SRH Vs LSG: ಹೈದರಾಬಾದ್‌ ಮುಂದೆ ನಡೆದೀತೇ ಲಕ್ನೋ ಆಟ?
ಲಕ್ನೋ ತಂಡದಲ್ಲಿ ಅನುಭವಿ ಬೌಲರ್‌ಗಳು ಇಲ್ಲದಿದ್ದರೂ ಕೂಡ ಬ್ಯಾಟಿಂಗ್ ಲೈನ್‌ ಅಪ್‌ ಬಲಿಷ್ಠವಾಗಿದೆ. ಮಿಚೆಲ್ ಮಾರ್ಷ್, ಐಡೆನ್ ಮಾರ್ಕ್ರಮ್‌, ಬದೋನಿ, ನಿಕೋಲಸ್ ಪೂರಣ್‌ ಮತ್ತು ಡೇವಿಡ್ ಮಿಲ್ಲರ್ ಪ್ರಚಂಡ ಫಾರ್ಮ್‌ನಲ್ಲಿದ್ದಾರೆ. ಇವರಲ್ಲಿ ಕನಿಷ್ಠ ಇಬ್ಬರು ಸಿಡಿದು ನಿಂತರೂ ದೊಡ್ಡ ಮೊತ್ತಕ್ಕೇನು ಕೊರತೆಯಾಗದು.
Abhilash BC
Mar 26, 2025 4:48 PM
ಹೈದರಾಬಾದ್‌: ಡೆಲ್ಲಿ ಕ್ಯಾಪಿಟಲ್ಸ್‌ ವಿರುದ್ಧ 200 ಪ್ಲಸ್‌ ಮೊತ್ತ ಪೇರಿಸಿಯೂ ಪಂದ್ಯವನ್ನು ಕಳೆದುಕೊಂಡ ಲಕ್ನೋ ಸೂಪರ್‌ ಜೈಂಟ್ಸ್‌(SRH Vs LSG) ತಂಡ ಅಂಕಪಟ್ಟಿಯ ಅಗ್ರಸ್ಥಾನಿ, ಬಲಿಷ್ಠ ಸನ್‌ರೈಸರ್ಸ್‌ ಹೈದರಾಬಾದ್‌ ವಿರುದ್ಧ ಗೆಲುವಿನ ಹಳಿ ಏರಲು ರಾಜೀವ್‌ ಗಾಂಧಿ ಕ್ರಿಕೆಟ್‌ ಅಂಗಳದಲ್ಲಿ ಗುರುವಾರದ ಐಪಿಎಲ್ ಪಂದ್ಯದಲ್ಲಿ ಸೆಣಸಾಟ ನಡೆಸಲಿವೆ. ಅನುಭವಿ ಬೌಲರ್‌ಗಳ ಕೊರತೆಯಲ್ಲಿ ಪಂತ್ ಪಡೆ ಹೈದರಾಬಾದ್‌ ಬ್ಯಾಟರ್‌ಗಳನ್ನು ಹೇಗೆ ಕಟ್ಟಿ ಹಾಕೀತು? ಎನ್ನುವುದು ಪಂದ್ಯದ ಕೌತುಕ.
