ಮುಂಬೈ : ನಟ ಮತ್ತು ಮಿಮಿಕ್ರಿ ಕಲಾವಿದ ಮಾಧವ್ ಮೋಘೆ ಅವರು ಶ್ವಾಸಕೋಶದ ಕ್ಯಾನ್ಸರ್ನಿಂದಾಗಿ ಮೃತಪಟ್ಟಿದ್ದಾರೆ. ಬಾಲಿವುಡ್ ನಟ ಸಂಜೀವ್ ಕಪೂರ್ ಅವರ ಅನುಕರಣೆಗೆ ಜನಪ್ರಿಯವಾಗಿದ್ದ ಮೋಘೆ ಅವರು ಕಾಮೆಡಿ ಶೋಗಳಲ್ಲಿ ವೀಕ್ಷಕರ ಮನ ಸೆಳೆದಿದ್ದರು.
ಹಲವು ಹಿಂದಿ ಮತ್ತು ಮರಾಠಿ ಚಲನಚಿತ್ರಗಳಲ್ಲಿ ಕೂಡ ನಟಿಸಿದ್ದ ಮೋಘೆ ಅವರು, ‘ದಾಮಿನಿ’, ‘ಘಾತಕ್’, ‘ಮೈನೆ ಪ್ಯಾರ್ ಕ್ಯು ಕಿಯ’, ‘ಪಾರ್ಟ್ನರ್’ ಚಿತ್ರಗಳಲ್ಲಿ ಕಾಣಿಸಿಕೊಂಡಿದ್ದರು. ಬಾಲಿವುಡ್ ನಟರಾದ ಸಂಜೀವ್ ಕಪೂರ್, ಉತ್ಪಲ್ ದತ್ ಮತ್ತು ರಾಜ್ಕುಮಾರ್ ಅವರ ವಿಶಿಷ್ಟ ಮಾತಿನ ಶೈಲಿಗಳನ್ನು ಸುಲಲಿತವಾಗಿ ಅನುಕರಿಸಿ, ಹಾಸ್ಯ ಸೃಷ್ಟಿಸುತ್ತಿದ್ದರು.
ಹಲವು ಟಿವಿ ಧಾರಾವಾಹಿಗಳಲ್ಲಿ ಕೂಡ ನಟಿಸಿದ್ದ ಮೋಘೆ ಅವರಿಗೆ ಇತ್ತೀಚೆಗೆ ಶ್ವಾಸಕೋಶದ ಕ್ಯಾನ್ಸರ್ ಪತ್ತೆಯಾಗಿತ್ತು. ಕ್ಯಾನ್ಸರ್ ಅಂತಿಮ ಹಂತದಲ್ಲಿದ್ದ ಕಾರಣ ಬಾಂಬೆ ಹಾಸ್ಪಿಟಲ್ ವೈದ್ಯರು ಚಿಕಿತ್ಸೆ ಬೇಡವೆಂದು ಮನೆಗೆ ಕಳುಹಿಸಿದ್ದರು. ಮೋಘೆ ಅವರು ತಮ್ಮ ನಿವಾಸದಲ್ಲೇ ಭಾನುವಾರ(ಜುಲೈ 11) ಬೆಳಿಗ್ಗೆ 6 ಗಂಟೆಯ ವೇಳೆ ಕೊನೆಯುಸಿರೆಳೆದರು ಎಂದು ಪುತ್ರಿ ಪ್ರಾಚಿ ಮೋಘೆ ತಿಳಿಸಿದ್ದಾರೆ.
