ಬೆಂಗಳೂರು: ನಮ್ಮ ದೇಹವನ್ನು ಆರೋಗ್ಯವಾಗಿಡುವುದಕ್ಕೆ ಮತ್ತು ಅದರ ಸೂಕ್ಷ್ಮಾತಿಸೂಕ್ಷ್ಮ ಅಗತ್ಯಗಳನ್ನು ಪೂರೈಸುವುದಕ್ಕೆ ನಮ್ಮದೇ ದೇಹದಲ್ಲಿನ ವ್ಯವಸ್ಥೆ ಸಕ್ಷಮವಾಗಿದೆ. ಆದರೆ ಯಾವುದೇ ಹೇಗೆ ಕೆಲಸ ಮಾಡುತ್ತದೆ ಮತ್ತು ಅದು ವ್ಯತ್ಯಾಸವಾದರೆ ಏನಾಗುತ್ತದೆ ಎಂಬ ಬಗ್ಗೆ ನಮಗೆ ಅರಿವಿರುವುದು ಅಗತ್ಯ. ಹಾಗಾಗಿಯೇ ಜನವರಿ ತಿಂಗಳನ್ನು ಥೈರಾಯ್ಡ್‌ ಜಾಗೃತಿ ಮಾಸ (Thyroid Awareness Month) ಎಂದು ಆಚರಿಸಲಾಗುತ್ತದೆ (Health Tips).
ನಮ್ಮ ಗಂಟಲಿನ ಮುಂಭಾಗದಲ್ಲಿರುವ ಚಿಟ್ಟೆಯಾಕಾರದ ಪುಟ್ಟ ಗ್ರಂಥಿಯಿದು. ಮೂರ್ತಿ ಚಿಕ್ಕದಾದರೂ ಕೀರ್ತಿ ದೊಡ್ಡದು ಎಂಬಂತೆ, ಈ ಪುಟ್ಟ ಗ್ರಂಥಿ ಸ್ರವಿಸುವ ಚೋದಕಗಳು ನಮ್ಮ ಆರೋಗ್ಯ ರಕ್ಷಣೆಗೆ ಬಹಳ ಮುಖ್ಯವಾದದ್ದು. ದೇಹದ ಉಷ್ಣತೆಯನ್ನು ನಿಯಂತ್ರಿಸುವುದು, ಹೃದಯದ ಬಡಿತವನ್ನು ಸರಾಗ ಮಾಡುವುದು, ಶರೀರದ ಚಯಾಪಚಯ ಕ್ರಿಯೆಯನ್ನು ನಿರ್ವಹಿಸುವುದು- ಇಂಥ ಕೆಲವು ಮುಖ್ಯ ಹೊಣೆಗಳನ್ನು ಈ ಗ್ರಂಥಿ ನಿರ್ವಹಿಸುತ್ತದೆ. ಈ ಗ್ರಂಥಿಗಳು ಉತ್ಪಾದಿಸುವ ಚೋದಕಗಳ ಅಥವಾ ಹಾರ್ಮೋನುಗಳ ಪ್ರಮಾಣ ಹೆಚ್ಚು ಇಲ್ಲವೇ ಕಡಿಮೆಯಾದರೆ ಥೈರಾಯ್ಡ್‌ ಸಮಸ್ಯೆ ಇದೆಯೆಂದು ಅರ್ಥ.
ಯಾರಿಗೆ ತೊಂದರೆ ಹೆಚ್ಚು?
ಈ ಗ್ರಂಥಿ ಸ್ರವಿಸುವ ಟಿ3 ಮತ್ತು ಟಿ4 ಚೋದಕಗಳು (T3, T4 hormones) ಏರಿಳಿತವಾಗುವ ಸಮಸ್ಯೆ ಯಾರಲ್ಲೂ ಉಂಟಾಗಬಹುದು. ಆದರೆ ಪುರುಷರಿಗಿಂತ ಮಹಿಳೆಯರಲ್ಲಿ ಈ ಸಮಸ್ಯೆ ಕಾಣಿಸಿಕೊಳ್ಳುವುದು ಸುಮಾರು 8 ಪಟ್ಟು ಹೆಚ್ಚು. ಕೆಲವೊಮ್ಮೆ ಬಾಲ್ಯದಲ್ಲೇ ಈ ಸಮಸ್ಯೆ ಕಾಣಿಸಿಕೊಳ್ಳಬಹುದು. ವಯಸ್ಸು ಮಾಗಿದಂತೆ ಈ ಸಮಸ್ಯೆ ಕಾಣಿಸಿಕೊಳ್ಳುವ ಪ್ರಮಾಣ ಏರುತ್ತದೆ. ಶಿಶು ಜನನದ ನಂತರ, ಋತುಬಂಧದ ಸಮಯದಲ್ಲಿ ಅಥವಾ 60ರ ನಂತರ ಥೈರಾಯ್ಡ್‌ ಸಮಸ್ಯೆ ಉಂಟಾಗಬಹುದು. ಕುಟುಂಬದಲ್ಲಿ ಥೈರಾಯ್ಡ್‌ ಸಮಸ್ಯೆಗಳಿದ್ದರೆ, ಆನುವಂಶಿಕವಾಗಿ ಇದು ಮುಂದುವರಿದು ಬರಬಹುದು.