ಹೈದರಾಬಾದ್‌ ತಂಡದ ಬ್ಯಾಟಿಂಗ್ ಎಷ್ಟು ಬಲಿಷ್ಠ ಮತ್ತು ಅಪಾಯಕಾರಿ ಎನ್ನುವುದು ರಾಜಸ್ಥಾನ್‌ ವಿರುದ್ಧದ ಪಂದ್ಯದಲ್ಲೇ ಜಗಜ್ಜಾಹಿರವಾಗಿದೆ. ಅನುಭವಿ ಬೌಲರ್‌ಗಳನ್ನು ಚೆಂಡಾಡಿ 286 ರನ್‌ ಕಲೆ ಹಾಕಿತ್ತು. ಇದೀಗ ದುರ್ಬಲ ಬೌಲಿಂಗ್‌ ಹೊಂದಿರುವ ಲಕ್ನೋ ವಿರುದ್ಧವೇನಾದರೂ ಹೈದರಾಬಾದ್‌ ಮೊದಲು ಬ್ಯಾಟಿಂಗ್ ನಡೆಸಿದರೆ 300 ರನ್‌ ಬಾರಿಸುವುದು ಖಚಿತ ಎಂದು ಪಂದ್ಯ ಆರಂಭಕ್ಕೂ ಮುನ್ನವೇ ಕೆಲ ಕ್ರಿಕೆಟ್‌ ಪಂಡಿತರು ಭವಿಷ್ಯ ನುಡಿಯಲಾರಂಭಿಸಿದ್ದಾರೆ. ಇನ್ನು ಕೆಲವರು ಲಕ್ನೋ ತಂಡ ಟಾಸ್‌ ಗೆದ್ದರೆ ತಪ್ಪಿಯೂ ಬೌಲಿಂಗ್‌ ಆಯ್ಕೆ ಮಾಡಿಕೊಳ್ಳಬಾರದು ಎಂದು ಸಲಹೆ ನೀಡಿದ್ದಾರೆ.
ಹೈದರಾಬಾದ್‌ ಹೊಡಿ ಬಡಿ ಆಟ
ಕಳೆದ ಪಂದ್ಯದಲ್ಲಿ ಬ್ಯಾಟಿಂಗ್‌ಗೆ ಇಳಿದ ಅಕ್ರ ಕ್ರಮಾಂಕದ ಬ್ಯಾಟರ್‌ಗಳೆಲ್ಲಾ ಜಿದ್ದಿಗೆ ಬಿದ್ದವರಂತೆ ಬ್ಯಾಟ್‌ ಬೀಸಿದ್ದರು. ಇಶನ್‌ ಕಿಶನ್ ಶತಕ ಬಾರಿಸಿದರೆ, ಟ್ರಾವಿಸ್ ಹೆಡ್ ಅರ್ಧಶತಕ ಬಾರಿಸಿದ್ದರು. ಉಳಿದಂತೆ ಅಭಿಷೇಕ್ ಶರ್ಮ, ನಿತೀಶ್ ಕುಮಾರ್ ರೆಡ್ಡಿ ಮತ್ತು ಹೆನ್ರಿಚ್ ಕ್ಲಾಸೆನ್ ಕೂಡ ಬಿರುಸಿನ ಬ್ಯಾಟಿಂಗ್ ನಡೆಸಿದ್ದರು. ಈ ಪಂದ್ಯ ಕೂಡ ತವರಿನಲ್ಲೇ ನಡೆಯುತ್ತಿರುವ ಕಾರಣ ತವರಿನ ಲಾಭ ಕೂಡ ಇರಲಿದೆ. ಬೌಲಿಂಗ್‌ನಲ್ಲಿ ಶಮಿ, ಕಮಿನ್ಸ್, ಜಂಪಾ ಇದ್ದರೂ ಕೂಡ ಕಳೆದ ಪಂದ್ಯದಲ್ಲಿ ದುಬಾರಿಯಾಗಿದ್ದರು. ಹೀಗಾಗಿ ಇವರು ತಮ್ಮ ಎಸೆತಗಳಿಗೆ ಸಾಣೆ ಹಿಡಿಯಲೇ ಬೇಕು.
