Chikkaballapur News: ಚಿಕ್ಕಬಳ್ಳಾಪುರದಲ್ಲಿ ಬೆಟ್ಟ ಅಗೆದು ಇಲಿ ಹಿಡಿದಂತಾದ ಬಿ-ಖಾತಾ ಅಭಿಯಾನ!
Chikkaballapur News: ಮೂರು ದಿನಗಳ ಅಭಿಯಾನದಲ್ಲಿ ಕೇವಲ 2418 ಅರ್ಜಿಗಳು ಸಲ್ಲಿಕೆಯಾಗಿದ್ದು, ಅನಧಿಕೃತ ಆಸ್ತಿಗಳ ಮಾಲೀಕರಿಗೆ ಮತ್ತೆ ಎರಡು ದಿನ ಅವಕಾಶ ನೀಡಲಾಗಿದೆ. ಮುಖ್ಯಮಂತ್ರಿಗಳೇ ವಿಡಿಯೋ ಕಾನ್ಫರೆನ್ಸ್ ನಡೆಸಿ ಯಶಸ್ವಿಗೊಳಿಸಲು ಸೂಚಿಸಿದ್ದರು. ಆದರೆ, ಅಭಿಯಾನಕ್ಕೆ ನಿರೀಕ್ಷಿಸಿದಷ್ಟು ಪ್ರತಿಕ್ರಿಯೆ ವ್ಯಕ್ತವಾಗಿಲ್ಲ.
Prabhakara R
Feb 23, 2025 4:56 PM
ಚಿಕ್ಕಬಳ್ಳಾಪುರ: ಅನಧಿಕೃತ ರೆವಿನ್ಯೂ ಬಡಾವಣೆ, ಮನೆ, ನಿವೇಶನ ಇತ್ಯಾದಿ ಆಸ್ತಿಗಳನ್ನು ತೆರಿಗೆ ವ್ಯಾಪ್ತಿಗೆ ತಂದು ಅಧಿಕೃತವಾಗಿ ಆಸ್ತಿಯ ಹಕ್ಕು ನೀಡಲು ಉದ್ದೇಶಿಸಿರುವ ಬಿ-ಖಾತಾ ಅಭಿಯಾನದ (B Khata campaign) ಪ್ರಗತಿ, ಚಿಕ್ಕಬಳ್ಳಾಪುರ ನಗರಸಭೆಯಲ್ಲಿ ನಿರೀಕ್ಷಿತ ಗುರಿಮುಟ್ಟುವಲ್ಲಿ ಸಂಪೂರ್ಣವಾಗಿ ವಿಫಲವಾಗಿದ್ದು, ಇದೊಂತರ ಬೆಟ್ಟ ಅಗೆದು ಇಲಿ ಹಿಡಿದಂತಾಗಿದೆ. ಹೌದು. ರಾಜ್ಯದಲ್ಲಿ ಅನಧಿಕೃತ ಬಡಾವಣೆಗಳಿಗೆ ಕಡಿವಾಣ ಹಾಕಲು ಮುಂದಾಗಿರುವ ರಾಜ್ಯ ಸರಕಾರ 90 ದಿನಗಳ ಅವಧಿ ನಿಗಧಿಪಡಿಸಿ ಒನ್‌ಟೈಮ್ ಸೆಟಲ್‌ಮೆಂಟ್ ಎಂಬಂತೆ ಬಿ ಖಾತಾ ಆಂದೋಲನಕ್ಕೆ ಫೆ. 20ರಂದು ಚಾಲನೆ ನೀಡಿತ್ತು. ಮುಖ್ಯಮಂತ್ರಿಗಳೇ ವಿಡಿಯೋ ಕಾನ್ಫರೆನ್ಸ್ ನಡೆಸಿ ರಾಜ್ಯದ ಎಲ್ಲಾ ಜಿಲ್ಲಾಧಿಕಾರಿಗಳು, ನಗರಸಭೆ ಪುರಸಭೆ ಪಟ್ಟಣಸಭೆ ಆಯುಕ್ತರಿಗೆ ಈ ಸಂಬಂಧ ಖಡಕ್ ಸೂಚನೆ ನೀಡಿದ್ದು, ಭ್ರಷ್ಟಾಚಾರಕ್ಕೆ ಆಸ್ಪದ ನೀಡದಂತೆ ಅಭಿಯಾನ ಯಶಸ್ವಿಗೊಳಿಸಲು ಸೂಚಿಸಿದ್ದರು. ಆದರೆ, ಈ ಅಭಿಯಾನಕ್ಕೆ ನಿರೀಕ್ಷಿಸಿದಷ್ಟು ಪ್ರತಿಕ್ರಿಯೆ ವ್ಯಕ್ತವಾಗುತ್ತಿಲ್ಲ.
