Corbin Bosch: ಐಪಿಎಲ್ ಆಡಲು ಬಂದ ದಕ್ಷಿಣ ಆಫ್ರಿಕಾ ಆಟಗಾರನಿಗೆ ನೋಟಿಸ್ ಜಾರಿ ಮಾಡಿದ ಪಾಕ್‌
IPL 2025: ಕಾರ್ಬಿನ್‌ ಬಾಶ್‌ಗೆ ಲೀಗಲ್‌ ನೋಟಿಸ್ ನೀಡಿರುವ ಪಾಕಿಸ್ತಾನ ಕ್ರಿಕೆಟ್‌ ಮಂಡಳಿ, ಒಪ್ಪಂದದಿಂದ ಹಿಂದೆ ಸರಿದಿರುವುದರ ಕುರಿತು ನಿಗದಿತ ಸಮಯದೊಳಗೆ ಸಮರ್ಥನೆ ನೀಡುವಂತೆ ಕೇಳಿದೆ. 30 ವರ್ಷದ ಕಾರ್ಬಿನ್‌ ಬಾಶ್‌ ದಕ್ಷಿಣ ಆಫ್ರಿಕಾದ ಟಿ20 ಲೀಗ್‌ನಲ್ಲಿ ಮುಂಬೈ ಫ್ರಾಂಚೈಸಿಯ ಎಂಐ ಕೇಪ್ಟೌನ್ ತಂಡದ ಆಟಗಾರನಾಗಿದ್ದಾರೆ.
Abhilash BC
Mar 17, 2025 2:27 PM
ಲಾಹೋರ್‌: ಐಪಿಎಲ್ ಆಡುವ ನಿಟ್ಟಿನಲ್ಲಿ ಪಾಕಿಸ್ತಾನ ಸೂಪರ್‌ ಲೀಗ್‌(PSL)ನಿಂದ ಹಿಂದೆ ಸರಿದ ದಕ್ಷಿಣ ಆಫ್ರಿಕಾದ ಆಲ್‌ರೌಂಡರ್‌ ಕಾರ್ಬಿನ್‌ ಬಾಶ್‌(Corbin Bosch)ಗೆ ಪಾಕಿಸ್ತಾನ ಕ್ರಿಕೆಟ್‌ ಮಂಡಳಿ ನೋಟಿಸ್ ಜಾರಿ ಮಾಡಿದೆ. ಬಾಶ್‌ ಅವರು ಇತ್ತೀಗೆಗೆ ಗಾಯಗೊಂಡು ಐಪಿಎಲ್‌ನಿಂದ ಹೊರಬಿದ್ದಿದ್ದ ಲಿಜಾಡ್‌ ವಿಲಿಯಮ್ಸ್‌ ಸ್ಥಾನಕ್ಕೆ ಬದಲಿ ಆಟಗಾರನಾಗಿ ಮುಂಬೈ ಇಂಡಿಯನ್ಸ್(Mumbai Indians) ತಂಡ ಸೇರಿದ್ದರು. ಪಿಎಸ್‌ನಲ್ಲಿ ಅವರು ಪೇಶಾವರ ಝಾಲ್ಮಿ ತಂಡದ ಆಟಗಾರನಾಗಿದ್ದರು. ಐಪಿಎಲ್‌ಗೆ ಸಡ್ಡು ಹೊಡೆಯಲೆಂದೇ ಕುತಂತ್ರಿ ಪಾಕಿಸ್ತಾನ ಈ ಬಾರಿ ತನ್ನ ಕ್ರಿಕೆಟ್‌ ಲೀಗನ್ನು ಐಪಿಎಲ್ ಸಮಯದಲ್ಲೇ ನಡೆಸುತ್ತಿದೆ.
ಕಾರ್ಬಿನ್‌ ಬಾಶ್‌ಗೆ ಲೀಗಲ್‌ ನೋಟಿಸ್ ನೀಡಿರುವ ಪಾಕಿಸ್ತಾನ ಕ್ರಿಕೆಟ್‌ ಮಂಡಳಿ, ಒಪ್ಪಂದದಿಂದ ಹಿಂದೆ ಸರಿದಿರುವುದರ ಕುರಿತು ನಿಗದಿತ ಸಮಯದೊಳಗೆ ಸಮರ್ಥನೆ ನೀಡುವಂತೆ ಕೇಳಿದೆ. 30 ವರ್ಷದ ಕಾರ್ಬಿನ್‌ ಬಾಶ್‌ ದಕ್ಷಿಣ ಆಫ್ರಿಕಾದ ಟಿ20 ಲೀಗ್‌ನಲ್ಲಿ ಮುಂಬೈ ಫ್ರಾಂಚೈಸಿಯ ಎಂಐ ಕೇಪ್ಟೌನ್ ತಂಡದ ಆಟಗಾರನಾಗಿದ್ದಾರೆ. ಟಿ20 ಕ್ರಿಕೆಟ್‌ನಲ್ಲಿ ಅವರು ಇದುವರೆಗೆ 59 ವಿಕೆಟ್‌ ಕಿತ್ತಿದ್ದಾರೆ.
ಮೊದಲ ಪಂದ್ಯಕ್ಕೆ ಸೂರ್ಯಕುಮಾರ್‌ ನಾಯಕ?
