ಮುಂಬೈ : ಸಾಯಿನಗರ ಕಂಡಿವಲಿ ಪಶ್ಚಿಮದ ಮಂಗಲ್ಮಯಿ ಕಟ್ಟಡದ ಹೊರಭಾಗದ ಚರಂಡಿಯಲ್ಲಿ 14 ನಾಯಿಗಳ ಶವ(Dead Body of Dog) ಪತ್ತೆಯಾಗಿದೆ(Mumbai Horror). ನಾಯಿಗಳ ಶವವನ್ನು ಗಮನಿಸಿದಾಗ ಅವುಗಳನ್ನು ಕ್ರೂರವಾಗಿ ಚಿತ್ರಹಿಂಸೆ ನೀಡಿ ಕೊಲ್ಲಲಾಗಿದೆ ಎಂಬುದಾಗಿ ತಿಳಿದುಬಂದಿದೆ. ನಾಯಿಗಳನ್ನು ಈ ರೀತಿ ಕ್ರೂರವಾಗಿ ಕೊಂದು ಚರಂಡಿಗೆ ಎಸೆದವರು ಯಾರು ಎಂಬ ಪ್ರಶ್ನೆ ಮೂಡಿದೆ.
ಶ್ವಾನ ಪ್ರೇಮಿ ಮತ್ತು ಕಂಡಿವಲಿ ನಿವಾಸಿ ಹೀನಾ ಲಂಬಾಚಿಯಾ ಈ ಬಗ್ಗೆ ಇನ್ಸ್ಟಾಗ್ರಾಂನಲ್ಲಿ ವಿಡಿಯೊವನ್ನು ಪೋಸ್ಟ್ ಮಾಡಿದ್ದಾರೆ. ವಿಡಿಯೊದಲ್ಲಿ, ‘ನಾಯಿಗಳನ್ನು ತುಂಬಾ ಕ್ರೂರವಾಗಿ ಕೊಲ್ಲಲಾಗಿದೆ. ನಾಯಿಗಳ ಹೆಸರು ಮತ್ತು ಅವುಗಳ ಬಗ್ಗೆ ನಮಗೆ ತಿಳಿದಿಲ್ಲ. ಆದರೆ ಅವುಗಳನ್ನು ಸಾಕಿದವರು ಅವುಗಳನ್ನು ಈ ಪರಿಸ್ಥಿತಿಯಲ್ಲಿ ನೋಡಿದಾಗ ನೋವನ್ನು ಅನುಭವಿಸುತ್ತಾರೆ. ಯಾರಾದರೂ ಮುಗ್ಧ ಜೀವಿಗಳಿಗೆ ಅಂತಹ ನೋವನ್ನು ಹೇಗೆ ನೀಡಲು ಸಾಧ್ಯ? ಈ ಬಗ್ಗೆ ನಾವು ಧ್ವನಿ ಎತ್ತುತ್ತೇವೆ, ನ್ಯಾಯವನ್ನು ಕೇಳುತ್ತೇವೆ ಮತ್ತು ಇದಕ್ಕೆ ಕಾರಣರಾದವರ ವಿರುದ್ಧ ಹೋರಾಡುವುದು ನಮ್ಮ ಜವಾಬ್ದಾರಿಯಾಗಿದೆ’ ಎಂದು ಬರೆದು ಅದನ್ನು ಶ್ವಾನ ಪ್ರೇಮಿಯಾದ ಪೊಲೀಸ್ ಅಧಿಕಾರಿ ಸುಧೀರ್ ಕುಡಲ್ಕರ್ ಮತ್ತು ಅವರ ಪಾಲ್ ಫೌಂಡೇಶನ್‍ಗೆ ಟ್ಯಾಗ್ ಮಾಡಿದ್ದಾರೆ.
ಈ ಘಟನೆಯ ಬಗ್ಗೆ ಕಂಡಿವಲಿ ಪೊಲೀಸರು ಪ್ರಾಣಿ ಕ್ರೌರ್ಯ ಪ್ರಕರಣದ ಅಡಿಯಲ್ಲಿ ಎಫ್ಐಆರ್ ದಾಖಲಿಸಿದ್ದಾರೆ. ಭಾರತೀಯ ನ್ಯಾಯ ಸಂಹಿತಾ (ಬಿಎನ್ಎಸ್, 2023) ಸೆಕ್ಷನ್ 325 ಮತ್ತು ಪ್ರಾಣಿ ಕ್ರೌರ್ಯ ತಡೆ ಕಾಯ್ದೆ, 1960 ರ ಸೆಕ್ಷನ್ 11 ರ ಅಡಿಯಲ್ಲಿ ಅಪರಾಧವನ್ನು ದಾಖಲಿಸಲಾಗಿದೆ. ನವೆಂಬರ್ 9 ರಂದು ಈ ಆಘಾತಕಾರಿ ಘಟನೆ ನಡೆದಿದೆ ಎಂಬುದಾಗಿ ತಿಳಿದುಬಂದಿದೆ.
ಆರೋಪಿಗಳು ನಾಯಿಗಳ ಕಾಲುಗಳನ್ನು ಕತ್ತರಿಸಿ ಕೊಂದಿದ್ದಾರೆ. ಈ ಬಗ್ಗೆ ತನಿಖೆ ಮಾಡಿ ಆರೋಪಿಗಳನ್ನು ಪತ್ತೆ ಮಾಡುವುದಾಗಿ ಪೊಲೀಸ್ ಅಧಿಕಾರಿ ಸುಧೀರ್ ಕುಡಲ್ಕರ್ ತಿಳಿಸಿದ್ದಾರೆ.
ಇದನ್ನೂ ಓದಿ:ಟ್ರಾಫಿಕ್ ಕ್ಯಾಮೆರಾ ಮುಂದೆ ಸಖತ್ತಾಗಿ ಪೋಸ್ ನೀಡಿದ ‘ಆಂಗ್ರಿ’ ಮೈನಾ; ವಿಡಿಯೊ ವೈರಲ್
ಈ ಹಿಂದೆ ಕೂಡ ಮುಂಬೈನ ಮಲಾಡ್ ಪ್ರದೇಶದ ಹೌಸಿಂಗ್ ಸೊಸೈಟಿಯಲ್ಲಿ ಆರು ವರ್ಷದ ಸಾಕು ನಾಯಿ ಸಾವನ್ನಪ್ಪಿದ ನಂತರ ಎಫ್ಐಆರ್ ದಾಖಲಿಸಲಾಗಿದೆ. ಇಲಿ ಪಾಷಣವನ್ನು ಗೋಧಿ ಮತ್ತು ಮೆಕ್ಕೆಜೋಳದ ಕಾಳುಗಳ ಮೇಲೆ ಸಿಂಪಡಿಸಿ ಅದನ್ನು ನೆಲದ ಮೇಲೆ ಹರಡಿ ನಾಯಿ ತಿನ್ನುವಂತೆ ಮಾಡಿದ್ದಾರೆ. ಇದನ್ನು ತಿಂದ ನಾಯಿ ಸಾವನಪ್ಪಿದೆ.