ಮುಖ್ಯಮಂತ್ರಿಗಳ ಆದೇಶವನ್ನು ಗಂಭೀರವಾಗಿ ತೆಗೆದುಕೊಂಡ ಶಾಸಕ ಪ್ರದೀಪ್ ಈಶ್ವರ್ ಅವರು ಫೆ.18 ರಿಂದಲೇ ಕ್ಷೇತ್ರದಲ್ಲಿ ಬೀಡುಬಿಟ್ಟು ನಗರವಾಸಿಗಳಿಗೆ ಬಿ-ಖಾತೆ ಮಾಡಿಸಿಕೊಳ್ಳುವಂತೆ ಮನವರಿಕೆ ಮಾಡುತ್ತಾ ವ್ಯಾಪಕವಾದ ಪ್ರಚಾರ ನೀಡಿದ್ದರು. ತಾವು ಹೋದಲ್ಲಿ ಬಂದಲ್ಲಿ ಬಿ-ಖಾತಾ ಬಗ್ಗೆಯೇ ತಿಳಿವಳಿಕೆ ಮೂಡಿಸುತ್ತಾ, ಮಾಧ್ಯಮದ ಮೂಲಕವೂ ಸಾಕಷ್ಟು ಪ್ರಚಾರ ನೀಡಿದ್ದರು. 28ನೇ ವಾರ್ಡಿನಲ್ಲಿ ನಮಸ್ತೆ ಚಿಕ್ಕಬಳ್ಳಾಪುರ ಕಾರ್ಯಕ್ರಮ ಹಮ್ಮಿಕೊಂಡು, ನಗರವಾಸಿಗಳ ಮನೆಮನೆಗೆ ತೆರಳಿ ಜಾಗೃತಿ ಮೂಡಿಸಿದ್ದರು. ಆದರೂ ಜನತೆ ಎಚ್ಚೆತ್ತುಕೊಂಡು ಖಾತೆ ಮಾಡಿಸಿಕೊಳ್ಳಲು ಮುಂದೆ ಬಾರದಿರುವುದು ಅಚ್ಚರಿಗೆ ಕಾರಣವಾಗಿದೆ.
ಮೂರು ದಿನಕ್ಕೆ 2418 ಅರ್ಜಿ
ಚಿಕ್ಕಬಳ್ಳಾಪುರ ನಗರಸಭೆ ವ್ಯಾಪ್ತಿಯಲ್ಲಿ ಬಾಕಿಯಿರುವ ಒಟ್ಟು ಖಾತೆಗಳ ಸಂಖ್ಯೆ 14, 648. ಈ ಅಭಿಯಾನ ಪ್ರಾರಂಭವಾದ ಫೆ.20ರಿಂದ 23ರ ಶನಿವಾರದವರೆಗೆ ಕ್ರಮವಾಗಿ ಮೊದಲ ದಿನ 716, ಎರಡನೇ ದಿನ-871, ಮೂರನೇ ದಿನ-831 ಒಟ್ಟು 2418 ಮಂದಿಯಷ್ಟೇ ಬಿ-ಖಾತೆಗೆ ನಿಗದಿಪಡಿಸಿರುವ ಎಲ್ಲಾ ದಾಖಲೆಗಳೊಂದಿಗೆ 31 ವಾರ್ಡುಗಳಲ್ಲಿ ಅರ್ಜಿ ಸಲ್ಲಿಸಿದ್ದಾರೆ.
