ದೇವರ ರೂಪ ತಾಳಿದ ಅಪ್ಪು

ಪವರ್‌ಸ್ಟಾರ್ ಪುನೀತ್ ರಾಜ್‌ಕುಮಾರ್ ಅಭಿನಯದ ಕೊನೆಯ ಚಿತ್ರ ಲಕ್ಕಿ ಮ್ಯಾನ್ ಸೆಪ್ಟೆಂಬರ್ ೯ರಂದು ತೆರೆಗೆ ಬರಲಿದೆ. ಹಾಗಾಗಿ ಕರುನಾಡಿನ ಜನತೆ ಬೆಳ್ಳಿತೆರೆಯಲ್ಲಿ ಪ್ರೀತಿಯ ಅಪ್ಪುವನ್ನು ಕಣ್ತುಂಬಿಕೊಳ್ಳಲು ಕಾತರರಾಗಿದ್ದಾರೆ. ಸದ್ಯ ಚಿತ್ರದ ಟ್ರೇಲರ್ ಹಾಗೂ ಹಾಡು ಬಿಡುಗಡೆಯಾಗಿದೆ.

ಇದನ್ನು ಕಣ್ತುಂಬಿಕೊಂಡ ಅಭಿಮಾನಿಗಳು ಸಂತಸಗೊಂಡಿದ್ದಾರೆ. ದೇವರ ರೂಪದಲ್ಲಿ ಕಾಣಿಸಿಕೊಂಡಿರುವ ಅಪ್ಪು ಕಂಡು ಅಭಿಮಾನಿಗಳು ಸಂತಸ ಗೊಂಡಿದ್ದಾರೆ, ಅಪ್ಪು ನಮ್ಮೊಂದಿಗಿಲ್ಲ ಎಂಬುದನ್ನು ನೆನೆದು ಕಂಬನಿ ಮಿಡಿದಿದ್ದಾರೆ. ಲಕ್ಕಿ ಮ್ಯಾನ್ ಚಿತ್ರದ ಟ್ರೇಲರನ್ನು ಕಿಚ್ಚ ಸುದೀಪ್ ಬಿಡುಗಡೆ ಮಾಡಿ ಶುಭಕೋರಿದರು. ಎಲ್ಲರೂ ಪ್ರೀತಿಯಿಂದ ಲಕ್ಕಿಮ್ಯಾನ್ ಸಿನಿಮಾ ನೋಡಿ. ಕೆಲವೊಂದು ಸಮಯ, ಸಂದರ್ಭಗಳು ಮತ್ತೊಮ್ಮೆ ಬರುವುದಿಲ್ಲ. ಮತ್ತೆ ಬೇಕಂದರೂ ಸಿಗುವುಲ್ಲ.

ಈ ಸಿನಿಮಾನವನ್ನು ಎಲ್ಲರೂ ಮನತುಂಬಿ ನೋಡಿ ಎಂದು ಸುದೀಪ್ ಹೇಳಿದರು. ಅಪ್ಪು ಹಾಗೂ ಪ್ರಭುದೇವ ಒಟ್ಟಿಗೆ ಹೆಜ್ಜೆ ಹಾಕಿರುವ ಅದ್ಭುತ ಹಾಡನ್ನು ರಾಘಣ್ಣ ಬಿಡುಗಡೆ ಮಾಡಿದರು. ನಾನು ಅಪ್ಪು ಅವರ ಜತೆ ಮೂರು ಚಿತ್ರಗಳಲ್ಲಿ ಅಭಿನಯಿಸಿ ದ್ದೇನೆ. ಈ ಚಿತ್ರ ನನ್ನ ಜೀವನ ದಲ್ಲೇ ಬಹಳ ವಿಶೇಷವಾದದು ಎಂದು ನಟ ಕೃಷ್ಣ ಹೇಳಿದರು. ಸಂಗೀತಾ ಶೃಂಗೇರಿ ಹಾಗೂ ರೋಷಿನಿ ಪ್ರಕಾಶ್ ನಾಯಕಿಯರಾಗಿ ನಟಿಸಿದ್ದಾರೆ.

