ಶಾರ್ಜಾ: ಮಾಡು-ಮಡಿ ರೋಚಕ ಹೋರಾಟದಲ್ಲಿ ಬಾಂಗ್ಲಾದೇಶವನ್ನು 3 ರನ್ನುಗಳಿಂದ ಮಣಿಸಿದ ಹಾಲಿ ಚಾಂಪಿಯನ್‌ ವೆಸ್ಟ್‌ ಇಂಡೀಸ್‌ ಅಂಕದ ಖಾತೆ ತೆರೆದಿದೆ. ಬಾಂಗ್ಲಾ ಕೂಟದಿಂದ ಬಹುತೇಕ ಹೊರಬಿದ್ದಿದೆ.
ಮೊದಲು ಬ್ಯಾಟಿಂಗ್‌ ನಡೆಸಿದ ವೆಸ್ಟ್‌ ಇಂಡೀಸ್‌ 20 ಓವರ್‌ಗಳಲ್ಲಿ 7 ವಿಕೆಟಿಗೆ 142 ರನ್‌ ಗಳಿಸಿ ದರೆ, ಬಾಂಗ್ಲಾ 20 ಓವರ್‌ಗಳಲ್ಲಿ 5 ವಿಕೆಟಿಗೆ 139 ರನ್‌ ಮಾಡಿ ಶರಣಾಯಿತು. ಬಾಂಗ್ಲಾ ದಕ್ಷಿಣ ಆಫ್ರಿಕಾ ಹಾಗೂ ಆಸ್ಟ್ರೇಲಿಯದ ಕಠಿಣ ಸವಾಲನ್ನು ಎದುರಿಸಬೇಕಿದೆ.
ಲಿಟನ್‌ ದಾಸ್‌ ಮತ್ತು ನಾಯಕ ಮಹಮದುಲ್ಲ ಉತ್ತಮ ಹೋರಾಟ ನೀಡಿ ಬಾಂಗ್ಲಾದ ಗೆಲುವಿನ ಆಸೆ ಚಿಗುರಿಸಿದರು. ಆದರೆ ಅಂತಿಮ 3 ಓವರ್‌ಗಳಿಂದ 30 ರನ್‌, 2 ಓವರ್‌ಗಳಿಂದ 22 ರನ್‌ ತೆಗೆಯುವ ಒತ್ತಡವನ್ನು ನಿಭಾಯಿಸಲು ವಿಫ‌ಲರಾದರು.
ರಸೆಲ್‌ ಪಾಲಾದ ಅಂತಿಮ ಓವರ್‌ನಲ್ಲಿ 13 ರನ್‌ ಸವಾಲು ಎದುರಾ ಯಿತು. ಅಂತಿಮ ಎಸೆತದಲ್ಲಿ ಬೌಂಡರಿ ಬೇಕಿತ್ತು. ಸ್ವತಃ ಕಪ್ತಾನ ಮಹಮದುಲ್ಲ
ಕ್ರೀಸಿನಲ್ಲಿದ್ದರು. ಯಾವುದೇ ರನ್‌ ಬರಲಿಲ್ಲ. ಕೆರಿಬಿಯನ್ನರು ಮೊದಲ ಸಲ ಗೆಲು ವಿನ ಖುಷಿಯನ್ನಾಚರಿಸಿದರು. ದಾಸ್‌ ಸರ್ವಾಧಿಕ 44 ರನ್‌ (43 ಎಸೆತ) ಬಾರಿಸಿದರು.
ಸತತ 3ನೇ ಸಲವೂ ಮೊದಲು ಬ್ಯಾಟಿಂಗ್‌ ಅವಕಾಶ ಪಡೆದ ವೆಸ್ಟ್‌ ಇಂಡೀಸ್‌ ಮೊದಲ 14 ಓವರ್‌ಗಳಲ್ಲಿ ಒಟ್ಟುಗೂಡಿದ್ದು ಬರೀ 70 ರನ್‌. ಆದರೆ ಅಂತಿಮ 6 ಓವರ್‌ಗಳಲ್ಲಿ ವಿಂಡೀಸ್ ಸಿಡಿದು ನಿಂತು 72 ರನ್‌ ಪೇರಿ ಸಿತು. ಇದರಲ್ಲಿ 19 ರನ್‌ ಮುಸ್ತಫಿಜುರ್‌ ಅವರ ಅಂತಿಮ ಓವರ್‌ನ ಅಂತಿಮ 5 ಎಸೆತಗಳಲ್ಲಿ ಬಂತು. ಇದರಲ್ಲಿ ಹೋಲ್ಡರ್‌ 2 ಸಿಕ್ಸರ್‌, ಪೊಲಾರ್ಡ್‌ ಒಂದು ಸಿಕ್ಸರ್‌ ಸಿಡಿಸಿದರು.
ವಿಂಡೀಸರು ಸ್ಪಿನ್ನಿಗೆ ಆಡುವುದಿಲ್ಲ ಎಂಬುದನ್ನು ಅರಿತ ನಾಯಕ ಮಹಮದುಲ್ಲ ಆರಂಭದಲ್ಲೇ ಚೆಂಡನ್ನು ಆಫ್ಸ್ಪಿನ್ನರ್‌ ಮೆಹೆದಿ ಹಸನ್‌ ಕೈಗಿತ್ತಿದ್ದರು. ಈ ಯೋಜನೆ ಯಶಸ್ಸು ಕಂಡಿತು. 5ನೇ ಓವರ್‌ನಲ್ಲಿ ಮತ್ತೆ ಹಸನ್‌ ಅವರನ್ನು ದಾಳಿಗೆ ಇಳಿಸಲಾಯಿತು. ಇದಕ್ಕೂ ಮುನ್ನ ಲೆವಿಸ್‌ ಆರೇ ರನ್ನಿಗೆ ಆಟ ಮುಗಿಸಿದ್ದರು. ಹೆಟ್‌ಮೈರ್‌ 9ರ ಗಡಿ ದಾಟಲಿಲ್ಲ. ರಸೆಲ್‌ ಬಾಲ್‌ ಎದುರಿಸುವ ಮೊದಲೇ ರನೌಟ್‌.
ಒನ್‌ಡೌನ್‌ನಲ್ಲಿ ಬಂದಿದ್ದ ರೋಸ್ಟನ್‌ ಚೇಸ್‌ 19ನೇ ಓವರ್‌ ತನಕ ನಿಂತು ತಂಡವನ್ನು ಮೇಲೆತ್ತುವ ಪ್ರಯತ್ನ ಮಾಡಿದರು (39 ರನ್‌, 46 ಎಸೆತ). ಕೊನೆಯ ಹಂತದಲ್ಲಿ ನಿಕೋಲಸ್‌ ಪೂರನ್ ಕೈಜೋಡಿಸಿದರು. 22 ಎಸೆತಗಳಿಂದ 40 ರನ್‌ ಚಚ್ಚಿದರು (4 ಸಿಕ್ಸರ್‌, 1 ಫೋರ್‌).
ಸಂಕ್ಷಿಪ್ತ ಸ್ಕೋರ್‌: ವೆಸ್ಟ್‌ ಇಂಡೀಸ್‌ 20 ಓವರ್‌, 142/7
ಬಾಂಗ್ಲಾ 20 ಓವರ್‌, 139/5