11 ಸ್ಲಂಗಳಿಗೆ ಖಾತಾ ಭಾಗ್ಯವಿಲ್ಲ
ಚಿಕ್ಕಬಳ್ಳಾಪುರ ನಗರಸಭೆ ವ್ಯಾಪ್ತಿಯಲ್ಲಿ ಹತ್ತಾರು ವರ್ಷಗಳಿಂದ ಅಕ್ರಮವಾಗಿ ತಲೆಯೆತ್ತಿರುವ ಕೊಳಚೆ ಪ್ರದೇಶಗಳ ಸಂಖ್ಯೆ 11 ಇವೆ. ಈ ಪೈಕಿ ಕೆಲವೆಡೆ ಸರಕಾರವೇ ಇವರಿಗೆ ಮನೆಗಳನ್ನು ನಿರ್ಮಿಸಿಕೊಟ್ಟಿದೆ. ಉಳಿದವರು ಅವರೇ ಮನೆ ಕಟ್ಟಿಕೊಂಡು ವಾಸವಿದ್ದಾರೆ. ಆದರೆ ಸರಕಾರ ಕೊಟ್ಟಿರುವ ಮನೆಗಳಿಗೂ ಕೂಡ ಈವರೆಗೆ ಹಕ್ಕುಪತ್ರ ನೀಡಿಲ್ಲ. ಇವರು ಏನು ಮಾಡಬೇಕು, ಹಕ್ಕುಪತ್ರವನ್ನು ತೋರಿಸಿ ಎ ಖಾತೆ ಪಡೆಯಬಹುದು. ಇವರ ಬಳಿ ಯಾವ ದಾಖಲೆಯೂ ಇಲ್ಲದ ಕಾರಣ ಸಾವಿರಾರು ಮಂದಿ ಬಿಖಾತಾ ಅಭಿಯಾನದಿಂದ ದೂರ ಉಳಿಯುವಂತಾಗಿದೆ. ನಮ್ಮ ಶಾಸಕರು 90 ದಿನಗಳ ಒಳಗೆ ಕನಿಷ್ಠ ಬಿ ಖಾತೆ ಮಾಡಿಸಿಕೊಡಲು ಏನಾದರೂ ಯೋಜನೆ ರೂಪಿಸುತ್ತಾರೆ ಎಂಬ ನಿರೀಕ್ಷೆಯಲ್ಲಿ ಇವರಿದ್ದಾರೆ.
ಗೊಂದಲ ಮುಗಿದಿಲ್ಲ
ಈ ಅಭಿಯಾನದಲ್ಲಿಯೇ ಒಂದು ವೇಳೆ ಅರ್ಜಿ ಸಲ್ಲಿಸಿ ಅನಧಿಕೃತ ರೆವಿನ್ಯೂ ಬಡಾವಣೆ, ಮನೆ, ನಿವೇಶನ ಇತ್ಯಾದಿ ಆಸ್ತಿಗಳಿಗೆ ಬಿ ಖಾತಾ ಮಾಡಿಸಿಕೊಂಡರೆ ಭವಿಷ್ಯದಲ್ಲಿ ಅವರಿಗೆ ಎ ಖಾತಾ ದೊರೆಯುವುದೇ ಇಲ್ಲ ಎಂಬ ಸುದ್ದಿ ಕ್ಷೇತ್ರದಾದ್ಯಂದ ಕಾಡ್ಗಿಚ್ಚಿನಂತೆ ಹರಡಿರುವುದು ಕೂಡ ಸ್ಪಂದನೆ ಕಡಿಮೆಯಾಗಲು ಕಾರಣವಾಗಿದೆ. ಜತೆಗೆ ಗೊಂದಲ ದೂರಮಾಡಲು ಮುಂದಾಗದಿರುವುದು, ನಗರಸಭೆ ಆಡಳಿತ ಮತ್ತು ಶಾಸಕರ ನಡುವೆ ಶೀತಲ ಸಮರ, ಒಣಪ್ರತಿಷ್ಠೆಗಳು ಕೂಡ ಕಾರಣವಾಗಿವೆ. ಇದನ್ನು ಹೀಗೇ ಬಿಟ್ಟರೆ ಚಿಕ್ಕಬಳ್ಳಾಪುರದಲ್ಲಿ ಶಾಸಕರು ನಿರೀಕ್ಷೆ ಮಾಡಿದಷ್ಟು ಯಶಸ್ಸು ದೊರೆಯುವುದಿಲ್ಲ ಎಂಬುದು ಸಾರ್ವಜನಿಕರ ಮಾತಾಗಿದೆ.
