ಡಿವಿಲಿಯರ್ಸ್ ಆಟಕ್ಕೆ ನೈಟ್ ರೈಡರ್ಸ್ ಕಂಗಾಲು

ಶಾರ್ಜಾ: ಹ್ಯಾಟ್ರಿಕ್ ಜಯದ ಕನಸು ಹೊತ್ತಿದ್ದ ಕೋಲ್ಕತ್ತ ನೈಟ್ ರೈಡರ್ಸ್ ತಂಡ ಸೋಮವಾರ ರಾತ್ರಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಆಟಕ್ಕೆ ದಂಗಾಯಿತು.

ಅಬ್ಬರದ ಬ್ಯಾಟಿಂಗ್ ನಂತರ ಮೊನಚಾದ ಬೌಲಿಂಗ್ ಪ್ರದರ್ಶನ ನೀಡಿದ ಆರ್‌ಸಿಬಿ ಕೋಲ್ಕತ್ತ ತಂಡವನ್ನು 82 ರನ್‌ಗಳಿಂದ ಮಣಿಸಿ ಪಾಯಿಂಟ್ ಪಟ್ಟಿಯಲ್ಲಿ ಮೂರನೇ ಸ್ಥಾನಕ್ಕೇರಿತು. 195 ರನ್‌ಗಳ ಗೆಲುವಿನ ಗುರಿ ಬೆನ್ನತ್ತಿದ ಕೋಲ್ಕತ್ತದ ದಿಗ್ಗಜ ಬ್ಯಾಟ್ಸ್‌ ಮನ್‌ಗಳು ಕ್ರಿಸ್ ಮಾರಿಸ್ ಅವರ ವೇಗ ಹಾಗೂ ವಾಷಿಂಗ್ಟನ್ ಸುಂದರ್ ಅವರ ಸ್ಪಿನ್ ದಾಳಿಗೆ ಕಂಗಾಲಾದರು. ಒಂಬತ್ತು ವಿಕೆಟ್ ಕಳೆದುಕೊಂಡು 112 ರನ್ ಗಳಿಸಿ ಸೋಲೊಪ್ಪಿಕೊಂಡಿತು.

ಆರಂಭಿಕ ಆಟಗಾರ ಶುಭಮನ್ ಗಿಲ್ (34) ಅವರೊಬ್ಬರೇ ಸ್ವಲ್ಪ ಹೋರಾಟ ತೋರಿದರು. ಗಿಲ್ ಜೊತೆ ಆಯಂಡ್ರೆ ರಸೆಲ್ ಮತ್ತು ರಾಹುಲ್ ತ್ರಿಪಾಠಿ ಮಾತ್ರ ಎರಡಂಕಿ ಮೊತ್ತ ದಾಟಿದರು. ಆರ್‌ಸಿಬಿ ಪರ ಬೌಲಿಂಗ್ ಮಾಡಿದ ಎಲ್ಲ ಆರು ಬೌಲರ್‌ಗಳು ಕೂಡ ವಿಕೆಟ್ ಗಳಿಸಿದರು.

ಚೆನ್ನೈ ಸೂಪರ್ ಕಿಂಗ್ಸ್‌ ಮತ್ತು ಕಿಂಗ್ಸ್ ಇಲೆವನ್ ಪಂಜಾಬ್ ತಂಡಗಳ ಎದುರು ಕ್ರಮವಾಗಿ 10 ಮತ್ತು ಎರಡು ರನ್‌ಗಳಿಂದ ಜಯ ಸಾಧಿಸಿದ್ದ ಕೋಲ್ಕತ್ತ ಇಲ್ಲಿ ಆತ್ಮವಿಶ್ವಾಸದಿಂದಲೇ ಕಣಕ್ಕೆ ಇಳಿದಿತ್ತು. ಆದರೆ ಆರ್‌ಸಿಬಿಯ ಅಗ್ರ ಕ್ರಮಾಂಕದ ಬ್ಯಾಟ್ಸ್‌ಮನ್‌ಗಳು ತಣ್ಣೀರು ಸುರಿದರು. ಟಾಸ್ ಗೆದ್ದು ಬ್ಯಾಟಿಂಗ್ ಮಾಡಿದ ತಂಡದ ಆರಂಭಿಕ ಜೋಡಿ ಆಯರನ್ ಫಿಂಚ್‌ ಮತ್ತು ಕರ್ನಾಟಕದ ದೇವದತ್ತ ಪಡಿಕ್ಕಲ್ ಅವರು ಹಾಕಿಕೊಟ್ಟ ಭದ್ರ ಬುನಾದಿ ಯ ಮೇಲೆ ನಾಯಕ ವಿರಾಟ್ ಕೊಹ್ಲಿ ಮತ್ತು ಎಬಿ ಡಿವಿಲಿಯರ್ಸ್ ರನ್‌ಗಳ ಮಹಲು ಕಟ್ಟಿದರು.

