ಮುಂಬೈ: ಶಕ್ತಿಮಾನ್‌ (Shaktimaan)- ಹೆಸರು ಕೇಳಿದರೆ ಸಾಕು ಇಂದಿಗೂ ಹಲವರು ರೋಮಾಂಚನಗೊಳ್ಳುತ್ತಾರೆ. ದೂರ ದರ್ಶನದಲ್ಲಿ ಪ್ರಸಾರವಾಗುತ್ತಿದ್ದ ಈ ಸೂಪರ್‌ ಹೀರೊ ಕಾನ್ಸೆಪ್ಟ್‌ನ ಧಾರಾವಾಹಿ ಮಾಡಿದ ಮೋಡಿಯೇ ಅಂತಹದ್ದು. ಮಕ್ಕಳಿಂದ ಹಿಡಿದು ದೊಡ್ಡವರನ್ನೂ ಹಿಡಿದಿಟ್ಟಿದ್ದ ʼಶಕ್ತಿಮಾನ್‌ʼ ಮರಳಿ ಬಂದರೆ ಹೇಗಿರಬಹುದು? ಹೌದು, ಸದ್ಯದಲ್ಲೇ ʼಶಕ್ತಿಮಾನ್‌ʼ ಮತ್ತೆ ನಿಮ್ಮ ಮುಂದೆ ಬರಲಿದ್ದಾನೆ. ಸದ್ಯ ಟೀಸರ್‌ ಬಿಡುಗಡೆಯಾಗಿದೆ (Shaktimaan Teaser). ಇದಕ್ಕಾಗಿಯೇ ಅನೇಕ ವರ್ಷಗಳಿಂದ ಕಾದು ಕುಳಿತವರು ಟೀಸರ್‌ ನೋಡಿ ಥ್ರಿಲ್‌ ಆಗಿದ್ದಾರೆ.
ಭಾರತದ ಮೊದಲ ಸೂಪರ್‌ ಹೀರೊ ಈ ʼಶಕ್ತಿಮಾನ್‌ʼ. 1997ರಿಂದ 2005ರವರೆಗೆ 450 ಸಂಚಿಕೆಗಳಲ್ಲಿ ಇದು ಪ್ರಸಾರವಾಗಿತ್ತು. ದಿನಕರ್‌ ಜಾನಿ ನಿರ್ದೇಶನದಲ್ಲಿ ನಟ ಮುಕೇಶ್‌ ಖನ್ನಾ ಶಕ್ತಿಮಾನ್‌ ಆಗಿ ಮಿಂಚಿದ್ದರು.
ಯಾರು ಈ ʼಶಕ್ತಿಮಾನ್‌ʼ?
ಸಮಾಜದಲ್ಲಿ ನಡೆಯುವ ಅನ್ಯಾಯವನ್ನು ತಡೆದು, ಅಮಾಯಕರಿಗೆ ನ್ಯಾಯ ಕೊಡಿಸುವ ಶಕ್ತಿಮಾನ್‌ ಪಾತ್ರದಲ್ಲಿ ಮುಕೇಶ್‌ ಖನ್ನಾ ಕಾಣಿಸಿಕೊಂಡಿದ್ದರು. ಪಂಡಿತ್‌ ಗಂಗಾಧರ್‌ ವಿದ್ಯಾಸಾಗರ್‌ ಮಯಾದರ್‌ ಓಂಕಾರ್‌ನಾಥ್‌ ಶಾಸ್ತ್ರಿ ಎಂಬ ಸಾಮಾನ್ಯ ವ್ಯಕ್ತಿ ಅತಿಮಾನುಷ ಶಕ್ತಿ ಪಡೆದು ಶಕ್ತಿಮಾನ್‌ ಆಗಿ ಬದಲಾಗಿ ಅನ್ಯಾಯ ತಡೆಯುವ ಕಥೆ ಇದರಲ್ಲಿದೆ. ಗಿರಕಿ ಹೊಡೆದು ಒಂದು ಸ್ಥಳದಿಂದ ಇನ್ನೊಂದು ಸ್ಥಳಕ್ಕೆ ಮಿಂಚಿನ ವೇಗದಲ್ಲಿ ಸಾಗುವ ವಿಶೇಷ ಸಾಮರ್ಥ ಶಕ್ತಿಮಾನ್‌ಗೆ ಇದೆ. ಉಳಿದ ಸಮಯದಲ್ಲಿ ಸಾಮಾನ್ಯ ವ್ಯಕ್ತಿಯೇ ಆಗಿರುವ ಆತ ಸಹಾಯಕ್ಕಾಗಿ ಯಾರಾದರೂ ಕೂಗಿದರೆ ಶಕ್ತಿಮಾನ್‌ ಆಗಿ ಬದಲಾಗುತ್ತಾನೆ. ಆ ಮೂಲಕ ಸಮಾಜದಲ್ಲಿ ಎಲ್ಲರಿಗೂ ಬೇಕಾದ ವ್ಯಕ್ತಿಯಾಗಿರುತ್ತಾನೆ.