ಮೂರು ದಿನಗಳ ಬಿ-ಖಾತಾ ಅಭಿಯಾನ ನಿರೀಕ್ಷಿತ ಫಲ ನೀಡದ ಹಿನ್ನೆಲೆಯಲ್ಲಿ ನಗರಸಭೆ ಆಯುಕ್ತರು ಫೆ.23, 24 ಎರಡು ದಿನಗಳ ಕಾಲ ಅಭಿಯಾನವನ್ನು ವಿಸ್ತರಣೆ ಮಾಡಿ ಶನಿವಾರ ಸಂಜೆ ಆದೇಶ ಹೊರಡಿಸಿದ್ದಾರೆ. ಈಗಲಾದರೂ ಜನತೆ ಯಾವುದೇ ಗೊಂದಲಗಳಿಗೆ ಆಸ್ಪದ ನೀಡದೆ ಸರಕಾರ ನೀಡಿರುವ ಸುವರ್ಣಾವಕಾಶದ ಸದುಪಯೋಗಕ್ಕೆ ಮುಂದಾಗುವುದು ಒಳಿತು.ಶಾಸಕರು ಕೂಡ ಶ್ರೀಮಂತ ಬಡಾವಣೆಯಾದ ಡಿವೈನ್‌ ಸಿಟಿ ನಿವಾಸಿಗಳ ಖಾತಾ ಸಮಸ್ಯೆಗೆ ಪರಿಹಾರ ತೋರಿದಂತೆ, ಬಡ ಶ್ರಮಿಕ ವರ್ಗವೇ ವಾಸವಿರುವ 11 ಸ್ಲಂ ನಿವಾಸಿಗಳಿಗೂ ಖಾತೆ ಮಾಡಿಸಿಕೊಡುವ ದೊಡ್ಡ ಮನಸ್ಸು ಮಾಡಬೇಕು. ಆಗ ಮಾತ್ರವೇ ಈ ಅಭಿಯಾನಕ್ಕೆ ಕೀರ್ತಿ ಬರಲಿದೆ ಎನ್ನುವುದು ಕೊಳೆಗೇರಿ ಜನರ ಆಭಿಪ್ರಾಯವಾಗಿದೆ.
ಒಟ್ಟಾರೆ ಬಿ ಖಾತಾ ಅಭಿಯಾನವನ್ನು 90 ದಿನಗಳ ನಂತರ ಯಾವುದೇ ಕಾರಣಕ್ಕೂ ಮುಂದುವರಿಸುವುದಿಲ್ಲ ಎಂಬುದನ್ನು ಸರಕಾರ ಸ್ಪಷ್ಟವಾಗಿ ಹೇಳಿದ್ದರೂ ಕೂಡ ನಗರವಾಸಿಗಳಿಗೆ ಇದರ ಮಹತ್ವ ಅರಿವಾಗದಿರುವುದು ವಿಪರ್ಯಾಸವಾಗಿದೆ. ಸರಕಾರವೇ ನೀಡಿರುವ ಅವಕಾಶವನ್ನು ಪಡೆದುಕೊಂಡವರು ಜಾಣರಾದರೆ ಕಳೆದುಕೊಂಡವರು ಪರಿತಪಿಸುವುದಂತೂ ಖಚಿತ.
(ವರದಿ: ಮುನಿರಾಜು ಎಂ. ಅರಿಕೆರೆ)