ನವದೆಹಲಿ: ಗಣರಾಜ್ಯೋತ್ಸವ ದಿನ ಶಾಂತಿಯುತವಾಗಿ ನಡೆಯುತ್ತಿದ್ದ ರೈತರ ಪ್ರತಿಭಟನೆ ಹಿಂಸಾಚಾರ ರೂಪಕ್ಕೆ ತಿರುಗಲು ಕಾರಣ ಪಂಜಾಬಿ ಗಾಯಕ ಹಾಗೂ ನಟ ದೀಪ್ ಸಿಧು ಎಂದು ಆರೋಪ ಕೇಳಿ ಬಂದಿದೆ. ದೆಹಲಿಯ ಕೆಂಪುಕೋಟೆಯಲ್ಲಿ ಸಿಖ್ ಧರ್ಮದ ನಿಶಾನ್ ಸಾಹಿಬ್ ಆರೋಹಣ ಮಾಡುವ ಮೂಲಕ ದೇಶದ ಆಕ್ರೋಶಕ್ಕೆ ಗುರಿಯಾಗಿದ್ದಾರೆ.
ದೆಹಲಿಯ ಕೆಂಪು ಕೋಟೆಯಲ್ಲಿ ನಾವು ನಡೆಸುತ್ತಿದ್ದ ಆಂದೋಲನವನ್ನು ದೀಪ್ ಸಿಧು ಹಿಂಸಾಚಾರಕ್ಕೆ ತಿರುಗಿಸಿದ್ದಾರೆ. ಆದರೆ ಸಿಧು ಯಾರ ಪರವಾಗಿ ಈ ಕೆಲಸ ಮಾಡಿದ್ದಾರೆ ಅನ್ನೋದೇ ತಿಳಿದಿಲ್ಲ ಎಂದು ಭಾರತೀಯ ಕಿಸಾನ್ ಸಂಘದ ಜೋಗಿಂದರ್ ಸಿಂಗ್ ಉಗ್ರಾಹನ್ ಹೇಳಿದ್ದಾರೆ. ವಿಡಿಯೋಗಳಲ್ಲಿ ದೀಪ್ ಸಿಧು ಖಲ್ಸಾ ಧ್ವಜವನ್ನ ಹಿಡಿದು ನಿಂತಿರುವುದು ಹಾಗೂ ಕೆಂಪು ಕೋಟೆಯಲ್ಲಿ ಮಜದೂರ್ ಏಕ್ತಾ ಎಂದು ಘೋಷಣೆ ಕೂಗುತ್ತಿರುವುದನ್ನು ಕಾಣಬಹುದಾಗಿದೆ. ಈತನ ವಿರುದ್ಧ ಖಾಲಿಸ್ತಾನ ಚಳವಳಿಯನ್ನ ಬೆಂಬಲಿಸಿದ ಆರೋಪವಿದೆ.
ಹಿಂಸಾಚಾರದ ಬಳಿಕ ಸಿಧು, ಪ್ರಧಾನಿ ಮೋದಿ ಹಾಗೂ ಬಿಜೆಪಿಯ ಗುರುದಾಸಪುರ ಸಂಸದ ಹಾಗೂ ಬಾಲಿವುಡ್ ನಟ ಸನ್ನಿ ಡಿಯೋಲ್ ಜೊತೆ ಇರುವ ಫೋಟೋಗಳು ವೈರಲ್ ಆಗಿದೆ. 2019ರ ಲೋಕಸಭಾ ಚುನಾವಣೆಯ ವೇಳೆಯಲ್ಲಿ ಸನ್ನಿ ಡಿಯೋಲ್ ಪರ ಪ್ರಚಾರ ನಡೆಸಿರೋದಾಗಿ ಸಿಧು ಹೇಳಿಕೊಂಡಿದ್ದಾನೆ.
ನಾವು ಮಹಾನ್ ಸಾಹಿಬ್ ಧ್ವಜವನ್ನ ಕೆಂಪು ಕೋಟೆಯ ಮೇಲೆ ಹಾರಿಸಿದ್ದೇವೆ. ಪ್ರತಿಭಟನೆಯ ವೇಳೆ ನಮ್ಮ ಧ್ವಜವನ್ನ ಹಾರಿಸುವ ಹಕ್ಕು ನಮಗಿದೆ. ಪ್ರತಿಭಟನೆ ಅಂದ ಮೇಲೆ ಸಿಟ್ಟು, ಆಕ್ರೋಶಗಳನ್ನ ಹೊರಹಾಕುವುದು ಸಹಜ. ಸಿಖ್ ಧ್ವಜ ಹಾರಿಸುವ ವೇಳೆ ರಾಷ್ಟ್ರ ಧ್ವಜವನ್ನ ನಾವು ಕೆಳಗಿಳಿಸಿರಲಿಲ್ಲ ಎಂದೂ ಹೇಳಿಕೊಂಡಿದ್ದಾನೆ.
