ಜೋಸ್ ಬಟ್ಲರ್ ಚೊಚ್ಚಲ ಟಿ20 ಶತಕ: ಇಂಗ್ಲೆಂಡ್ ಜಯಭೇರಿ

ಶಾರ್ಜಾ: ಟಿ20 ವಿಶ್ವಕಪ್ ಗೆಲ್ಲುವ ನೆಚ್ಚಿನ ತಂಡವೆನಿಸಿರುವ ಇಂಗ್ಲೆಂಡ್ ಸೆಮಿಫೈನಲ್ ಪ್ರವೇಶ ಮಾಡಿದೆ. ಸೂಪರ್-12 ಸುತ್ತಿನಲ್ಲಿ ಸತತ ನಾಲ್ಕನೇ ಗೆಲುವು ಪಡೆದಿದೆ. ಇಂದಿನ ಪಂದ್ಯದಲ್ಲಿ ಶ್ರೀಲಂಕಾ ವಿರುದ್ಧ ಇಂಗ್ಲೆಂಡ್ ಜಯಭೇರಿ ಭಾರಿಸಿತು.

ಇಂಗ್ಲೆಂಡ್ ಗೆಲ್ಲಲು ಒಡ್ಡಿದ 164 ರನ್ ಗುರಿಯನ್ನ ಬೆನ್ನತ್ತಿದ ಲಂಕಾ ಸಿಂಹಗಳು ಗೆಲುವಿಗೆ ಬಹಳ ಪ್ರಯತ್ನ ನಡೆಸಿದರು. ಅಂತಿಮವಾಗಿ 26 ರನ್​ಗಳಿಂದ ಪರಾಭವಗೊಂಡಿತು. ಇಂಗ್ಲೆಂಡ್ ತಂಡ ಈ ಗೆಲುವಿನೊಂದಿಗೆ ಇಂಗ್ಲೆಂಡ್ ಸೆಮಿಫೈನಲ್ ಪ್ರವೇಶ ಖಚಿತಗೊಂಡಿತು. ಇಂಗ್ಲೆಂಡ್ ಗೆಲುವಿನಲ್ಲಿ ಜೋಸ್ ಬಟ್ಲರ್ ಪಾತ್ರ ಮುಖ್ಯವಾಯಿತು. ವಿಕೆಟ್ ಕೀಪರ್ ಬ್ಯಾಟರ್ ಶತಕ ಈ ಪಂದ್ಯದ ಹೈಲೈಟ್ ಆಯಿತು. ಇಯಾನ್ ಮಾರ್ಗನ್ ಕೂಡ ಫಾರ್ಮ್​ಗೆ ಬಂದದ್ದು ಇಂಗ್ಲೆಂಡ್ ತಂಡಕ್ಕೆ ಡಬಲ್ ಸ್ವೀಟ್ ಸಿಕ್ಕಂತಾಯಿತು.

ಟಾಸ್ ಸೋತು ಮೊದಲು ಬ್ಯಾಟ್ ಮಾಡಿದ ಇಂಗ್ಲೆಂಡ್ ತಂಡ ಆರಂಭಿಕ ಆಘಾತ ಅನುಭವಿಸಿತು. 35 ರನ್​ಗೆ 3 ವಿಕೆಟ್ ಕಳೆದುಕೊಂಡಿತು. ಆದರೆ, ಜೋಸ್ ಬಟ್ಲರ್ ದೃತಿಗೆಡಲಿಲ್ಲ. ನಾಯಕ ಇಯಾನ್ ಮಾರ್ಗನ್ 4ನೇ ವಿಕೆಟ್​ಗೆ 112 ರನ್ ಜೊತೆಯಾಟ ಆಡಿದರು. ಜೋಸ್ ಬಟ್ಲರ್ ಕೇವಲ 67 ಬಾಲ್​ನಲ್ಲಿ ಅವರು 101 ರನ್ ಗಳಿಸಿ ಕೊನೆಯವರೆಗೂ ಉಳಿದರು. ಇವರ ಅಮೋಘ ಬ್ಯಾಟಿಂಗ್​ನಿಂದಾಗಿ ಇಂಗ್ಲೆಂಡ್ 163 ರನ್ ಗಳಿಸಲು ಶಕ್ಯವಾಯಿತು.