ಗ್ರೇವ್‌ ಅಥವಾ ಹಶಿಮೊಟೊದಂಥ ಅಟೋಇಮ್ಯೂನ್‌ ರೋಗಗಳು ಥೈರಾಯ್ಡ್‌ ಸಮಸ್ಯೆಗಳನ್ನು ತಂದಿಕ್ಕಬಹುದು. ಅಯೋಡಿನ್‌ ಕೊರತೆ ಇದ್ದರೆ ಥೈರಾಯ್ಡ್‌ ಸಮಸ್ಯೆ ಬೆನ್ನು ಬೀಳುವುದು ಸಾಮಾನ್ಯ. ವಿಕಿರಣಗಳಿಗೆ ತೆರೆದುಕೊಳ್ಳುವುದು, ಕೆಲವು ಔಷಧಿಗಳು ಮತ್ತು ಕುತ್ತಿಗೆಯ ಶಸ್ತ್ರ ಚಿಕಿತ್ಸೆಗಳು ಈ ಸಮಸ್ಯೆಗೆ ನಾಂದಿ ಹಾಡಬಹುದು. ಗರ್ಭಾವಸ್ಥೆಯೂ ಕೆಲವೊಮ್ಮೆ ಇದಕ್ಕೆ ಕಾರಣವಾದೀತು. ಹೀಗೆ ಥೈರಾಯ್ಡ್‌ ಏರುಪೇರಿಗೆ ಬಹಳಷ್ಟು ಕಾರಣಗಳಿವೆ.
ಹೈಪೋ ಥೈರಾಯ್ಡಿಸಂ
ಚೋದಕಗಳ ಸ್ರವಿಸುವಿಕೆ ಕಡಿಮೆಯಾದಾಗ ಕಾಣುವ ಸಮಸ್ಯೆಯಿದು. ಈ ಸಮಸ್ಯೆ ಆರಂಭದಲ್ಲಿ ಅಷ್ಟಾಗಿ ಗಮನಕ್ಕೆ ಬಾರದಿರಬಹುದು. ಆದರೆ ಸುಸ್ತು, ಆಯಾಸ, ಸುಮ್ಮನೆ ಚಳಿಯಾಗುವುದು, ಮಲಬದ್ಧತೆ, ಒಣ ಚರ್ಮ, ತೂಕ ಹೆಚ್ಚಳ, ಧ್ವನಿ ಒರಟಾಗುವುದು, ಮಾಂಸಖಂಡಗಳಲ್ಲಿ ನೋವು, ಕೂದಲು ಉದುರುವುದು, ಖಿನ್ನತೆ, ಫಲವಂತಿಕೆಯ ಸಮಸ್ಯೆ, ಮಾಸಿಕ ಸ್ರಾವ ಏರುಪೇರಾಗುವುದು- ಇಂಥ ಲಕ್ಷಣಗಳು ಉಂಟಾಗಬಹುದು.
ಹೈಪರ್‌ ಥೈರಾಯ್ಡಿಸಂ
ಹಾರ್ಮೋನುಗಳ ಸ್ರಾವ ಹೆಚ್ಚಾದಾಗ ಬರುವ ಸಮಸ್ಯೆಯಿದು. ಹೃದಯದ ಬಡಿತ ಏರುಪೇರಾಗುವುದು, ಹಸಿವು ಹೆಚ್ಚಾಗಿ ಹೆಚ್ಚು ತಿಂದರೂ ಇಳಿಯುವ ತೂಕ, ಹೊಟ್ಟೆ ಸರಿ ಇಲ್ಲದಂತಾಗುವುದು, ದೃಷ್ಟಿ ಸಮಸ್ಯೆ, ಋತುಚಕ್ರ ಏರುಪೇರು, ನಿದ್ರಹೀನತೆ, ಗಂಟಲು ಊದಿಕೊಂಡಂತೆ ಕಾಣುವುದು, ಕೂದಲು ತುಂಡಾಗಿ ಉದುರುವುದು, ಬೆವರುವ ಪ್ರಮಾಣ ಹೆಚ್ಚುವುದು- ಇಂಥ ಲಕ್ಷಣಗಳಿದ್ದರೆ ಎಚ್ಚರಿಕೆ ಅಗತ್ಯ.
