ ಒಟ್ಟಿಗೆ ಕಾಣಿಸಿಕೊಳ್ಳಲು ಜಾಗ ಸಿಗದಿರುವುದು ಆಶ್ಚರ್ಯಕರವಾಗಿದೆʼ ಎಂದು ಬರೆದುಕೊಂಡಿದ್ದಾರೆ.
ಈ ಪೋಸ್ಟ್‌ ʼಎಕ್ಸ್‌ʼನಲ್ಲಿ ಚಿನ್ಮಯಿ ಅವರು ಶೇರ್‌ ಮಾಡುತ್ತಿದ್ದಂತೆ ಸೌತ್‌ ಸಿನಿ ಪ್ರೇಮಿಗಳ ನಡುವೆ ಹಲ್‌ ಚಲ್‌ ಎಬ್ಬಿಸಿದ್ದು, ಚಿನ್ಮಯಿ ಅವರ ಈ ಆಪಾದನೆಗೆ ಕೆಲವರು ಖಡಕ್ಕಾಗಿ ಪ್ರತಿಕ್ರಿಯಿಸಿದ್ದು, ರೌಡಿ ಬೇಬಿ ಹಾಡಿನ ಪೋಸ್ಟರನ್ನು ಅಭಿಮಾನಿಗಳು ಸಿದ್ಧಪಡಿಸಿದ್ದು ಇದು ಚಿತ್ರ ನಿರ್ಮಾಣ ಸಂಸ್ಥೆಯ ಅಧಿಕೃತ ಪೋಸ್ಟರ್‌ ಅಲ್ಲ, ಎಂದು ಪ್ರತಿಕ್ರಿಯಿಸಿದ್ದಾರೆ. ಮಾತ್ರವಲ್ಲದೇ ಧನುಷ್ ಮತ್ತು ಸಾಯಿ ಪಲ್ಲವಿ ಜತೆಯಾಗಿರುವ ಇದೇ ಹಾಡಿನ ಅಧಿಕೃತ ಪೋಸ್ಟರನ್ನೂ ಸಹ ನೆಟ್ಟಿಗರು ಶೇರ್‌ ಮಾಡುವ ಮೂಲಕ ಚಿನ್ಮಯಿ ಅವರ ಆಪಾದನೆಗೆ ತಿರುಗೇಟು ನೀಡಿದ್ದಾರೆ.
ಇದನ್ನೂ ಓದಿ: Viral Video: ಪಬ್ಲಿಕ್‌ ಪ್ಲೇಸ್‌ನಲ್ಲಿ ಟವಲ್‌ ಡ್ಯಾನ್ಸ್‌!; ಸಭ್ಯತೆಯ ಎಲ್ಲೆ ಮೀರುತ್ತಿದ್ದಾರೆಯೇ ಕೋಲ್ಕತಾ ಮಾಡೆಲ್‌ಗಳು?
ನಿಜಾಂಶವನ್ನು ಪರೀಕ್ಷಿಸದೆ ಸಾಮಾಜಿಕ ಜಾಲತಾಣಗಳಲ್ಲಿ ಪೋಸ್ಟ್‌ ಮಾಡಿರು ಚಿನ್ಮಯಿ ಅವರ ದುಡುಕು ಬುದ್ಧಿಯನ್ನೂ ಸಹ ಕೆಲವರು ಟೀಕಿಸಿದ್ದಾರೆ. “ನೀವಾಗಿ ನೀವೇ ಅಪಹಾಸ್ಯಕ್ಕೊಳಗಾಗುವ ಮೊದಲು ಫ್ಯಾಕ್ಟ್‌ ಚೆಕ್‌ ಮಾಡಿಕೊಳ್ಳಿʼ ಎಂದು ಒಬ್ಬರು ಕಮೆಂಟ್‌ ಮಾಡಿದ್ದಾರೆ.
ನೆಟ್ಟಿಗರ ಈ ರೀತಿಯ ಪ್ರತಿಕ್ರಿಯೆಗಳಿಗೆ ಮರು ಪ್ರತಿಕ್ರಿಯೆ ನೀಡಿರುವ ಚಿನ್ಮಯಿ ಅವರು, ʼನಾನು ಈ ಪೋಸ್ಟರ್‌ ಗಳನ್ನು ಮೊದಲಿಗೆ ಚಿತ್ರತಂಡದ ಅಧಿಕೃತ ಅಕೌಂಟ್‌ ಗಳಲ್ಲೇ ನೋಡಿದೆ. ಈ ಫೊಟೋ ಈಗಲೂ ಟ್ವಿಟ್ಟರ್‌ ನಲ್ಲಿದೆ ಮತ್ತು ಎಲ್ಲೆಡೆ ಶೇರ್‌ ಆಗುತ್ತಿದೆ – ಇದನ್ನು ನೋಡಿದ ಅನೇಕರು, ʼಸಾಯಿ ಪಲ್ಲವಿ ಯಾಕೆ ಕಾಣಿಸುತ್ತಿಲ್ಲʼ ಎಂದು ಮಾತನಾಡಿಕೊಳ್ಳುತ್ತಿದ್ದಾರೆ. ಇದು ಆ ನಂತರ ಅಪ್ಡೇಟ್‌ ಆದದ್ದಿರಬೇಕು. ಹಾಗೆಂದ ಮಾತ್ರಕ್ಕೆ ಇದು ಸಾಯಿ ಪಲ್ಲವಿ ಅವರ ಪ್ರತಿಭೆ ಮೇಲೆ ಯಾವ ವ್ಯತ್ಯಾಸವನ್ನೂ ಬೀರುವುದಿಲ್ಲ..ʼ ಎಂದು ಬರೆದುಕೊಂಡಿದ್ದಾರೆ.
“ನೀವು ಅವಕಾಶ ಸಿಕ್ಕಾಗಲೆಲ್ಲಾ ಇನ್ನೊಬ್ಬರನ್ನು, ಅದರಲ್ಲೂ ಪುರುಷರನ್ನು ಹೀಯಾಳಿಸಲು ಕಾಯುತ್ತಿರುತ್ತೀರಿ” ಎಂದು ಇನ್ನೊಬ್ಬರು ಕಮೆಂಟ್‌ ಮಾಡಿದ್ದಾರೆ. ಗಾಯಕಿ ಚಿನ್ಮಯಿ ಅವರು ಸಾಮಾಜಿಕ ಜಾಲತಾಣದಲ್ಲಿ ಸಕ್ರಿಯರಾಗಿದ್ದಾರೆ ಮತ್ತು ಹಲವಾರು ವಿಚಾರಗಳಿಗೆ ಸಂಬಂಧಿಸಿದಂತೆ ತಮ್ಮ ಅಭಿಪ್ರಾಯಗಳಿಂದಾಗಿ ಅವರು ಸುದ್ದಿಯಲ್ಲಿರುತ್ತಾರೆ. ಈ ಹಿಂದೆ ಮಿ ಟೂ ಪ್ರಕರಣಕ್ಕೆ ಸಂಬಂಧಿಸಿದಂತೆ ಆಕೆ ಮಾತನಾಡಿದ್ದಾಗ ಬಹಳಷ್ಟು ಟೀಕೆ ಮತ್ತು ನಿಂದನೆಗಳನ್ನು ಚಿನ್ಮಯಿ ಎದುರಿಸಿದ್ದರು.
