ಢಾಕಾ: ಏನಿವತ್ತು ಎಲ್ಲಾ ಸೂಪರ್ ಸ್ಟಂಟ್ ಸುದ್ದಿಗಳೇ ಸಿಗ್ತಾ ಇವೆ ಅಂದ್ಕೋಬೇಡಿ. ಮೀರತ್ ನಲ್ಲೊಬ್ಬ ಮದುಮಗ ಹೈವೇನಲ್ಲೇ ಸೂಪರ್ ಚೇಸ್ ಮಾಡಿ ತನ್ನ ನೋಟಿನ ಮಾಲೆಯನ್ನು ಎಗರಿಸಿದವನನ್ನು ಹಿಡಿದು ಸುದ್ದಿಯಾದ್ರೆ, ಇನ್ನು ನಮ್ಮ ನೆರೆ ರಾಷ್ಟ್ರ ಬಾಂಗ್ಲಾದೇಶದಲ್ಲಿ (Bangladesh) ಮಹಿಳೆಯೊಬ್ಬಳು ಚಲಿಸುತ್ತಿರುವ ರೈಲಿನ ಮೇಲೆ ನೃತ್ಯ ಮಾಡುತ್ತಿರುವ ವಿಡಿಯೋ ಒಂದು ಇದೀಗ ಎಲ್ಲೆಡೆ ಸಿಕ್ಕಾಪಟ್ಟೆ ವೈರಲ್ (Viral Video) ಆಗ್ತಿದೆ ಮಾತ್ರವಲ್ಲದೇ ಜಿಟಿಎ-VI (Grand Theft Auto VI) ರಿಲೀಸ್ ಗೆ ಮೊದಲೇ ಬಾಂಗ್ಲಾ ಲೇಡಿಯ ಈ ಟ್ರೈನ್ ಟಾಪ್ ಡ್ಯಾನ್ಸ್ ಸ್ಟಂಟ್ ಸಖತ್ತಾಗಿದೆ ಎಂದು ನೆಟ್ಟಿಗರು ತರಹೇವಾರಿ ಕಮೆಂಟ್ ಹಾಕ್ತಿದ್ದಾರೆ.
ಈ ಮಹಿಳೆ ಚಲಿಸುತ್ತಿರುವ ರೈಲಿನಲ್ಲಿ ಒಂದು ಬೋಗಿಯ ಟಾಪ್ ನಿಂದ ಇನ್ನೊಂದು ಬೋಗಿಯ ಟಾಪ್ ಗೆ ನೆಗೆಯುತ್ತಾ, ಗ್ಯಾಪ್ ಸಿಕ್ಕಾಗ ಸ್ವಲ್ಪ ಡ್ಯಾನ್ಸ್ ಮಾಡುತ್ತಾ ಇರುವ ವಿಡಿಯೋ ಇದೀಗ ಸೋಷಿಯಲ್ ಮೀಡಿಯಾದಲ್ಲಿ ಟ್ರೆಂಡಿಂಗ್ ಆಗಿದೆ.
ಈ ಡೇಂಜರಸ್ ಸ್ಟಂಟ್ ಅನ್ನು ಇದೀಗ ನೆಟ್ಟಿಗರು ‘ಸಬ್-ವೇ ಸರ್ಫರ್ಸ್’ (Subway Surfers) ಗೇಮ್ ನಲ್ಲಿ ಬರುವ ಜೇಕ್ ಪಾತ್ರಕ್ಕೆ ಹೋಲಿಸುತ್ತಿದ್ದಾರೆ. ಆ ಗೇಮ್ ನಲ್ಲಿ ಜೇಕ್ ರೈಲಿನ ಟಾಪ್ ಮೇಲಿಂದ ಜಿಗಿಯುತ್ತಾ ನಾಣ್ಯಗಳನ್ನು ಹಾಗೂ ಬಹುಮಾನಗಳನ್ನು ಸಂಗ್ರಹಿಸುತ್ತಿರುತ್ತಾನೆ.
ಈ ವಿಡಿಯೋದಲ್ಲಿರುವಂತೆ ಬಾಂಗ್ಲಾ ಮಹಿಳೆಯೊಬ್ಬಳು ನಿಧಾನವಾಗಿ ಚಲಿಸುತ್ತಿರುವ ರೈಲಿನ ಟಾಪ್ ಮೇಲೆ ಓಡುತ್ತಾ, ಬೋಗಿಗಳ ನಡುವೆ ಚಂಗನೆ ಜಿಗಿಯುತ್ತಾ ಬಳಿಕ ಅಲ್ಲೇ ಸ್ವಲ್ಪ ಮೈ ಅಲ್ಲಾಡಿಸಿ ಡ್ಯಾನ್ಸ್ ಮಾಡುತ್ತಾ.., ಒಟ್ಟಿನಲ್ಲಿ ಯಾವುದೇ ಭಯವಿಲ್ಲದೆ ವರ್ತಿಸುತ್ತಿರುವುದು ರೆಕಾರ್ಡ್ ಆಗಿದೆ.
