Apprenticeship schemes: ರಾಷ್ಟ್ರೀಯ ಅಪ್ರೆಂಟಿಸ್‌ಶಿಪ್ ಯೋಜನೆಯಡಿ ನೀಡುವ ಸ್ಟೈಫಂಡ್​ನಲ್ಲಿ ಶೇ.36ರಷ್ಟು ಹೆಚ್ಚಳ; ಅರ್ಜಿ ಸಲ್ಲಿಸುವುದು ಹೇಗೆ?

ನವದೆಹಲಿ: ಕೇಂದ್ರ ಸರ್ಕಾರ ರಾಷ್ಟ್ರೀಯ ಅಪ್ರೆಂಟಿಸ್‌ಶಿಪ್ ಯೋಜನೆಯಡಿ (Apprenticeship schemes) ನೀಡುವ ಸ್ಟೈಫಂಡ್ ಅನ್ನು ಶೇ.36ರಷ್ಟು ಹೆಚ್ಚಿಸಿದೆ. ಈಗ ತಿಂಗಳಿಗೆ 6,800 ರಿಂದ 12,300 ರೂ. ವರೆಗೆ ಸ್ಟೈಫಂಡ್ ಪಡೆಯಬಹುದು. ಈ ಯೋಜನೆಯು ಆರ್ಥಿಕವಾಗಿ ಪ್ರಯೋಜನವನ್ನು ನೀಡುವುದಲ್ಲದೆ, ತರಬೇತಿಯ ಸಮಯದಲ್ಲಿ ಅವರ ಆಸಕ್ತಿಯನ್ನೂ ಹೆಚ್ಚಿಸಲಿದೆ. ಕೇಂದ್ರ ಅಪ್ರೆಂಟಿಸ್‌ಶಿಪ್ ಮಂಡಳಿಯ (CAC) 38 ನೇ ಸಭೆಯಲ್ಲಿ ಅಧ್ಯಕ್ಷತೆ ವಹಿಸಿದ್ದ ರಾಜ್ಯ ಸಚಿವ ಜಯಂತ್ ಚೌಧರಿ ರಾಷ್ಟ್ರೀಯ ಅಪ್ರೆಂಟಿಸ್‌ಶಿಪ್ ಉತ್ತೇಜನ ಯೋಜನೆ (NAPS) ಮತ್ತು ರಾಷ್ಟ್ರೀಯ ಅಪ್ರೆಂಟಿಸ್‌ಶಿಪ್ ತರಬೇತಿ ಯೋಜನೆ (NATS) ಅಡಿಯಲ್ಲಿ ನೀಡಲಾಗುವ ಸ್ಟೈಫಂಡ್ ಹೆಚ್ಚಳವನ್ನು ಅನುಮೋದಿಸಿದರು.

ಶಿಕ್ಷಣವನ್ನು ಕೈಬಿಡುವವರ ಪ್ರಮಾಣವನ್ನು ಕಡಿಮೆ ಮಾಡುವುದು ಮತ್ತು ಹೆಚ್ಚಿನ ಅಭ್ಯರ್ಥಿಗಳನ್ನು ಅಪ್ರೆಂಟಿಸ್‌ಶಿಪ್ ತರಬೇತಿಗೆ ಆಕರ್ಷಿಸುವುದು ಇದರ ಉದ್ದೇಶವಾಗಿದೆ" ಎಂದು ಕೌಶಲ್ಯ ಅಭಿವೃದ್ಧಿ ಮತ್ತು ಉದ್ಯಮಶೀಲತೆ ಸಚಿವಾಲಯ (MSDE) ಸಭೆಯ ನಂತರ ಬಿಡುಗಡೆ ಮಾಡಿದ ಹೇಳಿಕೆಯಲ್ಲಿ ತಿಳಿಸಿದೆ. ಈ ಹಿಂದೆ 5,000 ರಿಂದ 9,000 ರೂ.ವರೆಗೆ ವಿದ್ಯಾರ್ಥಿ ವೇತನ ಪಡೆಯುತ್ತಿದ್ದ ವಿದ್ಯಾರ್ಥಿಗಳು ಈಗ 6,800 ರಿಂದ 12,300 ರೂ.ವರೆಗೆ ವಿದ್ಯಾರ್ಥಿ ವೇತನ ಪಡೆಯಲಿದ್ದಾರೆ. ಇದರರ್ಥ ಯುವಕರು ಪ್ರತಿ ತಿಂಗಳು ನೇರವಾಗಿ ಹೆಚ್ಚಿನ ಹಣವನ್ನು ಪಡೆಯುತ್ತಾರೆ, ಇದರಿಂದಾಗಿ ಅವರು ತಮ್ಮ ತರಬೇತಿಯ ಸಮಯದಲ್ಲಿ ತಮ್ಮ ಖರ್ಚುಗಳನ್ನು ಸುಲಭವಾಗಿ ನಿರ್ವಹಿಸಬಹುದು.