ಮುಂಬೈ ತಂಡ ಮಾರ್ಚ್‌ 23 ರಂದು ಚೆನ್ನೈ ಸೂಪರ್‌ ಕಿಂಗ್ಸ್‌ ವಿರುದ್ಧ ಆಡುವ ಮೂಲಕ ತನ್ನ ಅಭಿಯಾನ ಆರಂಭಿಸಲಿದೆ. ಆದರೆ ಕಳೆದ ಐಪಿಎಲ್ ಸೀಸನ್‌ನಲ್ಲಿ ಮುಂಬೈ ಇಂಡಿಯನ್ಸ್(Mumbai Indians) ತಂಡ 3 ಸಲ ನಿಧಾನ ಗತಿಯ ಓವರ್‌ ರೇಟ್‌ ಕಾಯ್ದುಕೊಂಡ ತಪ್ಪಿಗೆ ತಂಡದ ನಾಯಕ ಹಾರ್ದಿಕ್‌ ಪಾಂಡ್ಯ(Hardik Pandya) ಈ ಪಂದ್ಯದಿಂದ ನಿಷೇಧಕ್ಕೊಳಗಾಗಲಿದ್ದಾರೆ. ಹೀಗಾಗಿ ಮೊದಲ ಪಂದ್ಯದಲ್ಲಿ ತಂಡವನ್ನು ಟೀಮ್‌ ಇಂಡಿಯಾದ ಟಿ20 ನಾಯಕ ಸೂರ್ಯಕುಮಾರ್‌ ಯಾದವ್‌ ಅವರು ಮುನ್ನಡೆಸುವ ಸಾಧ್ಯತೆಯಿದೆ. ಮಾರ್ಚ್‌ 29 ರಂದು ನಡೆಯುವ ಗುಜರಾತ್‌ ಟೈಟಾನ್ಸ್‌ ವಿರುದ್ಧದ ದ್ವಿತೀಯ ಪಂದ್ಯಲ್ಲಿ ಪಾಂಡ್ಯ ನಿಷೇಧ ಮುಕ್ತವಾಗಿ ಮೈದಾನಕ್ಕಿಳಿಯಬಹುದು.
ಇದನ್ನೂ ಓದಿ IPL 2025: ಉಮ್ರಾನ್‌ ಮಲಿಕ್‌ ಸ್ಥಾನಕ್ಕೆ ಚೇತನ್‌ ಸಕಾರಿಯ ಬದಲಿ ಆಟಗಾರ
ಇನ್ನೊಂದೆಡೆ ಸಂಪೂರ್ಣ ಫಿಟ್ನೆಸ್ ಹೊಂದಿಲ್ಲದ ಕಾರಣ ಜಸ್‌ಪ್ರೀತ್‌ ಬುಮ್ರಾ ಮೊದಲ 5 ಪಂದ್ಯಗಳಿಗೆ ಅಲಭ್ಯರಾಗಲಿದ್ದಾರೆ ಎನ್ನಲಾಗಿದೆ. ಕೆಲ ದಿನಗಳ ಹಿಂದೆ ಮುಂಬೈ ಇಂಡಿಯನ್ಸ್ ತಂಡದ ಅಭ್ಯಾಸ ಶಿಬಿರದಲ್ಲಿ ಕಾಣಿಸಿಕೊಂಡಿದ್ದ ಬುಮ್ರಾ ಐಪಿಎಲ್ನಲ್ಲಿ ಕಾಣಿಸಿಕೊಳ್ಳುವ ಮುನ್ಸೂಚನೆಯನ್ನು ನೀಡಿದ್ದರು. ಆದರೆ, ಫಿಟ್ನೆಸ್ ಪರೀಕ್ಷೆಯಲ್ಲಿ ಬುಮ್ರಾ ಸಂಪೂರ್ಣವಾಗಿ ಗುಣಮುಖರಾಗಿಲ್ಲ ಎಂದು ತಿಳಿದು ಬಂದಿದೆ.
ಮುಂಬೈ ಇಂಡಿಯನ್ಸ್ ತಂಡ
ಜಸ್‌ಪ್ರೀತ್‌ ಬುಮ್ರಾ, ಸೂರ್ಯಕುಮಾರ್‌ ಯಾದವ್‌, ಹಾರ್ದಿಕ್‌ ಪಾಂಡ್ಯ, ರೋಹಿತ್‌ ಶರ್ಮಾ, ತಿಲಕ್‌ ವರ್ಮಾ, ಟ್ರೆಂಟ್ ಬೌಲ್ಟ್, ನಮನ್ ಧೀರ್, ರಾಬಿನ್ ಮಿಂಜ್, ಕರ್ಣ್ ಶರ್ಮ, ದೀಪಕ್ ಚಹರ್ ,ವಿಲ್ ಜಾಕ್ಸ್ , ಮಿಚೆಲ್ ಸ್ಯಾಂಟ್ನರ್ , ರ್ಯಾನ್ ರಿಕೆಲ್ಟನ್ , ಅಶ್ವನಿ ಕುಮಾರ್, ರೀಸ್ ಟಾಪ್ಲೆ, ಕೆಎಲ್ ಶ್ರೀಜಿತ್ , ರಾಜ್ ಅಂಗದ್ ಬಾವ , ಸತ್ಯನಾರಾಯಣ ರಾಜು, ಬೆವನ್ ಜೇಕಬ್ಸ್, ವಿಘ್ನೇಶ್ ಪುಥರ್, ಅರ್ಜುನ್ ತೆಂಡೂಲ್ಕರ್, ಕಾರ್ಬಿನ್‌ ಬಾಶ್‌.