ಚಳಿಗಾಲದಲ್ಲಿ ವ್ಯತ್ಯಾಸವೇಕೆ?
ಥೈರಾಯ್ಡ್‌ ಕೆಲಸ ಸರಿಯಾಗಿ ಇರುವವರಲ್ಲೂ ಚಳಿಗಾಲದಲ್ಲಿ ಕೊಂಚ ಏರುಪೇರು ದಾಖಲಾದರೆ ಹುಬ್ಬೇರಿಸಬೇಕಿಲ್ಲ. ತಪಾಸಣೆಯಲ್ಲಿ ಟಿಎಸ್‌ಎಚ್‌ ಮಟ್ಟ ಹೆಚ್ಚಿರುವುದು ಕಂಡುಬರಬಹುದು. ದೇಹದ ಚಯಾಪಚಯವನ್ನು ನಿರ್ವಹಿಸಲು ಹೆಚ್ಚಿನ ಹಾರ್ಮೋನುಗಳು ಚಳಿಗಾಲದಲ್ಲಿ ಅಗತ್ಯ. ಜೊತೆಗೆ, ದೇಹದ ಆಂತರಿಕ ಉಷ್ಣತೆಯನ್ನು ಕಾಪಾಡಿಕೊಳ್ಳುವುದಕ್ಕೂ ಇವುಗಳ ನೆರವು ಬೇಕು. ಈ ಕಾರಣಗಳಿಗೆ ಚಳಿಯ ವಾತಾವರಣದಲ್ಲಿ ಗ್ರಂಥಿಯ ಚಟುವಟಿಕೆ ಏರುಪೇರಾಗುವುದು ಹೌದು. ಅದರಲ್ಲೂ ದೇಹದ ಚಯಾಪಚಯ ನಿರ್ವಹಿಸುವ ಟಿ೩ ಮತ್ತು ಟಿ೪ ಚೋದಕಗಳಲ್ಲಿ ಹೆಚ್ಚಳ ಕಂಡುಬರುತ್ತದೆ.
ಋತುಮಾನಕ್ಕೆ ತಕ್ಕಂತೆ ನಮ್ಮ ಆಹಾರಕ್ರಮಗಳಲ್ಲಿ ಬದಲಾವಣೆ ಮಾಡಿಕೊಳ್ಳುತ್ತೇವೆ. ಇದರಿಂದ ಥೈರಾಯ್ಡ್‌ ಕೆಲಸದಲ್ಲಿ ಏರಿಳಿತವಾಗಬಹುದು. ಚಳಿಗಾಲದ ವೈರಸ್‌ ಸೋಂಕುಗಳು ಥೈರಾಯ್ಡ್‌ ಚಟಿವಟಿಕೆಯಲ್ಲಿ ವ್ಯತ್ಯಾಸ ತರಬಹುದು. ಬಿಸಿಲು ಕಡಿಮೆಯಿರುವ ದಿನಗಳು ಎದುರಾದರೆ, ದೇಹದ ಆಂತರಿಕ ಗಡಿಯಾರ ಅಥವಾ ಸರ್ಕೇಡಿಯನ್‌ ರಿದಂ ವ್ಯತ್ಯಾಸವಾಗುತ್ತದೆ. ಇದೂ ಸಹ ಥೈರಾಯ್ಡ್‌ ಚಟುವಟಿಕೆಯ ಮೇಲೆ ಪರಿಣಾಮ ಬೀರಬಹುದು. ಮಲಬದ್ಧತೆ, ಖಿನ್ನತೆ, ದೇಹದ ಚಟುವಟಿಕೆ ನಿಧಾನವಾಗುವುದು, ತೂಕದಲ್ಲಿ ಏರಿಳಿತ, ದೇಹದಲ್ಲೆಲ್ಲ ನೋವು, ಸುಸ್ತು, ಚಳಿಯ ಅನುಭವ- ಇಂಥ ಹಲವು ಲಕ್ಷಣಗಳಿದ್ದರೆ ಥೈರಾಯ್ಡ್‌ ತಪಾಸಣೆ ಮಾಡಿಸಿಕೊಳ್ಳಬೇಕಾದ್ದು ಅಗತ್ಯ.
ಈ ಸುದ್ದಿಯನ್ನೂ ಓದಿ: Health Tips: ಬೆಳಗಿನ ಉಪಾಹಾರ ಹೇಗಿರಬೇಕು?
