ಬೆಂಗಳೂರು: ನಾಡು, ನುಡಿಯ ವಿಚಾರದಲ್ಲಿ ಕನ್ನಡಿಗರು ಎಂದಿಗೂ ಸ್ವಾಭಿಮಾನಿಗಳು. ಅಂತಹ ಸ್ವಾಭಿಮಾನವನ್ನು ಕೆಣಕು ವಂತಹ ಕೆಲಸವನ್ನು ಗುರುವಾರ ಗೂಗಲ್ ಮಾಡಿತು. ಆದರೆ, ಗೂಗಲ್ನ ಈ ಕಾರ್ಯದ ವಿರುದ್ಧ ತಿರುಗಿಬಿದ್ದ ಕನ್ನಡಿಗರು ಅದಕ್ಕೆ ಪ್ರತ್ಯುತ್ತರ ನೀಡಿದ್ದಾರೆ. ಇದರ ಪ್ರತಿಫಲವಾಗಿ ಗೂಗಲ್ ಈಗ ತನ್ನ ಪ್ರಮಾದ ಅರಿತು, ತಪ್ಪು ತಿದ್ದುಕೊಂಡಿದೆ.
ಕಳೆದ ಎರಡು ಮೂರು ಗಂಟೆಗಳಲ್ಲಿ ದೇಶದಲ್ಲಿ ಅದರಲ್ಲಿಯೂ ರಾಜ್ಯದಲ್ಲಿ ಸಂಚಲನ ಮೂಡಿಸಿದ್ದ ಗೂಗಲ್ಗೆ ಕನ್ನಡಿಗರು ತಕ್ಕ ಉತ್ತರ ನೀಡಿ ಫೀಡ್ ಬ್ಯಾಕ್ (feedback) ನೀಡಿದ್ದಾರೆ. ಕನ್ನಡಿಗರು ನಿರಂತರ ವಾಗಿ ಇದಕ್ಕೆ ಫೀಡ್ಬ್ಯಾಕ್ ನೀಡಿದ ಹಿನ್ನಲೆ ಗೂಗಲ್ನ ತನ್ನ ಪ್ರಮಾದ ಅರಿತು ತಪ್ಪು ಸರಿಪಡಿಸಿದೆ.
ಭಾರತದ ಕೊಳಕು ಭಾಷೆ (ugliest language in inda) ಯಾವುದು ಎಂಬ ಪ್ರಶ್ನೆಯನ್ನು ಗೂಗಲ್ನಲ್ಲಿ ಸರ್ಚ್ ಮಾಡಿದಾಕ್ಷಣ ಅದು ಕನ್ನಡ (Kannada) ಎಂದು ತೋರಿಸುತ್ತಿತ್ತು. ಈ ವಿಚಾರ ಕನ್ನಡಿಗರ ರೋಷವನ್ನು ಬಡಿದೆಬ್ಬಿಸಿತು.
ಇದಕ್ಕೆ ಪರ್ಯಾಯವಾಗಿ ಗೂಗಲ್ನಲ್ಲಿ ಕ್ವೀನ್ ಆಫ್ ಲಾಂಗ್ವೇಜ್., ಭಾಷೆಯ ರಾಣಿ ಎಂಬ ಹುಡುಕಾಟ ಕೂಡ ಹೆಚ್ಚಾಗಿ ನಡೆಯಿತು. ಅತಿ ಹೆಚ್ಚು ವರ್ಣಮಾಲೆ, ಸಾಹಿತ್ಯ, ಭಾಷಾ ಸೊಗಡನ್ನು ಹೊಂದಿರುವ ಬಗ್ಗೆ ಕೂಡ ಹುಡುಕಾಟ ನಡೆಸಲಾಯಿತು.
ಈ ಎಲ್ಲಾ ಬೆಳವಣಿಗೆ ಬೆನ್ನಲ್ಲೇ ಅರಿವಿಗೆ ಬಂದ ಗೂಗಲ್ ಇದನ್ನು ಸರಿಪಡಿಸಿದೆ. ಇದೀಗ ಯಾವುದು ಕೊಳಕು ಭಾಷೆ ಎಂದು ಗೂಗಲ್ನಲ್ಲಿ ಟೈಪ್ ಮಾಡಿದರೆ, ಪ್ರತಿಯೊಂದು ಭಾಷೆಯೂ ತನ್ನದೇ ಆದ ಗೌರವವಿದೆ ಎಂಬ ಅಭಿಪ್ರಾಯ ಕಾಣಿಸುತ್ತಿದೆ.
ಗೂಗಲ್ ನಲ್ಲಿ ಮಾಹಿತಿ ಕುರಿತು ಬಳಕೆದಾರರು ನೀಡಿದ ಫೀಡ್ ಬ್ಯಾಕ್ ಆಧಾರ ಅದು ಫಲಿತಾಂಶವನ್ನು ಅದು ತೋರಿಸುತ್ತದೆ. ಇದೇ ಹಿನ್ನಲೆ ಕನ್ನಡಿಗರು ಸ್ವಯಂ ಆಗಿ ಈ ತಪ್ಪನ್ನು ಅಳಿಸಲು ಮುಂದಾದರು. ಗೂಗಲ್ನಲ್ಲಿ Ugliest Language in India ಎಂದು ಸರ್ಚ್ ಮಾಡಿದಾಕ್ಷಣ ಬಂದ ಉತ್ತರದ ಕೆಳಗೆ ಫೀಡ್ಬ್ಯಾಕ್ (feed back) ಎಂದು ಕ್ಲಿಕ್ ಮಾಡಿದರೆ, ಅದರಲ್ಲಿ ಬರುವ ಆಯ್ಕೆಗಳನ್ನು ಸೆಲೆಕ್ಟ್ ಮಾಡಿದಾಕ್ಷಣ ಮೂಡುವ ಆಯ್ಕೆಯಲ್ಲಿ ಇದು ಅಪರಾಧ (its hateful ) ಎಂಬ ಆಯ್ಕೆಯನ್ನು ಕ್ಲಿಕ್ ಮಾಡಿ ಅಭಿಪ್ರಾಯ ತಿಳಿಸುವ ಆಯ್ಕೆ ಇದೆ. ಸಾವಿರಾರು ಸಂಖ್ಯೆಯಲ್ಲಿ ಕನ್ನಡಿಗರು ಇದಕ್ಕೆ ವರದಿ ಮಾಡಿದ ಹಿನ್ನೆಲೆ ಗೂಗಲ್ ತನ್ನ ತಪ್ಪನ್ನು ಸರಿಪಡಿಸಿಕೊಂಡಿದೆ.