ಏನಿದು ಅಪ್ರೆಂಟಿಸ್‌ಶಿಪ್?

ಅಪ್ರೆಂಟಿಸ್‌ಶಿಪ್ ಎನ್ನುವುದು ಉದ್ಯೋಗದ ಮೇಲೆ ತರಬೇತಿಯಾಗಿದ್ದು, ಇದರಲ್ಲಿ ಯುವಕರು ಕಂಪನಿ ಅಥವಾ ಸಂಸ್ಥೆಯಲ್ಲಿ ಕೆಲಸ ಮಾಡುವ ಮೂಲಕ ಕಲಿಯುತ್ತಾರೆ. ಇದು ಗ್ರಾಮೀಣ ಭಾಗದ ಯುವಕರಿಗೆ ಸಾಕಷ್ಟು ಅನುಕೂಲವಾಗಲಿದೆ. ಭವಿಷ್ಯದಲ್ಲಿ ಉದ್ಯೋಗ ಪಡೆಯುವ ಸಾಧ್ಯತೆಗಳನ್ನು ಹೆಚ್ಚಿಸುತ್ತದೆ. ಈ ಅವಧಿಯಲ್ಲಿ, ಅವರಿಗೆ ನಿಗದಿತ ಸ್ಟೈಫಂಡ್ ಕೂಡ ಸಿಗುತ್ತದೆ.

ಈ ಸುದ್ದಿಯನ್ನೂ ಓದಿ: Chikkaballapur News: ಪ್ರತಿಭಾವಂತ ವಿದ್ಯಾರ್ಥಿ ನಿತಿನ್ ಕುಮಾರ್, ಪೋಷಕರಿಗೆ ಗೌರವಿಸಿ ಸನ್ಮಾನ

ಫಾರ್ಮ್‌ ಫಿಲ್‌ ಮಾಡೋದು ಹೇಗೆ?

ರಾಷ್ಟ್ರೀಯ ಅಪ್ರೆಂಟಿಸ್‌ಶಿಪ್ ಪೋರ್ಟಲ್‌ನಲ್ಲಿ (NATS/NAPS) ಕಾಲಕಾಲಕ್ಕೆ ಹೊಸ ಹುದ್ದೆಗಳು ಹೊರಬರುತ್ತಲೇ ಇರುತ್ತವೆ. ಆಸಕ್ತ ವಿದ್ಯಾರ್ಥಿಗಳು nats.education.gov.in ಗೆ ಭೇಟಿ ನೀಡುವ ಮೂಲಕ ನೋಂದಾಯಿಸಿಕೊಳ್ಳಬಹುದು. ಇದಲ್ಲದೆ, ರೈಲ್ವೇ, ಬಿಎಚ್‌ಇಎಲ್, ಒಎನ್‌ಜಿಸಿ, ಎಸ್‌ಎಐಎಲ್, ಎನ್‌ಟಿಪಿಸಿ, ಡಿಆರ್‌ಡಿಒ, ಇಸ್ರೋ, ಎಚ್‌ಎಎಲ್, ಬಿಇಎಲ್‌ನಂತಹ ದೊಡ್ಡ ಸರ್ಕಾರಿ ಕಂಪನಿಗಳು ಸಹ ಅಪ್ರೆಂಟಿಸ್‌ಶಿಪ್ ಫಾರ್ಮ್‌ಗಳನ್ನು ಬಿಡುಗಡೆ ಮಾಡುತ್ತವೆ. ಹಲವು ಬಾರಿ ಖಾಸಗಿ ಕಂಪನಿಗಳಲ್ಲಿಯೂ ಅಪ್ರೆಂಟಿಸ್ ಉದ್ಯೋಗಗಳು ಲಭ್ಯವಿರುತ್ತವೆ.