ಫಿಂಚ್ (47; 37 ಎ) ಮತ್ತು ಪಡಿಕ್ಕಲ್ (32; 23 ಎ) ಮೊದಲ ವಿಕೆಟ್‌ಗೆ 67 ರನ್ ಸೇರಿಸಿದರು. ನಂತರ ಕೊಹ್ಲಿ (ಔಟಾಗದೆ 33; 28ಎ) ಮತ್ತು ಡಿವಿಲಿಯರ್ಸ್ (ಔಟಾಗದೆ 73; 33 ಎ) ಶತಕದ ಜೊತೆಯಾಟ ಆಡಿದರು. ಹೀಗಾಗಿ ತಂಡ 20 ಓವರ್‌ಗಳಲ್ಲಿ ಕೇವಲ ಎರಡು ವಿಕೆಟ್ ಕಳೆದುಕೊಂಡು 194 ರನ್ ಪೇರಿಸಿತು. 32 ರನ್ ಗಳಿಸಿದ್ದಾಗ ದೇವದತ್ತ ಅವರು ರಸೆಲ್ ಎಸೆತದಲ್ಲಿ ಬೌಲ್ಡ್ ಆದರು. ಕೊಹ್ಲಿ ಜೊತೆ ಫಿಂಚ್ 27 ರನ್‌ಗಳ ಜೊತೆಯಾಟ ಆಡಿದರು. ಈ ಸಂದರ್ಭದಲ್ಲಿ ಫಿಂಚ್ ಅವರನ್ನು ಕರ್ನಾಟಕದ ಪ್ರಸಿದ್ಧ ಕೃಷ್ಣ ಬೌಲ್ಡ್ ಮಾಡಿದರು.

13ನೇ ಓವರ್‌ನಲ್ಲಿ ನಾಯಕನ ಜೊತೆಗೂಡಿದ ಡಿವಿಲಿಯರ್ಸ್ ಅಬ್ಬರಿಸಿದರು. ಸಿಕ್ಸರ್ ಮತ್ತು ಬೌಂಡರಿಗಳ ಮೂಲಕ ರಂಜಿಸಿ ದರು. 46 ಎಸೆತಗಳಲ್ಲಿ ಇವರಿಬ್ಬರು 101 ರನ್‌ಗಳನ್ನು ಸೇರಿಸಿ ತಂಡದ ಮೊತ್ತವನ್ನು 200ರ ಸಮೀಪ ತಲುಪಿಸಿದರು. ಈ ಆವೃತ್ತಿಯ ಮೂರನೇ ಅರ್ಧಶತಕ ಸಿಡಿಸಿದ ಡಿವಿಲಿಯರ್ಸ್ ಕೊನೆಯ 30 ಎಸೆತಗಳಲ್ಲಿ ಕೊಹ್ಲಿ ಜೊತೆ 83 ರನ್‌ ಕಲೆ ಹಾಕಿದರು.

ಸ್ಫೋಟಕ ಅರ್ಧಶತಕಕ್ಕೆ ಡಿವಿಲಿಯರ್ಸ್ ಪಂದ್ಯಶ್ರೇಷ್ಠ ಗೌರವ ಒಲಿಯಿತು.