Viral Video: ಮರಿಗಳಿಗೆ ಹಾಲುಣಿಸುತ್ತಿದ್ದ ಬೀದಿನಾಯಿಯ ಮೇಲೆ ದಾಳಿ ಮಾಡಿದ ಪಿಟ್‌ಬುಲ್‌!

ಮುಂಬೈ: ಮಹಾರಾಷ್ಟ್ರದ ಔರಂಗಾಬಾದ್‍ನಲ್ಲಿ ಮಾಲೀಕನ ಮುಂದೆಯೇ ಪಿಟ್‌ಬುಲ್‌ವೊಂದು ಬೀದಿ ನಾಯಿಯ ಮೇಲೆ ಕ್ರೂರವಾಗಿ ದಾಳಿ ಮಾಡಿ ತೀವ್ರವಾಗಿ ಗಾಯಗೊಳಿಸಿದ ಭೀಕರವಾದ ಘಟನೆ ನಡೆದಿರುವುದಾಗಿ ವರದಿಯಾಗಿದೆ. ಈ ಘಟನೆಯು ಕ್ಯಾಮೆರಾದಲ್ಲಿ ಸೆರೆಯಾಗಿದ್ದು, ಘಟನೆಯ ವಿಡಿಯೊ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್(Viral Video) ಆಗಿದೆ. ಇದು ನೆಟ್ಟಿಗರಲ್ಲಿ ಆಕ್ರೋಶವನ್ನು ಉಂಟುಮಾಡಿದೆ.

ವೈರಲ್ ಆದ ವಿಡಿಯೊದಲ್ಲಿ ಪಿಟ್‌ಬುಲ್ ಬೀದಿ ನಾಯಿಯನ್ನು ಕ್ರೂರವಾಗಿ ಕಚ್ಚಿದ ದೃಶ್ಯ ಸೆರೆಯಾಗಿತ್ತು. ಮಾಲೀಕಳ ಮುಂದೆಯೇ ಈ ದಾಳಿ ನಡೆದಿದ್ದರೂ ಆಕೆ ತನ್ನ ಸಾಕುನಾಯಿಯನ್ನು ತಡೆಯಲಿಲ್ಲ. ಇದನ್ನು ಗಮನಿಸಿದ ವ್ಯಕ್ತಿಯೊಬ್ಬರು ಪಿಟ್‌ಬುಲ್‌ ಮೇಲೆ ಕಲ್ಲು ಎಸೆದು ಬೀದಿ ನಾಯಿಯನ್ನು ಉಳಿಸಲು ಪ್ರಯತ್ನಿಸಿದ್ದಾರೆ. ಪಿಟ್‌ಬುಲ್‌ ದಾಳಿಗೆ ಬೀದಿ ನಾಯಿಯ ಮೈಯಲ್ಲಾ ಗಾಯವಾಗಿ ರಕ್ತಸಿಕ್ತವಾಗಿತ್ತು.

ಔರಂಗಾಬಾದ್‍ನ ಚೇತನನಗರದಲ್ಲಿ ಈ ಘಟನೆ ನಡೆದಿದ್ದು, ಸೋಶಿಯಲ್ ಮೀಡಿಯಾ ನೆಟ್ಟಿಗರು ಇದರ ವಿಡಿಯೊವನ್ನು ಹಂಚಿಕೊಳ್ಳುವ ಮೂಲಕ ಈ ಘಟನೆಯನ್ನು ಬೆಳಕಿಗೆ ತಂದಿದ್ದಾರೆ. ಈ ಪ್ರದೇಶದಲ್ಲಿ ಬೀದಿ ನಾಯಿಗಳ ಮೇಲಿನ ಕ್ರೌರ್ಯದ ದುರಂತ ಮಾದರಿ ಮುಂದುವರೆದಿದೆ ಎಂದು ನೆಟ್ಟಿಗರೊಬ್ಬರು ಹೇಳಿದ್ದಾರೆ. ಮಾಲೀಕರ ಬೇಜವಾಬ್ದಾರಿ ವರ್ತನೆಯಿಂದ ಅನೇಕ ಬೀದಿ ನಾಯಿಗಳು ಈಗಾಗಲೇ ಪ್ರಾಣ ಕಳೆದುಕೊಂಡಿವೆ ಎಂದು ಪ್ರತ್ಯಕ್ಷದರ್ಶಿಗಳು ಹೇಳಿದ್ದಾರೆ.