ರಂಗಾಯಣ ರಘು, ಸಾಧುಕೋಕಿಲ ಮುಂತಾದವರು ಚಿತ್ರದಲ್ಲಿ ಅಭಿನಯಿಸಿ ದ್ದಾರೆ. ಧನಂಜಯ ಚಿತ್ರದ ಹಾಡುಗಳಿಗೆ ಸಾಹಿತ್ಯ ರಚಿಸಿದ್ದಾರೆ. ಜೀವಾ ಶಂಕರ್ ಛಾಯಾಗ್ರಹಣ ನಿರ್ವಹಿಸಿದ್ದಾರೆ. ಪರ್ಸಾ ಪಿಕ್ಚರ‍್ಸ್ ಲಾಂಛನದಲ್ಲಿ ಪಿ.ಆರ್.ಮೀನಾಕ್ಷಿ ಸುಂದರಮ್ ಹಾಗೂ ಸುಂದರ ಕಾಮರಾಜ್ ಚಿತ್ರ ನಿರ್ಮಾಣ ಮಾಡಿದ್ದಾರೆ. ವಿಜಯ್ ಮತ್ತು ವಿಕ್ಕಿ ಅವರ ಸಂಗೀತ ಸಂಯೋಜನೆ ಮಾಡಿದ್ದಾರೆ.

***

ನಾನಿಲ್ಲಿ ನಿರ್ದೇಶಕನಾಗಿ ಗುರುತಿಸಿಕೊಳ್ಳಲು ಪುನೀತ್ ರಾಜ್‌ಕುಮಾರ್ ಅವರೇ ಕಾರಣ. ನನ್ನ ಮೊದಲ ಚಿತ್ರವನ್ನು ನನ್ನ
ಮಾತೃಭಾಷೆಯಲ್ಲೇ ನಿರ್ದೇಶನ ಮಾಡಿದ್ದೇನೆ. ಈ ಚಿತ್ರದಲ್ಲಿ ಅಪ್ಪು ಬಹಳ ಮುಖ್ಯವಾದ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಚಿತ್ರದ ಕಥೆ ಕೇಳಿ ಅಪ್ಪು ಮೆಚ್ಚಿದ್ದರು. ಲಕ್ಕಿ ಮ್ಯಾನ್ ಟೈಟಲ್ ತುಂಬಾ ಸೂಕ್ತ ಎಂದು ಅವರೇ ಹೇಳಿದ್ದರು. ಹಾಗಾಗಿ ಅದೇ ಶೀರ್ಷಿಕೆ ಅಂತಿಮಗೊಳಿಸಿದೆವು. ಅಪ್ಪು ಅವರ ಜತೆ ಕೆಲಸ ಮಾಡಿದ್ದು ಜೀವನದಲ್ಲಿ ಮರೆಯಲು ಸಾಧ್ಯವಿಲ್ಲ. ಈ ಚಿತ್ರವನ್ನು ನಾವು ಪುನೀತ್ ರಾಜ್ ಕುಮಾರ್ ಅವರಿಗೆ ಅರ್ಪಿಸುತ್ತಿದ್ದೇವೆ.
-ನಾಗೇಂದ್ರ ಪ್ರಸಾದ್ ನಿರ್ದೇಶಕ

ಅಪ್ಪು ನನ್ನ ಬಳಿ ನಾಲ್ಕು ಬಯಕೆಗಳನ್ನು ಹೇಳಿಕೊಂಡಿದ್ದ. ಅಪ್ಪಾಜಿ ಜತೆ ಅಭಿನಯಿಸ ಬೇಕು, ಮಣಿರತ್ನಂ ನಿರ್ದೇಶನದ ಚಿತ್ರದಲ್ಲಿ ನಟಿಸಬೇಕು. ನನ್ನ ಚಿತ್ರಕ್ಕೆ ರೆಹಮಾನ್ ಅವರು ಮ್ಯೂಸಿಕ್ ಕಂಪೋಸ್ ಮಾಡಬೇಕು ಹಾಗೂ ಪ್ರಭುದೇವ ಜತೆ ಡ್ಯಾನ್ಸ್
ಮಾಡ ಬೇಕು ಎಂದು. ಅಪ್ಪು ಚಿಕ್ಕವನಿದ್ದಾಗ ಅಪ್ಪಾಜಿಯ ಜತೆ ಅಭಿನಯಿಸಿದ, ದೊಡ್ಡವನಾದ ಮೇಲೆಯೂ ನಟಿಸಬೇಕು
ಎನ್ನುವ ಆಸೆಯಿತ್ತು. ಅದಕ್ಕೆ ಕಾಲ ಕೂಡಿಬರಲಿಲ್ಲ. ಪ್ರಭುದೇವ ಜತೆ ನಟಿಸಿ ಕೊನೆಯ ಆಸೆಯನ್ನು ಆತ ಈಡೇರಿಸಿಕೊಂಡು ಬಿಟ್ಟ. ಈ ಹಾಡು ನನ್ನ ಮನೆ ಆಲ್ಬಂನಲ್ಲಿ ಸದಾ ಇರುತ್ತದೆ.
-ರಾಘವೇಂದ್ರ ರಾಜ್‌ಕುಮಾರ್