Stock Market: ಷೇರುಪೇಟೆಯಲ್ಲಿ ರಕ್ತಪಾತ- ಸೆನ್ಸೆಕ್ಸ್‌, ನಿಫ್ಟಿಯಲ್ಲಿ ಭಾರೀ ಕುಸಿತ

ಮುಂಬೈ: ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌(Donald Trump) ಅವರ ಹೊಸ ಸುಂಕ ನೀತಿ ಇಡೀ ಜಾಗತಿಕ ಮಾರುಕಟ್ಟೆಯನ್ನೇ ಅಲ್ಲೋಲ ಕಲ್ಲೋಲ ಮಾಡಿದೆ. ಸೋಮವಾರಮುಂಬೈ ಷೇರು ಮಾರುಕಟ್ಟೆ (Bombay Stock Market)ಯೂ ಭಾರೀ ನಷ್ಟದೊಂದಿಗೇ ವಹಿವಾಟು ಆರಂಭಿಸಿದೆ. ಸಂವೇದಿ ಸೂಚ್ಯಂಕ ಸೆನ್ಸೆಕ್ಸ್‌ ಸೋಮವಾರ 2,700 ಅಂಕ ಕುಸಿತಕ್ಕೀಡಾಗಿದ್ದು, 72,419ಕ್ಕೆ ದಿನದ ವಹಿವಾಟು ಆರಂಭಿಸಿದೆ. ಎನ್‌ಎಸ್‌ಇ ಸೂಚ್ಯಂಕ ನಿಫ್ಟಿ 958.35ಅಂಕ ಕಳೆದುಕೊಂಡು 21,946ಕ್ಕೆ ವಹಿವಾಟು ನಡೆಸುತ್ತಿದೆ.

ವಾರಾಂತ್ಯದ ರಜಾದಿನಗಳ ನಂತರ ಬೆಳಿಗ್ಗೆ 9 ಗಂಟೆಗೆ ವಹಿವಾಟು ಪುನರಾರಂಭವಾದಾಗ, ಆರಂಭಿಕ ವಹಿವಾಟಿನಲ್ಲಿ ಸೆನ್ಸೆಕ್ಸ್ 3,939.68 ಪಾಯಿಂಟ್‌ಗಳ ಕುಸಿತದೊಂದಿಗೆ 71,425.01 ಕ್ಕೆ ತಲುಪಿತು. ಈ ಅವಧಿಯಲ್ಲಿ ನಿಫ್ಟಿ 1,160.8 ಪಾಯಿಂಟ್‌ಗಳ ಕುಸಿತದೊಂದಿಗೆ 21,743.65 ಕ್ಕೆ ತಲುಪಿತು. ಬಾಂಬೆ ಸ್ಟಾಕ್ ಎಕ್ಸ್‌ಚೇಂಜ್‌ನಲ್ಲಿ ಪಟ್ಟಿ ಮಾಡಲಾದ ಭಾರತದ ಅಗ್ರ 30 ಕಂಪನಿಗಳ ಪ್ಯಾಕ್ ಆಗಿರುವ ಸೆನ್ಸೆಕ್ಸ್ ಬೆಳಗ್ಗೆ 10 ಗಂಟೆಗೆ 2,700 ಪಾಯಿಂಟ್‌ಗಳಿಗೂ ಹೆಚ್ಚು ಕುಸಿತ ಕಂಡಿದೆ.

ಈ ಸುದ್ದಿಯನ್ನೂ ಓದಿ: Dividend Yield Shares: ಹೆಚ್ಚು ಡಿವಿಡೆಂಡ್‌ ಲಾಭ ನೀಡುವ ಷೇರುಗಳ ಲಿಸ್ಟ್!‌

ಇಂದು ಬೆಳಿಗ್ಗೆ ರೂಪಾಯಿ ಕೂಡ ಕುಸಿತ ಕಂಡಿದ್ದು, ಅಮೆರಿಕನ್ ಡಾಲರ್ ವಿರುದ್ಧ 30 ಪೈಸೆ ಕುಸಿತ ಕಂಡು 85.74 ಕ್ಕೆ ತಲುಪಿದೆ. ಟ್ರಂಪ್ ಅವರ ಸುಂಕಗಳು ಭಾರತೀಯ ಮಾರುಕಟ್ಟೆಗಳಲ್ಲಿ ಭಯವನ್ನು ಉಂಟುಮಾಡುವುದು ಖಚಿತ ಮತ್ತು ಜಾಗತಿಕ ವ್ಯಾಪಾರ ಸಮರದಿಂದ ತನ್ನ ದೇಶೀಯ ಆರ್ಥಿಕತೆಯನ್ನು ರಕ್ಷಿಸಲು ದೇಶಕ್ಕೆ ಈಗ ಹಣಕಾಸು ಸುಧಾರಣೆಗಳ ಅಗತ್ಯವಿದೆ ಎಂದು ವಿಶ್ಲೇಷಕರು ಸೂಚಿಸುತ್ತಾರೆ.

ಲೋಕಸಭಾ ಚುನಾವಣೆಗಳ ನಂತರ, ಜೂನ್ 4, 2024 ರಂದು ಬಿಎಸ್‌ಇ ಸೆನ್ಸೆಕ್ಸ್ ದಾಖಲೆ ಮಟ್ಟದಲ್ಲಿ ಅಂದರೆ 4,389.73 ಪಾಯಿಂಟ್‌ಗಳ ಕುಸಿತ ಕಂಡಿತ್ತು. ಕೋವಿಡ್ 19 ಕಾರಣದಿಂದಾಗಿ ರಾಷ್ಟ್ರವ್ಯಾಪಿ ಲಾಕ್‌ಡೌನ್‌ನಿಂದಾಗಿ ಇದು ಮಾರ್ಚ್ 23, 2020 ರಂದು 3,934.72 ಪಾಯಿಂಟ್‌ಗಳ ಕುಸಿತ ಕಂಡಿತ್ತು. ಇದಕ್ಕೂ ಮೊದಲು ಮಾರ್ಚ್ 12, 2020 ರಂದು, ಕೊರೊನಾವೈರಸ್ ಕಳವಳದಿಂದಾಗಿ 2,919.26 ಪಾಯಿಂಟ್‌ಗಳ ಕುಸಿತ ಕಂಡಿತ್ತು. ಇದನ್ನು ಬಿಟ್ಟರೆ ಇದುವರೆಗೂ ಎಂದಿಗೂ ಇಂತಹ ಕುಸಿತ ಕಂಡು ಬಂದಿರಲಿಲ್ಲ. ಇದೀಗ ಟ್ರಂಪ್‌ ಸರ್ಕಾರದ ಹೊಸ ಸುಂಕ ನೀತಿಯ ಷೇರುಪೇಟೆಯ ತಲ್ಲಣಕ್ಕೆ ಕಾಎರಣವಾಗಿದೆ.