Ban On Politicians: ಶಿಕ್ಷೆಗೆ ಗುರಿಯಾಗಿರುವ ರಾಜಕಾರಣಿಗಳ ಮೇಲೆ ಆಜೀವ ನಿಷೇಧ ಸರಿಯಲ್ಲ-ಸುಪ್ರೀಂಗೆ ಕೇಂದ್ರ ಸರ್ಕಾರ ಅಫಿಡವಿಟ್‌ ಸಲ್ಲಿಕೆ

ನವದೆಹಲಿ: ಕ್ರಿಮಿನಲ್ ಪ್ರಕರಣಗಳಲ್ಲಿ ಶಿಕ್ಷೆಗೊಳಗಾದ ರಾಜಕಾರಣಿಗಳ ಮೇಲೆ ಜೀವಮಾನ ಅನರ್ಹತೆ ಅಥವಾ ಆಜೀವ ನಿಷೇಧ(Ban On Politicians) ಹೇರುವುದು ಸರಿಯಲ್ಲ. ಕೇವಲ ಆರು ವರ್ಷಗಳ ಕಾಲ ಅವರ ಮೇಲೆ ನಿಷೇಧ ಸಾಕು ಎಂದು ಕೇಂದ್ರ ಸರ್ಕಾರ ಸುಪ್ರೀಂ ಕೋರ್ಟ್‌(Supreme Court)ಗೆ ತಿಳಿಸಿದೆ. ದೇಶದಲ್ಲಿ ಸಂಸದರು ಮತ್ತು ಶಾಸಕರ ವಿರುದ್ಧದ ಕ್ರಿಮಿನಲ್ ಪ್ರಕರಣಗಳನ್ನು ತ್ವರಿತವಾಗಿ ವಿಲೇವಾರಿ ಮಾಡಬೇಕು ಮತ್ತು ದೋಷಿ ಎಂದು ಸಾಬೀತಾದರೆ ಅಂತಹ ಜನಪ್ರತಿನಿಧಿಗಳ ಮೇಲೆ ಆಜೀವ ನಿಷೇಧ ಹೇರಬೇಕೆಂದು ಕೋರಿ ವಕೀಲ ಅಶ್ವಿನಿ ಉಪಾಧ್ಯಾಯ ಸಲ್ಲಿಸಿದ ಅರ್ಜಿಗೆ ಪ್ರತಿಕ್ರಿಯೆಯಾಗಿ ಸಲ್ಲಿಸಿದ ಅಫಿಡವಿಟ್‌ನಲ್ಲಿ, ಅನರ್ಹತೆಯ ಅವಧಿಯನ್ನು ನಿರ್ಧರಿಸುವುದು ಸಂಸತ್ತಿನ ವ್ಯಾಪ್ತಿಗೆ ಮಾತ್ರ ಸಂಬಂಧಿಸಿದ್ದಾಗಿದೆ. ಆಜೀವ ನಿಷೇಧ ಸೂಕ್ತವೇ ಅಥವಾ ಇಲ್ಲವೇ ಎಂಬ ಪ್ರಶ್ನೆಯು ಸಂಸತ್ತಿಗೆ ನಿರ್ಧಾರಕ್ಕೆ ಬಿಟ್ಟ ವಿಚಾರ ಎಂದು ಕೇಂದ್ರ ಹೇಳಿದೆ. ಅಲ್ಲದೇ ಅನರ್ಹತೆಯ ಅವಧಿಯನ್ನು ಸದನವು ಪ್ರಮಾಣಾನುಗುಣತೆ ಮತ್ತು ಸಮಂಜಸತೆಯ ತತ್ವಗಳನ್ನು ಪರಿಗಣಿಸಿ ನಿರ್ಧರಿಸುತ್ತದೆ ಎಂದು ಸೇರಿಸಿದೆ.