90ರ ದಶಕದಲ್ಲಿ ಇಂತಹ ವಿಶೇಷ ಶಕ್ತಿ ಇರುವ ಈ ಸೂಪರ್‌ ಹೀರೊ ಕಾನ್ಸೆಪ್ಟ್‌ ಬಹು ಜನಪ್ರಿಯವಾಗಿತ್ತು. ತೆರೆ ಮೇಲೆ ಮೂಡುವ ಈ ಅಪರೂಪದ ಕಲ್ಪನೆಗೆ ಬಹುತೇಕ ಎಲ್ಲರೂ ಮನ ಸೋತಿದ್ದರು. ಇದು ಎಷ್ಟು ಜನಪ್ರಿಯವಾಗಿತ್ತು ಎಂದರೆ ಮಕ್ಕಳು ಗಿರಕಿ ಹೊಡೆದು ತಮಗೂ ಶಕ್ತಿಮಾನ್‌ನ ಸಾಮರ್ಥ್ಯ ಬರುತ್ತ ಎನ್ನುವುದನ್ನು ಪರೀಕ್ಷಿಸುತ್ತಿದ್ದರು. ಕಷ್ಟದಲ್ಲಿದ್ದಾಗ ಸಹಾಯಕ್ಕೆ ಬರುವಂತೆ ಮಕ್ಕಳು ಗಟ್ಟಿಯಾಗಿ ʼಶಕ್ತಿಮಾನ್‌ʼ ಎಂದು ಕೂಗುತ್ತಿದ್ದರು. ಅಷ್ಟರ ಮಟ್ಟಿಗೆ ಇದು ಜನ ಸಾಮಾನ್ಯರಲ್ಲಿ ಪ್ರಭಾವ ಬೀರಿತ್ತು.
ಟೀಸರ್‌ನಲ್ಲಿ ಏನಿದೆ?
ʼʼಶಕ್ತಿಮಾನ್‌ʼ ಮತ್ತೆ ತೆರೆಮೇಲೆ ಬರಲಿದೆ. ಅವನು ಹಿಂತಿರುಗುವ ಸಮಯ ಬಂದಿದೆ. ನಮ್ಮ ಮೊದಲ ಭಾರತೀಯ ಸೂಪರ್‌ ಟೀಚರ್‌-ಸೂಪರ್‌ ಹೀರೊ. ಇಂದಿನ ಮಕ್ಕಳ ಮೇಲೆ ಕತ್ತಲೆ ಮತ್ತು ದುಷ್ಟತನ ಮೇಲುಗೈ ಸಾಧಿಸಿದೆ. ಇದನ್ನು ತೊಡೆದು ಹಾಕಲು ಶಕ್ತಿಮಾನ್‌ ಬರುತ್ತಿದ್ದಾನೆʼʼ ಎಂದು ಮುಕೇಶ್‌ ಖನ್ನಾ ಟೀಸರ್‌ ಹಂಚಿಕೊಂಡು ಸೋಷಿಯಲ್‌ ಮೀಡಿಯಾದಲ್ಲಿ ಬರೆದುಕೊಂಡಿದ್ದಾರೆ. ಟೀಸರ್‌ನಲ್ಲಿ ಹಳೆಯ ತುಣುಕುಗಳನ್ನು ಪ್ರದರ್ಶಿಸಲಾಗಿದೆ. ಜತೆಗೆ ಶಕ್ತಿಮಾನ್‌ ಸ್ವಾತಂತ್ರ್ಯ ಹೋರಾಟಗಾರರರಾದ ಚಂದ್ರಶೇಖರ್‌ ಆಜಾದ್‌, ಭಗತ್‌ ಸಿಂಗ್‌, ಸುಭಾಷ್‌ ಚಂದ್ರ ಬೋಸ್‌ ಮತ್ತಿತರರ ಭಾವಚಿತ್ರವನ್ನು ಶಕ್ತಿಮಾನ್‌ ನೋಡುತ್ತಿರುವುದು ಕೂಡ ಕಂಡು ಬಂದಿದೆ. ಈ ಮೂಲಕ ಹೊಸ ಸೀರಿಸ್‌ನಲ್ಲಿಯೂ ಗಮನ ಸೆಳೆಯುವ ಕಥಾ ಹಂದರವಿರುವ ಸೂಚನೆ ಸಿಕ್ಕಿದೆ.
ಯಾವಾಗ ಪ್ರಸಾರ?
ಹೊಸ ʼಶಕ್ತಿಮಾನ್‌ʼ ಯಾವಾಗ ಮತ್ತು ಎಲ್ಲಿ ಪ್ರಸಾರವಾಗಲಿದೆ ಎನ್ನುವ ಗುಟ್ಟನ್ನು ಸದ್ಯ ರಟ್ಟು ಮಾಡಿಲ್ಲ. ವೆಬ್‌ ಸರಣಿ ರೂಪದಲ್ಲಿ ಬರಲಿದೆಯೋ ಅಥವಾ ಮೊದಲಿನಂತೆ ಧಾರಾವಾಹಿಯಾಗಿ ಪ್ರಸಾರವಾಗಲಿದೆಯೊ ಎನ್ನುವುದು ಕೂಡ ತಿಳಿದು ಬಂದಿಲ್ಲ. ಟೀಸರ್‌ಗೆ ಭರ್ಜರಿ ಪ್ರತಿಕ್ರಿಯೆ ವ್ಯಕ್ತವಾಗಿದ್ದು, ಅಭಿಮಾನಿಗಳು ಹೊಸ ರೂಪದ ಶಕ್ತಿಮಾನ್‌ನನ್ನು ಕಣ್ತುಂಬಿಕೊಳ್ಳಲು ಕಾತುರದಿಂದ ಕಾಯುತ್ತಿದ್ದಾರೆ.
ಈ ಸುದ್ದಿಯನ್ನೂ ಓದಿ: Actor Ram Charan: ಪಾಲಿಟಿಕಲ್‌ ಡ್ರಾಮಾ ‘ಗೇಮ್‌ ಚೇಂಜರ್‌’ ಟೀಸರ್‌ ರಿಲೀಸ್; ರಾಮ್‌ ಚರಣ್‌ ಆ್ಯಕ್ಷನ್‌ಗೆ ಫ್ಯಾನ್ಸ್‌ ಫಿದಾ
