ಅಯ್ಯಯ್ಯೋ ‘ಕ್ಷಮಿಸಿ ನಿಮ್ಮ ಖಾತೆಯಲ್ಲಿ ಹಣವಿಲ್ಲ’ ಎನ್ನುತ್ತಿದ್ದಾರೆ ದಿಗಂತ್.
ಅಚ್ಚರಿಗೊಳ್ಳಬೇಡಿ, ಇದು ದೂದ್‌ಪೇಡ ದಿಗಂತ್ ಅಭಿನಯಿಸುತ್ತಿರುವ ಹೊಸ ಚಿತ್ರ. ಈ ಹಿಂದೆಯೇ ಸೆಟ್ಟೇರಿದ್ದ ಚಿತ್ರ ಬಹುತೇಕ ಚಿತ್ರೀಕರಣ ಮುಗಿಸಿದ್ದು, ತೆರೆಗೆ ಬರಲು ಸಿದ್ಧತೆ ಮಾಡಿಕೊಳ್ಳುತ್ತಿದೆ. ದಿಗಂತ್ ಈ ಚಿತ್ರದಲ್ಲಿ ಶಂಕರನಾಗಿ ಇಡೀ ಸಿನಿಮಾವನ್ನು ಆವರಿಸಿಕೊಂಡಿ ದ್ದಾರೆ. ಅಡಿಕೆ ಬೆಳೆಗಾರನಾಗಿ, ಗೊಬ್ಬರದ ಅಂಗಡಿ ಮಾಲೀಕರಾಗಿ ಗಮನ ಸೆಳೆಯುತ್ತಾರೆ.
ಮತ್ತೊಮ್ಮೆ ಮಲೆನಾಡ ಹುಡುಗನಾಗಿ ಹಳೆ ಮೋಟರ್ ಬೈಕ್ ಏರಿ ಸವಾರಿ ಮಾಡಿದ್ದಾರೆ. ಮಾರುತಿ 800 ಡ್ರೈವ್ ಮಾಡಿದ್ದಾರೆ. ನಾಯಕನ ಜೀವನದಲ್ಲಿ ನಡೆದ ಒಂದು ಘಟನೆಯಿಂದ ಏನೇನು ಅವಾಂತರಗಳು ಆಗುತ್ತದೆ. ಅದರಿಂದ ಹೇಗೆ ಹೊರಗೆ ಬರುತ್ತಾರೆ ಎಂಬುದನ್ನು ಹಾಸ್ಯದ ಮೂಲಕ ತೋರಿಸಲಾಗಿದೆ. ಚಿತ್ರದ ಕೊನೆಯಲ್ಲಿ ಅರ್ಥಪೂರ್ಣ ಸಂದೇಶವನ್ನು ಹೇಳಲಾಗಿದೆಯಂತೆ.
ವಿಶೇಷ ಎಂದರೆ ಏಳು ವರ್ಷಗಳ ಬಳಿಕ ದಿಗಂತ್‌ಗೆ ಜತೆಯಾಗಿ ಐಂದ್ರಿತಾ ರೇ ನಟಿಸುತ್ತಿದ್ದಾರೆ. ಕನ್ನಡತಿಯಾಗಿ ಮನಗೆದ್ದಿರುವ ರಂಜನಿ ರಾಘವನ್ ಕೂಡ ಚಿತ್ರದ ಪ್ರಮುಖ ಪಾತ್ರದಲ್ಲಿ ಬಣ್ಣಹಚ್ಚಿದ್ದಾರೆ. ಉಳಿದಂತೆ ಉಮಾಶ್ರೀ ವಿದ್ಯಾಮೂರ್ತಿ, ರವಿಕಿರಣ್, ಯಶ್ವಂತ್ ಸರ್‌ದೇಶ ಪಾಂಡೆ, ಕಾಸರಗೋಡು ಚಿನ್ನ ಹಾಗೂ ನೀನಾಸಂ ಕಲಾವಿದರುಗಳಿಗೆ ಅವಕಾಶ ಮಾಡಿಕೊಡಲಾಗಿದೆ.
ಹೆಚ್ಚಾಗಿ ಕಾಮಿಡಿ ಅಂಶಗಳು ಇರಲಿದೆ. ಪ್ರಾರಂಭದಲ್ಲಿ ಶೀರ್ಷಿಕೆಯನ್ನು ಬಿಡಲಾಗಿತ್ತು. ಕಥೆಗೆ ತಕ್ಕ ಟೈಟಲ್ ಇದ್ದಿದ್ದರಿಂದ ಎಲ್ಲರೂ ಇಷ್ಟಪಟ್ಟರು. ಹಾಗಾಗಿ ಅದೇ ಶೀರ್ಷಿಕೆಯಲ್ಲಿಯೇ ಚಿತ್ರ ಮೂಡಿಬರಲಿದೆಯಂತೆ. ಈ ವರ್ಷ ಟಾಪ್ ಐದರ ನೋಡಲೆ ಬೇಕಾದ ಚಿತ್ರದ ಸಾಲಿನಲ್ಲಿಯೂ ‘ಕ್ಷಮಿಸಿ ನಿಮ್ಮ ಖಾತೆಯಲ್ಲಿ ಹಣವಿಲ್ಲ’ ಸಿನಿಮಾ ಗುರತಿಸಿಕೊಂಡಿದೆ.
ಇದೇ ಶೀರ್ಷಿಕೆ ಯಾಕೆ ಇಡಲಾಗಿದೆ ಎಂಬ ಪ್ರಶ್ನೆಗೆ ಚಿತ್ರ ನೋಡಿದ ಮೇಲೆಯೇ ಉತ್ತರ ಸಿಗಲಿದೆಯಂತೆ. ಸಾಗರ, ಸಿಗಂದೂರು ಮತ್ತು ಬೆಂಗಳೂರು ಕಡೆಗಳಲ್ಲಿ ಶೂಟಿಂಗ್ ನಡೆಸಲಾಗಿದೆ. ಚಿತ್ರರಂಗದಲ್ಲಿ ಎರಡು ವರ್ಷಗಳ ಅನುಭವವಿರುವ ವಿನಾಯಕ ಕೋಡ್ಸರ ಚಿತ್ರಕ್ಕೆ ಕಥೆ ಚಿತ್ರಕಥೆ ಬರೆದು ಆ್ಯಕ್ಷನ್‌ಕಟ್ ಹೇಳಿದ್ದಾರೆ.
ಚಿತ್ರದ ಒನ್‌ಲೈನ್ ಕಥೆ ಕೇಳಿ ಮೆಚ್ಚಿದ ನಿರ್ಮಾಪಕ ಸಿಲ್ಕ್‌ ಮಂಜು ಚಿತ್ರಕ್ಕೆ ಬಂಡವಾಳ ಹೂಡಿದ್ದಾರೆ. ತೆರೆಯಲ್ಲಿ ಮಲೆನಾಡಿನ ಸಂಪೂರ್ಣ ಚಿತ್ರಣವಿದ್ದು, ಅದಕ್ಕೆ ತಕ್ಕಂತೆ ಗೀತೆಗಳನ್ನು ರಚಿಸಿಲಾಗಿದೆ. ಈಗಾಗಲೇ ರಾಗ ಸಂಯೋಜನೆಯೂ ಮುಗಿದಿದೆ.
