ನಟ ತೇಜ್ ಈ ಬಾರಿ ವಿನೂತನ ಕಥೆಯ ಚಿತ್ರವನ್ನು ತೆರೆಗೆ ತರಲು ಸಿದ್ಧವಾಗಿದ್ದಾರೆ. ‘ರಿವೈಂಡ್’ ಚಿತ್ರದ ಮೂಲಕ ಚಿತ್ರರಂಗದಲ್ಲಿ ಹೊಸ ಮುನ್ನುಡಿ ಬರೆಯಲು ಅಣಿಯಾಗುತ್ತಿದ್ದಾರೆ. ತೇಜ್ ಈ ಹಿಂದೆ ಸುಮಾರು ಆರು ಚಿತ್ರಗಳಲ್ಲಿ ನಟಿಸಿದ್ದಾರೆ.
ಪ್ರೇಕ್ಷಕರನ್ನು ಸೆಳೆಯುವಲ್ಲಿಯೂ ಯಶಸ್ವಿಯಾಗಿದ್ದಾರೆ. ಆದರೂ ಸಿನಿಪ್ರಿಯರಿಗೆ ಹೊಸತನವನ್ನು ಕಟ್ಟಿಕೊಡಬೇಕು ಎಂಬ
ನಿಟ್ಟಿನಲ್ಲಿ ತಾವೇ ಕಥೆ ಬರೆದು, ನಿರ್ದೇಶನದ ಸಾರಥ್ಯವನ್ನೂ ವಹಿಸಿಕೊಂಡಿದ್ದು, ‘ರಿವೈಂಡ್’ ಚಿತ್ರವನ್ನು ತೆರೆಗೆ ತರುತ್ತಿದ್ದಾರೆ. ಮಾತ್ರವಲ್ಲ ನಾಯಕನಾಗಿಯೂ ನಟಿಸಿದ್ದಾರೆ. ತೇಜ್ ಈ ಚಿತ್ರದಲ್ಲಿ ಪತ್ರಕರ್ತನಾಗಿ ಬಣ್ಣಹಚ್ಚಿದ್ದಾರೆ.
ಪತ್ರಕರ್ತನಿಗೆ ಎದುರಾಗುವ ಸವಾಲುಗಳು, ಆತ ಅನುಭವಿಸುವ ಸಮಸ್ಯೆಗಳು ಎಲ್ಲವೂ ಚಿತ್ರದ ಕಥೆಯಲ್ಲಿದೆಯಂತೆ. ಸಮಾಜಕ್ಕೆ ಮಾರಕವಾದ ವಿಚಾರದ ಕುರಿತು ತನಿಖೆ ಮಾಡಲು ತೆರಳಿದ ಸಂದರ್ಭ, ಪತ್ರಕರ್ತ ನಿಗೆ ಕಂಟಕ ಎದುರಾ ಗುತ್ತದೆ. ಇದು ಆತನ ಕುಟುಂಬದ ಮೇಲೆಯೂ ಪ್ರಭಾವ ಬೀರುತ್ತದೆ. ಹೀಗಿರು ವಾಗ, ನಾಯಕ ಸಮಾಜಘಾತುಕರಿಂದ ತನ್ನ ಮಡದಿ, ಮಗುವನ್ನು ಹೇಗೆ ರಕ್ಷಿಸಿಕೊಳ್ಳುತ್ತಾನೆ.
ತಾನು ಮುಂದಿಟ್ಟ ಹೆಜ್ಜೆಯನ್ನು ಹಿಂತೆಗೆಯದೇ, ತಾನಂದುಕೊಂಡಿದ್ದನ್ನು ಹೇಗೆ ಸಾಧಿಸುತ್ತಾನೆ ಎಂಬುದೇ ಚಿತ್ರದ ಸ್ಟೋರಿ. ‘ರಿವೈಂಡ್’ ಶೀರ್ಷಿಕೆ ಕೇಳಿದಾಕ್ಷಣ, ಹಿಂದಿನ ಘಟನೆಗಳನ್ನು ಮೆಲುಕು ಹಾಕುವ ಅಥವಾ ಕಳೆದು ಹೋದ ಘಟನೆಯ ಬಗ್ಗೆ ನೆನಪಿಸುವ ಸ್ಟೋರಿಯೇ ಚಿತ್ರದಲ್ಲಿ ಇರಬೇಕು ಎಂಬ ಭಾವ ನಿಮ್ಮಲ್ಲಿ ಮೂಡುತ್ತದೆ. ಖಂಡಿತಾ ಇಲ್ಲ. ನಾವು ಮುಂದಡಿ ಇಡಲು ಹಿಂದಿನ ಘಟನೆಗಳು ಎಷ್ಟು ಮುಖ್ಯ ಎಂಬುದನ್ನು ಚಿತ್ರದಲ್ಲಿ ಹೇಳಲಾಗಿದೆ ಎನ್ನುತ್ತಾರೆ ತೇಜ್.
ಸೈಂಟಿಫಿಕ್ ಥ್ರಿಲ್ಲರ್ ಕಥೆಯ ‘ರಿವೈಂಡ್’ ಪ್ರೇಕ್ಷಕರನ್ನು ಕ್ಷಣ ಕ್ಷಣಕ್ಕೂ ಕುತೂಹಲ ಕೆರಳಿಸುತ್ತದೆಯಂತೆ. ತೇಜ್‌ಗೆ ಜತೆಯಾಗಿ ನಟಿ ಚಂದನಾ ಅಭಿನಯಿಸಿದ್ದಾರೆ. ಮೈಸೂರು, ಬೆಂಗಳೂರು ಹಾಗೂ ಯೂರೋಪ್‌ನಲ್ಲಿ ಚಿತ್ರದ ಚಿತ್ರೀಕರಣ ನಡೆದಿದೆ. ಈಗಾಗಲೇ
ಚಿತ್ರೀಕರಣ ಮುಗಿಸಿರುವ ‘ರಿವೈಂಡ್’ಗೆ ಸೆನ್ಸಾರ್ ಮಂಡಳಿ ‘ಯು/ಎ’ ಸರ್ಟಿಫಿಕೇಟ್ ನೀಡಿದೆ.