ಜೋಸ್ ಬಟ್ಲರ್ ಅವರದ್ದು ಇದು ಚೊಚ್ಚಲ ಟಿ20 ಶತಕವಾಗಿದೆ. ಈ ಟಿ20 ವಿಶ್ವಕಪ್​ನಲ್ಲಿ ಬಂದ ಮೊದಲ ಶತಕವೂ ಇದಾಗಿದೆ.

ಇಂಗ್ಲೆಂಡ್​ನಂತೆ ಚೇತರಿಸಿಕೊಳ್ಳದ ಲಂಕನ್ನರು 11ನೇ ಓವರ್​ವರೆಗೂ ವಿಕೆಟ್ ಕಳೆದುಕೊಳ್ಳುತ್ತಾ ಹೋದರು. 76 ರನ್​ಗೆ 5 ವಿಕೆಟ್ ಕಳೆದುಕೊಂಡ ಶ್ರೀಲಂಕಾ ಸೋಲಿನ ಸುಳಿಗೆ ಸಿಲುಕಿತು. ಆದರೆ, ನಾಯಕ ದಾಸುನ್ ಶಾನಕ ಮತ್ತು ವನಿಂದು ಹಸರಂಗ ಲಂಕಾ ಇನ್ನಿಂಗ್ಸ್​ಗೆ ಚೇತರಿಕೆ ನೀಡಿದರು.

ಹಸರಂಗ ಮತ್ತು ಶಾನಕ ಅವರು 6ನೇ ವಿಕೆಟ್​ಗೆ 53 ರನ್ ಜೊತೆಯಾಟ ನೀಡಿದರು. ಬೌಂಡರಿ ಗೆರೆಯಲ್ಲಿ ಇಂಗ್ಲೆಂಡ್ ಫೀಲ್ಡರ್​​ಗಳು ಅದ್ಭುತವಾಗಿ ಹಿಡಿದ ಕ್ಯಾಚ್​ಗೆ ಹಸರಂಗ ಬಲಿಯಾದರು. ಅಲ್ಲಿಂದ ಇಂಗ್ಲೆಂಡ್ ಕಡೆಗೆ ಪಂದ್ಯ ಮತ್ತೆ ವಾಲಿತು. ನಾಯಕ ಶಾನಕ ದುರದೃಷ್ಟಕರ ರೀತಿಯಲ್ಲಿ ರನ್ ಔಟ್ ಆದರು. ಇಂಗ್ಲೆಂಡ್ ಈ ಗೆಲುವಿನೊಂದಿಗೆ 4 ಪಂದ್ಯಗಳಿಂದ 8 ಅಂಕ ಗಳಿಸಿ ಸೆಮಿಫೈನಲ್ ಪ್ರವೇಶ ಖಚಿತಪಡಿಸಿಕೊಂಡಿದೆ. ಶ್ರೀಲಂಕಾ ತಂಡದ ಸೆಮಿಫೈನಲ್ ಆಸೆ ಬಹುತೇಕ ಕಮರಿ ದಂತಾಗಿದೆ.

ಶ್ರೀಲಂಕಾ ತನ್ನ ಮುಂದಿನ ಪಂದ್ಯವನ್ನು ಅಬುಧಾಬಿಯಲ್ಲಿ ನ.4ರಂದು ವೆಸ್ಟ್ ಇಂಡೀಸ್ ವಿರುದ್ಧ ಆಡಲಿದೆ. ನ.6ರಂದು ಸೌತ್ ಆಫ್ರಿಕಾ ವಿರುದ್ಧ ಇಂಗ್ಲೆಂಡ್ ಆಡಲಿದೆ.

ಸ್ಕೋರು ವಿವರ:

ಇಂಗ್ಲೆಂಡ್ 20 ಓವರ್ 163/4
(ಜೋಸ್ ಬಟ್ಲರ್ ಅಜೇಯ 101, ಇಯಾನ್ ಮಾರ್ಗನ್ 40 ರನ್- ವನಿಂದು ಹಸರಂಗ 21/3)

ಶ್ರೀಲಂಕಾ 19 ಓವರ್ 137/10
(ಚರಿತ್ ಅಸಲಂಕಾ 21, ಭನುಕ ರಾಜಪಕ್ಸ 26, ವನಿಂದು ಹಸರಂಗ 34, ದಾಸುನ್ ಶಾನಕ 26 ರನ್- ಅದಿಲ್ ರಶೀದ್ 19/2)