ಜೈಲು ಶಿಕ್ಷೆ ಅನುಭವಿಸಿದ ಶಾಸಕರ ಅನರ್ಹತೆಯನ್ನು ಆರು ವರ್ಷಗಳಿಗೆ ಸೀಮಿತಗೊಳಿಸುವಂತಹ ಅಸ್ತಿತ್ವದಲ್ಲಿರುವ ಕಾನೂನು ನಿಬಂಧನೆಗಳನ್ನು ಸಮರ್ಥಿಸಿಕೊಂಡ ಕೇಂದ್ರವು, ಸುಪ್ರೀಂ ಕೋರ್ಟ್‌ಗೆ ಸಲ್ಲಿಸಿದ ಅಫಿಡವಿಟ್‌ನಲ್ಲಿ, 1951 ರ ಜನತಾ ಪ್ರಾತಿನಿಧ್ಯ ಕಾಯ್ದೆಯ ಪ್ರಶ್ನಾತೀತ ನಿಬಂಧನೆಗಳ ಪ್ರಕಾರ ಸಂಸತ್‌ ವಿಶೇಷ ಕಾನೂನು ರಚನೆಯ ಪ್ರಾಧಿಕಾರವಾಗಿ, ಶಿಕ್ಷೆಗೊಳಗಾದ ಶಾಸಕರಿಗೆ ಅನರ್ಹತೆಯ ಅವಧಿ ಅಥವಾ ದಂಡದ ಅವಧಿಯನ್ನು ನಿರ್ಧರಿಸುವ ಅಧಿಕಾರವನ್ನು ಹೊಂದಿದೆ ಎಂದು ವಾದಿಸಿತು. ವಕೀಲರಾದ ಅಶ್ವಿನಿ ಉಪಾಧ್ಯಾಯ ಅವರು ಸಲ್ಲಿಸಿದ್ದ ಸಾರ್ವಜನಿಕ ಹಿತಾಸಕ್ತಿ ಮೊಕದ್ದಮೆಗೆ (ಪಿಐಎಲ್) ಪ್ರತಿಕ್ರಿಯಿಸುತ್ತಾ, ಅಫಿಡವಿಟ್ ಹೀಗೆ ಹೇಳಿದೆ: ಅರ್ಜಿದಾರರು ಕೋರುತ್ತಿರುವ ಪರಿಹಾರವು 1951 ರ ಜನತಾ ಪ್ರಾತಿನಿಧ್ಯ ಕಾಯ್ದೆಯ ಸೆಕ್ಷನ್ 8 ರ ಕಾನೂನು ನಿಯಮಾವಳಿಗಳನ್ನು ಉಲ್ಲಂಘಿಸುತ್ತದೆ ಎಂದಿದೆ.

ಕಾಯ್ದೆಯ ಸೆಕ್ಷನ್ 8 ಮತ್ತು 9 ರ ಸಾಂವಿಧಾನಿಕ ಸಿಂಧುತ್ವವನ್ನು ಪ್ರಶ್ನಿಸಿ ಮತ್ತು ಶಿಕ್ಷೆಗೊಳಗಾದ ಶಾಸಕರ ಮೇಲೆ ಜೀವಮಾನದ ನಿಷೇಧವನ್ನು ಕೋರಿ ಉಪಾಧ್ಯಾಯ ಅವರು 2016 ರಲ್ಲಿ ಸಲ್ಲಿಸಿದ ಪಿಐಎಲ್ ಅನ್ನು ನ್ಯಾಯಾಲಯ ವಿಚಾರಣೆ ನಡೆಸುತ್ತಿದೆ.

ಈ ಸುದ್ದಿಯನ್ನೂ ಓದಿ: Supreme Court: ಯೂಟ್ಯೂಬರ್‌ ಅಲ್ಹಾಬಾದಿಯಾ ಕೇಸ್‌ ಬೆನ್ನಲ್ಲೇ ಕೇಂದ್ರದ ಪ್ರತಿಕ್ರಿಯೆ ಕೇಳಿದ ಸುಪ್ರೀಂ ಕೋರ್ಟ್‌

ಜೀವಮಾನ ನಿಷೇಧ ಹೇರಬೇಕೆ ಬೇಡವೇ ಎಂಬುದು ಸಂಸತ್ತಿನ ವ್ಯಾಪ್ತಿಯೊಳಗೆ ಮಾತ್ರ ಇರುವ ಪ್ರಶ್ನೆ ಎಂದು ಅಫಿಡವಿಟ್ ಒತ್ತಿ ಹೇಳಿದೆ. ಕಾನೂನಿನ ವಿಷಯವಾಗಿ, ಯಾವುದೇ ದಂಡ ವಿಧಿಸುವಾಗ, ಸಂಸತ್ತು ಪ್ರಮಾಣಾನುಗುಣತೆ ಮತ್ತು ಸಮಂಜಸತೆಯನ್ನು ಕಾಪಾಡಿಕೊಳ್ಳಲು ಪ್ರಯತ್ನಿಸುತ್ತದೆ.