ಇದನ್ನೂ ಓದಿ: Viral Video:ಎಲ್ಲಪ್ಪಾ ಪಾಕ್‌ ದಿವಾಳಿಯಾಗಿರೋದು? 35 ಅಡಿ ಉದ್ದದ ನೋಟಿನ ಮಾಲೆ ಹಾಕಿಕೊಂಡು ವರ ಮಿಂಚಿಂಗೋ.. ಮಿಂಚಿಂಗ್..!
ಒಟ್ಟಿನಲ್ಲಿ ಈಕೆ ಅಲ್ಲಿದ್ದವರ ಹಾಗೂ ವಿಡಿಯೋ ಮೂಲಕ ಸಾಮಾಜಿಕ ಮಾಧ್ಯಮಗಳ ಗಮನಸೆಳೆಯಲೆಂದೇ ಈ ರೀತಿ ವರ್ತಿಸಿರುವುದು ಮೇಲ್ನೋಟಕ್ಕೆ ಕಂಡುಬರುತ್ತದೆ. ಇದೀಗ ಈ ವಿಡಿಯೋವನ್ನು ನೆಟ್ಟಿಗರು ತಮ್ಮ ತಮ್ಮ ಗ್ರೂಪುಗಳಲ್ಲಿ ಶೇರ್ ಮಾಡ್ಕೊಂಡು ಸಖತ್ ಎಂಜಾಯ್ ಮಾಡ್ತಿದ್ದಾರೆ. ಈ ವಿಡಿಯೋ ಇದೀಗ ಮಿಶ್ರ ಪ್ರತಿಕ್ರಿಯೆಗಳನ್ನು ಪಡೆದುಕೊಳ್ಳುತ್ತಿದ್ದು, ಕೆಲವರು ಈ ಮಹಿಳೆಯ ಧೈರ್ಯವನ್ನು ಮೆಚ್ಚಿಕೊಂಡಿದ್ದರೆ, ಇನ್ನು ಕೆಲವರು ಈಕೆಯ ಹುಚ್ಚು ಸಾಹಸವನ್ನು ಟೀಕಿಸಿದ್ದಾರೆ. ಇನ್ನು ಕೆಲವರು ಈ ವಿಡಿಯೋಗೆ ಹಾಸ್ಯಭರಿತ ಕಮೆಂಟ್ ಮಾಡ್ತಿದ್ದಾರೆ.
“ಇದು ಸಖತ್ತಾಗಿದೆ! ಸಬ್ ವೇ ಸರ್ಫರ್ಸ್ ಇದೀಗ ಇನ್ನಷ್ಟು ಇಂಟರೆಸ್ಟಿಂಗ್ ಆಗಿರ್ತದೆ” – ಎಂದು ಒಬ್ಬರ ಕಮೆಂಟ್ ಆಗಿದ್ದರೆ, ಇನ್ನೊಬ್ಬರು, ‘ಜಿಟಿಎ 6ಗಿಂತಲೂ ಮುಂಚೆ ನಮಗೀಗ ಬಾಂಗ್ಲಾದೇಶೀ ಸಬ್ ವೇ ಸರ್ಫರ್ ಸಿಕ್ಕಿದ್ದಾರೆ’ ಎಂದು ಹಾಸ್ಯಭರಿತ ಕಮೆಂಟ್ ಮಾಡಿದ್ದಾರೆ. “ಈಕೆ ಸಿಕ್ಕಾಪಟ್ಟೆ ಖತರ್ನಾಕ್ ಅಗಿದ್ದಾಳೆ” ಎಂದು ಇನ್ನೊಬ್ಬರ ಕಮೆಂಟ್.
ಇನ್ನು, ಕೆಲವೊಂದು ಗೆಮರ್ ಗಳು ಈ ವಿಡಿಯೋವನ್ನು ಸಬ್ ವೇ ಸರ್ಫರ್ಸ್ ಜೊತೆ ಹೋಲಿಕೆ ಮಾಡಿ ಕಮೆಂಟ್ ಮಾಡುತ್ತಿದ್ದು, “ಕಾಯಿನ್ಸ್ ಎಲ್ಲಿದೆ” ಎಂದು ಒಬ್ಬ ಕೇಳಿದರೆ, ಇನ್ನೊಬ್ಬ “ಈಕೆಯ ಹಿಂದೆ ಪೊಲೀಸರೂ ಇಲ್ಲ” ಎಂದು ಕಮೆಂಟ್ ಮಾಡಿ ಖಷಿ ಪಡ್ತಿದ್ದಾರೆ. ಒಟ್ಟಿನಲ್ಲಿ ಬಾಂಗ್ಲಾ ಲೇಡಿಯ ಈ ಖತರ್ನಾಕ್ ‘ಮೂವಿಂಗ್ ಟ್ರೈನ್ ಸ್ಟಂಟ್-ಡ್ಯಾನ್ಸ್’ ಸದ್ಯಕ್ಕೆ ನೆಟ್ಟಿಗರ ಕಣ್ಣಗಲವಾಗುವಂತೆ ಮಾಡಿದೆ!