ಲಕ್ನೋ ಬ್ಯಾಟಿಂಗ್ ಓಕೆ
ಲಕ್ನೋ ತಂಡದಲ್ಲಿ ಅನುಭವಿ ಬೌಲರ್‌ಗಳು ಇಲ್ಲದಿದ್ದರೂ ಕೂಡ ಬ್ಯಾಟಿಂಗ್ ಲೈನ್‌ ಅಪ್‌ ಬಲಿಷ್ಠವಾಗಿದೆ. ಮಿಚೆಲ್ ಮಾರ್ಷ್, ಐಡೆನ್ ಮಾರ್ಕ್ರಮ್‌, ಬದೋನಿ, ನಿಕೋಲಸ್ ಪೂರಣ್‌ ಮತ್ತು ಡೇವಿಡ್ ಮಿಲ್ಲರ್ ಪ್ರಚಂಡ ಫಾರ್ಮ್‌ನಲ್ಲಿದ್ದಾರೆ. ನಾಯಕ ರಿಷಭ್ ಪಂತ್ ಕಳೆದ ಪಂದ್ಯದಲ್ಲಿ ಶೂನ್ಯ ಸುತ್ತಿದರೂ ಈ ಪಂದ್ಯದಲ್ಲಿ ಕಮ್‌ಬ್ಯಾಕ್‌ ಮಾಡುವ ವಿಶ್ವಾಸದಲ್ಲಿದ್ದಾರೆ. ಇರುವುದರಲ್ಲಿ ಶಾರ್ದೂಲ್ ಠಾಕೂರ್ ಮತ್ತು ರವಿ ಬಿಷ್ಣೋಯ್ ಇಬ್ಬರೆ ಅನುಭವಿ ಬೌಲರ್‌ಗಳು. ಗಂಟೆಗೆ 150 ರ ವೇಗದಲ್ಲಿ ಬೌಲಿಂಗ್‌ ನಡೆಸಬಲ್ಲ ಮಯಾಂಕ್‌ ಯಾದವ್‌ ಮತ್ತು ಅವೇಶ್‌ ಖಾನ್‌ ತಂಡ ಸೇರಿದರೆ ತಂಡದ ಬೌಲಿಂಗ್‌ ಚೇತರಿಕೆ ಕಾಣಲಿದೆ. ಆದರೆ ಇವರು ಗಾಯದಿಂದ ಇನ್ನೂ ಸಂಪೂರ್ಣ ಗುಣಮುಖರಾಗಿಲ್ಲ.
ಇದನ್ನೂ ಓದಿ IPL 2025 Points Table: ಐಪಿಎಲ್ ಅಂಕಪಟ್ಟಿಯಲ್ಲಿ ಆರ್‌ಸಿಬಿಗೆ ಎಷ್ಟನೇ ಸ್ಥಾನ?
ಸಂಭಾವ್ಯ ತಂಡಗಳು
ಹೈದರಾಬಾದ್‌: ಟ್ರಾವಿಸ್ ಹೆಡ್, ಅಭಿಷೇಕ್ ಶರ್ಮಾ, ಇಶಾನ್ ಕಿಶನ್, ನಿತೀಶ್ ಕುಮಾರ್ ರೆಡ್ಡಿ, ಹೆನ್ರಿಚ್ ಕ್ಲಾಸೆನ್ (ವಿ.ಕೀ.), ಅನಿಕೇತ್ ವರ್ಮಾ, ಅಭಿನವ್ ಮನೋಹರ್, ಪ್ಯಾಟ್ ಕಮಿನ್ಸ್ (ನಾಯಕ), ಸಿಮರ್ಜೀತ್ ಸಿಂಗ್, ಹರ್ಷಲ್ ಪಟೇಲ್, ಮೊಹಮ್ಮದ್ ಶಮಿ.
ಲಕ್ನೋ: ಐಡೆನ್ ಮಾರ್ಕ್ರಾಮ್, ಮಿಚೆಲ್ ಮಾರ್ಷ್, ನಿಕೋಲಸ್ ಪೂರನ್, ಆಯುಷ್ ಬಡೋನಿ, ರಿಷಭ್ ಪಂತ್ (ನಾಯಕ), ಡೇವಿಡ್ ಮಿಲ್ಲರ್, ದಿಗ್ವೇಶ್ ರಾಠಿ, ಶಹಬಾಜ್ ಅಹ್ಮದ್, ಶಾರ್ದೂಲ್ ಠಾಕೂರ್, ರವಿ ಬಿಷ್ಣೋಯ್, ಮಣಿಮಾರನ್ ಸಿದ್ಧಾರ್ಥ್.