ಈ ಘಟನೆಯ ವಿಡಿಯೊವನ್ನು "@streetdogsofbombay" ಇನ್‌ಸ್ಟಾಗ್ರಾಂನಲ್ಲಿ ಹಂಚಿಕೊಂಡಿದ್ದಾರೆ., ಮಾಲೀಕರ ಅಜಾಗರೂಕ ವರ್ತನೆಯಿಂದಾಗಿ ಅನೇಕ ಬೀದಿ ನಾಯಿಗಳು ಈಗಾಗಲೇ ಪ್ರಾಣ ಕಳೆದುಕೊಂಡಿರುವುದು ಇದೇ ಮೊದಲಲ್ಲ. ಈ ಹಿಂದೆ ಅನೇಕ ಎಫ್‍ಐಆರ್ ದಾಖಲಾಗಿದ್ದರೂ, ಏನೂ ಬದಲಾಗಿಲ್ಲ. ರಾಜಕೀಯ ಬೆಂಬಲದಿಂದಾಗಿ ಮಾಲೀಕರು ಪರಾರಿಯಾಗುತ್ತಲೇ ಇದ್ದಾರೆ.

ಇನ್ನೂ ಎಷ್ಟು ಜೀವಗಳನ್ನು ಕಳೆದುಕೊಳ್ಳಬೇಕು? ಈ ಕ್ರೌರ್ಯವನ್ನು ನಿಲ್ಲಿಸಲು ಮತ್ತು ಮುಗ್ಧ ಪ್ರಾಣಿಗಳನ್ನು ರಕ್ಷಿಸಲು ಒಟ್ಟಾಗಿ ಕೆಲಸ ಮಾಡೋಣ. ನಾಯಿಗಳಿಗೆ ಮಾತನಾಡಲು ಸಾಧ್ಯವಿಲ್ಲ, ಆದರೆ ನಾವು ಅವುಗಳ ಪರವಾಗಿ ಮಾತನಾಡಬಹುದು” ಎಂದು ಪೋಸ್ಟ್‌ನಲ್ಲಿ ಬರೆಯಲಾಗಿದೆ.

ಈ ಸುದ್ದಿಯನ್ನೂ ಓದಿ:Dog Attack: 4 ವರ್ಷದ ಮಗನ ಮುಂದೆಯೇ ತಂದೆಯನ್ನು ಬರ್ಬರವಾಗಿ ಕಚ್ಚಿ ಕೊಂದ ಸಾಕು ನಾಯಿಗಳು; ಶಾಕಿಂಗ್‌ ವಿಡಿಯೊ ವೈರಲ್‌

ದಾಳಿಗೊಳಗಾದ ಬೀದಿ ನಾಯಿ ನಾಯಿಮರಿಗಳಿಗೆ ಹಾಲುಣಿಸುವ ತಾಯಿಯಾಗಿದ್ದು, ಸದ್ಯ ಅದರ ಸ್ಥಿತಿ ಗಂಭೀರವಾಗಿದ್ದು, ಆಸ್ಪತ್ರೆಗೆ ದಾಖಲಿಸಲಾಗಿದೆ ಎಂದು ಸೋಶಿಯಲ್ ಮೀಡಿಯಾ ಪೋಸ್ಟ್‍ನಲ್ಲಿ ತಿಳಿಸಲಾಗಿದೆ.